4
Na sekanu menem a nadtalu a manga mapulu na inggay nu kanu manga ulipen nu su ngin i wagib enggu di nu silan mapambibidaya. Nia nu 'gkakalendem na apia sekanu na aden pan Mapulu nu a lu sa sulega.
Su Tutuma kanu 'Bpamaginugut
2 Na paginapas kanu mangeni-ngeni enggu tatap'u adil i ginawa nu sa kapangeni-ngeni nu sa aden kadsukul-sukul'in kanu Kadenan. 3 Iamung kami nu bun mangeni-ngeni sa mumbal su Kadenan sa ukit sa makapayag'ami kanu manga taw su nakapagena a kahanda nu Kadenan a su Isa al-Masih. Sabap bun sa nia ba i kinabilanggu ku saguna. 4 Ipangeni-ngeni nu bun i makapayag ku su entu sa mapia a mana bun su ngin i nakabpaliugat sa laki. 5 Na 'bpia-piani nu i palangay nu kanu manga taw a dikena 'bpamaginugut. Pamakuti nu i kadtabang'u kanilan sa katidtu nilan. 6 Na sia kanu kambibitiala nu kanilan na pakapia nu i sanad'a kadtalu nu a makapia kanu ginawa nilan ka enggu nu katawan u ngin i dait a isawal'u kanu apia ngin a idsa sa lekanu.
Su Mauli a Salam
7 Na si Tikikus bun den i mataw manudtul sa lekanu kanu ngin i makapantag sa laki sia. Isa bun sekanin a papedtayan a suled sa paginugut enggu 'gkasaligan a gumagalebek kanu Mapulu. Isa kami bu a ulipen nu Mapulu. 8 Na nia ba i sabap a kapapedsan ku sa lekanin ka enggu nu katawan su ngin i 'gkanggula nami sia taman sa makapagkabagel'in pan i manggiginawa nu. 9 Na nia nin kaped na si Unisimu a 'gkasaligan enggu papedtayan a suled tanu sa paginugut a sakadalepa nu bu. Na silan i manudtul sa lekanu makapantag sa langun na 'gkanggula nami sia.
10 Pedsalamen kanu ni Aristarkus a kaped ku bun sia a bilanggu enggu pedsalamen kanu bun ni Markus a wata magali ni Barnabas. Na makapantag kani Markus a nia na natalima nu den i katigan sa amaika makasan sekanin sa lekanu na edsakaw-sakaw nu sekanin. 11 Na pedsalamen kanu bun ni Isa a nia a bedtuan bun sa Hustu. Silan bu ba a nia i pagidsan ku a Yahudi a kaped ku sa kapebpayapat pantag kanu kapendatu nu Kadenan. Na masela gaid i tabang'ilan sa laki.
12 Pedsalamen kanu bun ni Ipapras a sakadalepa nu bu a isa bun a ulipen nu Isa al-Masih. Tatap kanu nin ibpangeni-ngeni sa senep sa atay sa 'gkabagel i tindeg'u enggu 'gkatua i paginugut'u taman sa makasigulu sa tidtu-tidtu i ginawa nu kanu ngin i kahanda nu Kadenan. 13 Na makadsaksi aku sa lekanu u endaw taman i kabpaginapas'in sabap sa lekanu apeg den nu 'bpamaginugut san sa Laudisia enggu Hirapulis. 14 Pedsalamen kanu bun ni Luk a papedtayan tanu a duktur apeg den ni Dimas.
15 Isalam aku nu bun kanu manga suled tanu sa paginugut san sa Laudisia, kani Nimpa taman den kanu umpungan nu 'bpamaginugut a pendidilimudan san sa walay nin. 16 Na u mapasad'u matia su sulat ku a nia sa lekanu na ipabatia nu bun kanu umpungan nu 'bpamaginugut sa Laudisia enggu sekanu menem na batia nu bun su sulat ku a entu kanilan. 17 Na edtalu nu bu san kani Arkipus a nan i papanalusen nin su galebekan a inisangan sa lekanin nu Mapulu.
18 Na saki a si Bulus i sinemulat mismu kanu nia ba a salam. Di nu bu 'bpelipatani i sia aku pamun samaya sa bilangguan. San sa lekanu su da idsan nin a limu nu Kadenan.
Wassalam