Su Bagu a Uyag-uyag sia kanu Isa al-Masih
3
Kagina ka pinambibiag kanu den kaped'u Masih na nia nu paginapas na u ngin i lu sa sulega a nambetadan nu Masih a 'bpagagayan kanu kawanan nu Kadenan. 2 Nia nu bu pambalapantag kanu ginawa nu na su ngin i lu sa sulega dikena su ngin i sia kanu dunia 3 ka timbang a minatay kanu den man, na su uyag-uyag'u na lu den kanu Isa al-Masih lu kanu adapan nu Kadenan. 4 Na amaika ipayag den su Masih a 'gkabpunan nu uyag-uyag'u a da taman nin na makapayag kanu bun a pakaampit kanu sigay nin.5 Tembu ba luwas'u kanu ginawa nu su apia ngin a kaduduniay a galebek a mana su kadsina, su kaledsik'a atay, kanguda na ginawa, su manga mawag a kiug'u ginawa enggu su di kasukul. Ka su di kasukul na timbang a pedsimba sa balahala. 6 Na sabap kanu langun nu entu na makatingguma su lipunget'u Kadenan.a 7 Na kanu paganay na maitu bun ba i ukit a kabpaguyag-uyag'u. 8 Ugaid'a saguna na nasisita a luwasen nu su langun nu maitu ba a galebekan apeg den nu kalemu kasakit'a ginawa, kakalipunget, mawag a kahanda kanu ped'u, kapanila-tila enggu kadtalu a talampasa. 9 Da kanu den endalebut kanu apia entain sa lekanu ka linuwas'u den man su andang a ula-ula nu 10 ka nia nu den inisangan na su bagu a ula-ula a pembagun pamun sia luyud kanu alung-alung'u nangaden ka enggu nu katuntayan sa tidtu-tidtu u entain sekanin. 11 Na kagina ka binagu kanu den na dikena den balapantag u Yahudi ka atawa ka dikena, napaletak ka atawa ka dala, dala sabut'in a taw atawa ka dala atulan nin, ulipen ka atawa ka dikena ka nia den balapantag sa langun na su Isa al-Masih a sia sa lekitanu langun.
12 Na kagina ka pinamili kanu den nu Kadenan enggu sinuti kanu nin den a papedtayan nin na dait a isangan nu su ula-ula a kalat a nanam, kakalimu, kapangalimbaba sa ginawa, kananaw na kambitiala enggu katigkel. 13 Edsasabala kanu enggu apia entain i aden buku nin kanu ped'in na ampunen nin sa mana bun kanu kinaampun sa lekanin nu Mapulu. 14 Na nia masela na 'gkakalimua kanu ka nia ba i tidtu-tidtu a makapapagisa sa lekanu. 15 Na pandatu nu kanu ginawa nu su kalilintad a ebpun kanu Masih ka nia ba i kahanda nu Kadenan sa kinapamili nin sa lekanu a iniupaman nin sa sakabadan bu. Na tatap kanu edsukul-sukul.
16 Na itagu nu kanu ginawa nu sa senep sa atay su panduan nu Masih. Ipamandu nu su entu sa endaw taman i mapia a ukit a natuntayan nu enggu paingat'u su uman i isa sa di nilan kasibay. Edsengal kanu kanu Manga Sengalb taman kanu ped pan a sengal a kapugi kanu Kadenan sa aden kadsukul-sukul'in. 17 Na apia ngin i enggulan nu, magidsan pan i kadtalu atawa ka galebekan na enggula nu i entu sabap kanu ingala nu Mapulu a su Isa al-Masih. Na sia makanggulalan sa lekanin na edsukul-sukul kanu kanu Ama tanu a su Kadenan.
Su manga Kasuguan kanu manga Sakambinabatan a 'Bpaginugut kanu Isa al-Masih
18 Sekanu a manga babay na ibaba nu i ginawa nu kanu manga kaluma nu ka nia man ba i pakadait kanu Mapulu tanu. 19 Na sekanu menem a manga mama na ikalimu nu su kaluma nu, di nu silan kalipungeti ka makin nu silan 'bpia-piani.
20 Sekanu a manga wata, na paginuguti nu su manga lukes'u kanu apia ngin a edtalun nilan sa lekanu ka nia man ba i pakasuat sia kanu Mapulu.
21 Sekanu menem a manga lukes,c na da kanu enggula sa punan a kagkalubay na manggiginawa nu wata nu.
22 Sekanu a manga ulipen, na paginuguti nu su manga nadtalu a mapulu nu sa kanu apia ngin a edtalun nilan sa lekanu. Paginuguti nu silan sa dikena bu sa timpu a 'gkailay kanu nilan asal'a mapia i kailay nilan sa lekanu ugaid'a paginuguti nu silan sa senep sa atay a aden gilek'in kanu Mapulu. 23 Na apia ngin i enggalebeken nu na enggula nu sa senep sa atay a mana nia nu bun penggalebekan na su Mapulu, dikena su manusia. 24 Ka 'gkatawan nu bun i sia nu matalima kanu Mapulu a su Isa al-Masih su tidtu-tidtu a balas a ipebpusaka nin sa lekanu. Na sekanin su tidtu a penggalebekan nu. 25 Na apia entain menem a taw i penggula sa dikena mapia na dikena bun mapia i matalima nin a balas ka su Kadenan na di man mapambidaya.