Sulat kanu Manga Taw sa Kulusas
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na inisulat'i Bulus, a lu pakatumpa kanu umpungan nu 'bpamaginugut kanu Isa al-Masih sa dalepa a Kulusas, a lu tampal kanu sebangan nu dalepa a Ipisu. Su dua a nia a dalepa na sakup'u Turkey sa saguna a timpu. Na nia natabuan sa kinasulat'i Bulus sa nia na nabilanggu sekanin. Na si Timuti i kaped'in sa kinasulat'in sa nia enggu si Tikikus menem i nasugu nin a makapananggit kanu nia a sulat'in. Na si Ipapras menem a taw bun sa Kulusas i nabaluy a lalan sa kinapaginugut'u manga taw a nia kanu Isa al-Masih kagina si Ipapras na isa bun basi sekanin a nakakineg kanu Mapia a Tutuma pantag kanu Isa al-Masih a inipangusiat'i Bulus lu sa dalepa a Ipisu. Na su kinasulat'i Bulus kanu nia na kanu timpu a manga telupulu lagun ulian nu kinambibiag 'bpaluman nu Isa al-Masih.
Kanu nia ba a manga timpu na su 'bpamaginugut sa dalepa a Kulusas na 'bpangandamen ni Bulus i basi 'gkalat su kabpaginugut'ilan sabap sa aden 'bpamamandu sa dikena pakatidtu lu kanilan. Tembu inisulat'in i nia kanilan asal'a makapaingat'in silan kanu manga panduan a pamakasibay enggu makapagkabagel'in su paginugut'ilan kanu Isa al-Masih taman sa papedtuntayan nin kanilan i dala den ped a nasisita nilan atawa ka saligan nilan ka su Isa al-Masih bu. Sekanin i barakat sa langun atawa ka sekanin i pakagaga sa langun sia sa dunia ka bagu pan pinangaden su dunia na lu den sekanin. Sekanin i ukit sa kambalingan nu taw kanu Kadenan sia makanggulalan kanu kapaginugut'ilan sa lekanin. Tembu ba apia ngin pan i panduan a ipamandu kanilan liu kanu panduan pantag kanu Isa al-Masih na di nilan ipamamantag. Di nilan nasisita i apia ngin a kabarakatan atawa ka kategelan atawa ka adat-betad ka da den i entu katagan nin kanilan kagina nalusud den silan kanu Isa al-Masih.
Na nia kiug'i Bulus na padsatimanen nilan i itungan nilan sia kanu Isa al-Masih. Na nia nilan 'bpapangilayn na u panun i kaiseg'u paginugut'ilan taman sa ipayapat'ilan su entu.