Sulat kanu Manga Taw sa Kulusas
Su Salam
1
Salam sa lekanu. Su nia a sulat na ebpun sa laki a si Bulus a sinugu nu Isa al-Masih sia luyud kanu kahanda nu Kadenan. Kaped ku si Timuti a suled tanu bun sa paginugut. 2 San i nia pakatumpa sa lekanu a manga taw sa Kulusas a senep sa atay i kabpaginugut'in kanu Isa al-Masih enggu nasuti sabap sa lekanin. San sa lekanu su da idsan nin a limu enggu su kalilintad a ebpun kanu Ama tanu a su Kadenan.Su Kabpangeni-ngeni ni Bulus kanu 'Bpamaginugut sa Kulusas
3 Uman nami sekanu ibpangeni-ngeni na tatap kami pedsukul-sukul kanu Kadenan a Ama nu Mapulu tanu a su Isa al-Masih 4 sabap kanu kinakineg'ami kanu kapedsalig'u kanu Isa al-Masih enggu su kapegkalimu nu kanu langun na nasuti sabap sa lekanin. 5-6 Na su kapedsalig'u enggu su kapegkalimu nu a entu, na 'gkanggula nu sabap kanu kapegkainam'u kanu inadil'u Kadenan sa lekanu lu sa sulega. Na natuntayan nu su entu sia kanu kinakineg'u kanu bantang a katigan a nakapangusiat sa lekanu a su Mapia a Tutuma. Na mapia i unga nin kanu apia endaw a dalepa a 'gkapayapatan nu Mapia a Tutuma kanu lusud'u dunia a mana bun kanu ngin i nagedam'u iganat kanu kinakineg'u enggu kinatuntay nu sa mapia kanu da idsan nin a limu nu Kadenan. 7 Na sia nu i entu nakineg kani Ipapras a papedtayan a kaped'ami a ulipen nu Mapulu. 'Gkasaligan sekanin a gumagalebek kanu Masih enggu sekanin bun i nakanggalebek kanu galebekan a dait a sekami i penggula lun. 8 Sekanin bun i nakapanudtul sa lekami pantag kanu limu a inenggay nu Suti a Ruh sa lekanu.
9 Tembu ba iganat sa kinakineg'ami kanu mapia a entu a tudtulan pantag sa lekanu na tatap'ami sekanu ibpangeni-ngeni sa tabangan kanu nu Kadenan sa tidtu-tidtu a katuntay nu kanu ngin i kahanda nin sia makanggulalan kanu 'bpamelapay a ilemu a ebpun kanu Suti a Ruh 10 ka enggu kanu makapaguyag-uyag sa makadait enggu makasuat kanu Mapulu a su Isa al-Masih sia kanu langun nu enggulan nu taman sa mailay sa lekanu su langun nu mapia a galebek enggu mangiseg su kakilala nu kanu Kadenan. 11-12 Na 'gkabagel kanu bun sa tidtu-tidtu sia makanggulalan kanu da idsan nin a kabarakat'in ka enggu kanu kaadenan na tidtu-tidtu a kasabal taman sa katigkelan nu su langun na kamalasayan nu. Na makadsukul-sukul kanu bun sa aden kagalaw nina kanu Ama tanu a su Kadenan a minaluy sa lekanu sa makaamung kanu kanu ipebpusaka nin kanu manga taw a sia naluyud kanu kalinawagan a nasuti sabap kanu Isa al-Masih. 13 Iniawa tanu nin kanu bagel'u kalibutengan ka inialat tanu nin kanu pendatuan nu Tunggal'in a ipegkalimu nin. 14 Na sabap kanu kinaisa tanu kanu Isa al-Masih na naampun tanu ka inaun tanu nin kanu manga kabaladusan tanu.
