2
Na papegkatawan ku sa lekanu u endaw taman i kabpaginapas ku sabap sa lekanu apeg den nu 'bpamaginugut san sa Laudisia taman den kanu ped pan a 'bpamaginugut a da ku pamun makapagilaya. 2 Na nia ku kahanda sa entu na asal'a 'gkabagel i manggiginawa nu sia makanggulalan kanu kaisa nu sia kanu kagkakalimua nu enggu magedam'u su palihala a tidtu-tidtu a katuntay ka enggu nu katuntayan su nakapagena a kahanda nu Kadenan. Na su nakapagena a nia a kahanda nu Kadenan na su Masih. 3 Na lu matun sa lekanin su langun na katuntay enggu ilemu nu Kadenan a mana i nia balapantag a benal a kakawasan. 4 Na pedtalun ku i nia sa lekanu ka enggu di kanu makapasibay nu manga panduan a mana mapia i sanad'in. 5 Ka apia man dala aku san sa lekanu na mana aku nu bun man kaped sa kabpagitung ku sa lekanu. Na sangat a 'gkagalaw aku sa kapegkakineg ku sa 'bpaguyag-uyag kanu sa aden gugud'in enggu mabagel su kapedsalig'u kanu Isa al-Masih.Su Talutup a Kapaguyag-uyag sia kanu Isa al-Masih
6 Kagina ka natalima nu den a Mapulu nu su Isa al-Masih na paguyag-uyag kanu sia sa lekanin 7 sa iling-iling'u kayu na endalig kanu taman sa mangengetu kanu sia kanu Isa al-Masih. Na mana bun su inipamandu sa lekanu na pakabagel kanu sia kanu salig'u enggu tatap kanu edsukul-sukul kanu Kadenan.
8 Pangingati nu i di kanu kadulatan nu manga panduan a pakadulat enggu da katagan nin a dikena luyud kanu Masih ka luyud sia kanu adat-betad'u manga taw enggu kanu bagel'u di 'gkangailay.a 9 Kagina su Isa al-Masih a mimbaluy a manusia na lu sa lekanin su langun nu Kakadenan nu Kadenan. 10 Na sia kanu kinaisa nu sa lekanin na natalutup kanu sa lekanin a mapulu nu langun nu aden bagel'in enggu langun nu pegkamal. 11 Na sia bun kanu Isa al-Masih na napaletakb kanu den ugaid'a dikena sa ukit a manusia ka sa ukit'u Isa al-Masih sia kanu kinaawa nin kanu kamamanusiay a kiug'u ginawa nu. 12 Na mana kanu bun nakalebeng kaped'u Isa al-Masih kanu kinasalawat sa lekanu enggu pinambibiag 'bpaluman a kaped'in sia nakanggulalan kanu salig'u kanu kabarakat'u Kadenan a napambibiag 'bpaluman kanu Isa al-Masih. 13 Na sekanu a timbang a minatay kanu paganay sabap kanu manga kabaladusan nu enggu da pan maawa sa lekanu su kamamanusiay a kiug'u ginawa nuc na pinambibiag kanu den 'bpaluman nu Kadenan kaped'u Isa al-Masih kanu kinaampun nin kanu langun nu kabaladusan tanu. 14 Pinunas'u Kadenan su manga kabaladusan a nakasugat sa lekitanu sa kawagib sabap kanu kinasungkang tanu kanu kasuguan nin. Pinunas'in i entu sia nakanggulalan kanu kinapatay nu Isa al-Masih sia kanu kayu a pinambalawaga. 15 Inawan nin sa bagel su langun nu pegkamal enggu aden bagel'in a di 'gkangailay. Tinabanan nin silan sia nakanggulalan kanu Isa al-Masih taman sa inipangangayag'in su entu.
Su Panduan a di Pakatidtu
16 Tembu ba di nu semuguti i aden edtalu sa lekanu sa pakasungkang kanu sabap kanu kapegkan nu atawa ka kabpaginem'u atawa ka su di nu kapenggalebek kanu kapedsela-sela kanu manga kanduli, kanu bagu a ulan-ulan enggu su Gay nu Kabpangintelenen a manga galebekan sa kabpagagama. 17 Alung-alung bu i entu nu manganggula ugaid'a su langun nu entu na natuman den sia kanu Masih. 18 Di nu bun semuguti su apia entain a mawa sa lekanu kanu balas a matalima nu. Su entu a manga taw na malilini sa kababa na ginawa sa di pakatidtu enggu kasimba kanu manga malaikat. Na pedtindegan nilan i aden 'gkaalung'ilan ugaid'a nia nin kabantang na pedsandag bu silan ka su langun nu entu na ebpun bu kanu kamamanusiay a itungan nilan. 19 Da silan masakup'u ulu a su Isa al-Masih a pabpangiseg kanu edsiap-siapan nu badan a su umpungan nu 'bpamaginugut. Papegkakapetan nin sia pakanggulalan kanu embuku-bukuan nu badan enggu kanu manga ugat taman sa pegkasela su entu sia kanu tabang'u Kadenan.
20 Kagina ka minatay kanu den a kaped'u Isa al-Masih na napukas kanu den kanu bagel'u di 'gkangailay a pegkamal kanu dunia. Na ngintu ka papedsakup kanu pamun enggu 'bpaginugutan nu pamun su manga atulan a 21 “Da kanu mami sa maya'i,” “Da kanu keman sa nia'i,” “Da kanu kemembil sa maitu'i?” 22 Na su langun nu nia na panduan bu nu manusia a makapantag bu kanu langun-taman a da bun katagan nin u mapasad'engka den musal. 23 Na amaika ilayn nengka bu mambu na mana mapia ka ibpamandu nilan i kasigel kanu kasangul kanu Kadenan, su kababa nu ginawa enggu su kabpelasay kanu ginawa. Ugaid'a nia nin man kabantang na da katagan nu langun nu entu ka dikena pakadtabang kanu taw sa kakumpen kanu ginawa nilan kanu kamamanusiay a kiug'u ginawa nilan.