4
Na kagina ka maitu manga lusud ku sa tian a ipegkalimu ku, na sia luyud kanu pidtalu ku a entu sa lekanu na pagkabagel'u su tindeg'u sia kanu Mapulu tanu a su Isa al-Masih. Sangat man a 'gkagkalendem ku sekanu a papegkapia kanu ginawa ku enggu mana kanu bun man balas'u galebekan ku.
Su manga Ula-ula a Dait a Unutan
2 Na 'bpangenin ku kani Iyudia enggu Santika i papagisan nilan i itungan nilan sia kanu Mapulu. 3 'Bpangenin ku bun sa leka tidtu a tagapeda ku kanu galebekan i tabangi ka su dua kataw a nia a babay a naginapas bun temabang sa laki sa kapayapat kanu Mapia a Tutuma a kaped'i Kliminti enggu su ped pan a pedtabang kanu galebekan. Na natalatantu i nalusud bun su ngala nilan kanu libelu a sinulatan kanu mamakatalima sa uyag-uyag a da taman nin.
4 Na tatap kanu enggalaw-galaw sia kanu kapugi nu kanu Mapulu. Na edsalumanan ku edtalu sa lekanu i enggalaw-galaw kanu. 5 Ipayag'u kanu langun nu taw su kasabal'u ka masupeg den man su kambalingan nu Mapulu. 6 Di nu 'bpelidua i ginawa nu ugaid'a kanu apia ngin a manggula na makin nu ipangeni-ngeni kanu Kadenan. Isupeg'u sa lekanin u ngin i nasisita nu sa aden kadsukul-sukul'u lun 7 ka amaika maitu na inggay nu Kadenan sa lekanu su kalilintad a di matengkad'u itungan nu manusia sabap sa nalusud kanu kanu Isa al-Masih. Na entu ba i temiakap kanu pamusungan nu enggu kanu itungan nu.
8 Nia mauli sa entu manga lusud ku sa tian, na nia nu itagu sa pamusungan na su ngin i bantang atawa ka wagib, atawa ka makapapailay sa lekanu sa katulangedan enggu katidtu apeg den nu kalemek'a kambitiala taman sa u ngin i makasuat kanu madakel a taw labi den kanu Kadenan enggu kanu apia ngin a ula-ula a makapagkapia enggu makapedta. 9 Na inggulalan nu su ngin i napaganadan nu sa laki enggu su ngin i natalima nu atawa ka nakineg'u enggu nailay nu ka amaika maitu na mapalalayun sa lekanu su Kadenan a 'gkabpunan nu kalilintad.
Su Kinadsukul-sukul'i Bulus kanu Tabang a Inenggay sa lekanin
10 Na sangat a 'gkagalaw aku sa kapedsukul-sukul ku kanu Mapulu a su Isa al-Masih ka saguna na nadtabangan aku nu menem. Katawan ku i nauget kanu den pegkiug pedtabang sa laki ugaid'a dala bu 'gkatun nu a ukit. 11 Na dikena nia ku kapedtalu sa nia i pakanasisita aku pamun ka nia nin kabantang na migkataw aku den masukul sa u ngin i aden sa laki. 12 Magidsan pan i madakel sa paidu na migkataw aku lun maguyag-uyag. Migkataw aku masukul sa kanu apia ngin a timpu, magidsan pan i timpu na kanggutem atawa ka dikena udi na timpu na kadala enggu kaaden. 13 Na magaga ku man enggula su langun nu entu sia kanu tabang'u kaisa-isa nin a papegkabagel kanu ginawa ku. 14 Ugaid'a apia ka maitu na mapia gaid su kinatabang'u sa laki kanu timpu a pedtala aku sa kamalasayan.
15 Katawan nu bun i kanu kinaganat ku sa Masidunia, kanu timpu a bagu kanu pamun sa paginugut kanu Mapia a Tutuma na sekanu bu a manga taw sa Pilipi i tinemabang sa laki. Da den ped a lumpukan na 'bpamaginugut i tinemabang sa laki. 16 Na apia kanu lu aku pan sa Tisalunikaa na dikena bu nakaisa i kinapapait'u sa laki sa tabang. 17 Na dikena nia nin maena i 'gkapangingalap ku gaid i aden makaenggay nu sa laki ka nia ku 'gkapangingalap na kapangiseg'u palihala sa lekanu. 18 Saguna, na da den nasisita ku pan ka subela-subela pan su inipapait'u kani Ipapruditus kanu manga nasisita ku. Mana bun i nia mamut a kurban kanu Kadenan a sangat a 'gkasuatan nin. 19 Na su Kadenan a kawasa sa langun a pedsimban tanu i menggay sa lekanu kanu langun nu nasisita nu sia makanggulalan kanu Isa al-Masih.
20 Kanu Ama tanu a su Kadenan su langun nu pugi taman sa taman, amin.
21 Salam kanu uman i isa kanu suled tanu san a nasuti sabap kanu Isa al-Masih. Pedsalamen kanu bun nu manga tagapeda ku a nia a suled tanu bun sa paginugut, 22 enggu taman sa pedsalamen kanu bun nu langun nu ped pan a manga suled tanu sia a nasuti bun sabap kanu Isa al-Masih, labi lawan den kanu manga taw a nia kanu tulugan nu Sultan sa Ruma. 23 Na san sa lekanu su dala idsan nin a limu nu Mapulu tanu a su Isa al-Masih.
Wassalam