Su Pantag kanu Entain su Isa al-Masih
15 Sekanin i alung-alung'u Kadenan a di 'gkailay, sekanin i pinagkaka ka sakup'in su langun nu pinangaden. 16 Sia nakanggulalan sa lekanin su kinapangaden kanu langun-langun magidsan i lu sa langit enggu sia sa lupa, magidsan pan i 'gkangailay enggu di 'gkangailay a mana su manga pendatu atawa ka su manga pegkamal enggu su aden manga bagel'in. Ka su langun man nu pinangaden na pinangaden i entu sabap sa lekanin enggu sia nakanggulalan sa lekanin i kinapangaden kanu langun. 17 Na unan pan nu kinapangaden kanu langun-langun na lu den sekanin enggu 'bpananalusan su langun-langun nu entu sabap sa lekanin. 18 Sekanin su ulu nu 'bpamaginugut a iniupaman kanu badan nin. Sekanin i nabpunan nu entu enggu sekanin bun i muna-muna a mimbibiag 'bpaluman ka enggu mabaluy sekanin a mapulu sa langun. 19 Ka pigkahanda man nu Kadenan i lu demun sa lekanin su Kakadenan nin. 20 Na sia makanggulalan sa lekanin na makambalingan sa lekanin su langun-langun magidsan pan i sia sa lupa enggu lu kanu langit. Sia i entu nakanggulalan kanu kinatuga na lugu nu Tunggal'in sia kanu kinatutuk lun kanu kayu a pinambalawaga.
Su Pinggula nu Isa al-Masih asal'a Makambalingan su Taw kanu Kadenan
21 Na kanu paganay na nakatangka kanu kanu Kadenan enggu sungkang kanu sa lekanin sabap kanu manga mawag a kapagitung'u enggu galebekan nu. 22 Ugaid'a saguna na inimbalingan kanu nin den sa lekanin sia nakanggulalan kanu kinapatay nu Isa al-Masih ka enggu kanu nin makaadap a ikelas, dala tila nin enggu da budseng'in lu sa lekanin 23 amaika menem ka palalayunen nu su salig'u taman sa pakabagelen nu su tindeg'u kanu salig'u enggu di nu padtadayn a madadag sa lekanu su inam a ebpun kanu Mapia a Tutuma a nakineg'u a inipangusiat kanu embala-bala kanu dunia. Na isa aku a 'bpangusiat kanu Mapia a Tutuma.
Su Kapedtiakap'i Bulus kanu 'Bpamaginugut
24 Na 'gkapia i ginawa ku apia pedtala aku sa kamalasayan sabap sa lekanu kagina kanu maya ba a ukit na makapatalus ku su kamalasayan a nasisita pan a matala nu Masih sabap kanu umpungan nu 'bpamaginugut a iniupaman kanu badan nin. 25 Na nabaluy aku a makadtabang kanu umpungan nu 'bpamaginugut sia luyud kanu kinasangan sa laki nu Kadenan kanu galebekan a lekanu a kapianan a su kapayag kanu kadtalu nin kanu langun nu taw 26 a su nakapagena a kahanda nin kanu nauget den a manga timpu ugaid'a saguna na nakapayag den kanu manga taw a sinuti nin. 27 Na pigkahanda nu Kadenan i kapayag'in kanilan u ngin i kapia nin kanu manga taw a dikena-Yahudi su sangat i kapia nin a nakapagena a kahanda nin. Na su nakapagena a nia a kahanda nu Kadenan na su Masih a san den sa lekanu. Sekanin i inam tanu sa matalima tanu su palihala a inibpasad'u Kadenan. 28 Tembu ibpangusiat'ami su pantag kanu Isa al-Masih ka enggu makapaingat su langun nu manga taw enggu mapamandu nami sia luyud kanu ngin i katuntay a inenggay nu Kadenan ka enggu nami silan makaadap kanu Kadenan a talutup sia kanu kinaisa nilan kanu Masih. 29 Tembu ba 'bpaginapas aku sa matuman su entu sia makanggulalan kanu da idsan nin a kapegkagaga nu Isa al-Masih a papegkabagel sa laki.