Su Ukit a Katalima nu Kadenan kanu Taw
3
Liu pan sa entu manga lusud ku sa tian na enggalaw-galaw kanu sia kanu kapugi nu kanu Mapulu. Dikena malegen sa laki i kasulat ku sa lekanu 'bpaluman kanu ngin i nalabit ku den sa lekanu kagina lekanu bun i entu a pangalaw. 2 Pangingati nu su manga taw a dupang a mana asu i ula-ula nin a nia nilan ipedtegel na kapapaletak asal kun na taliman nu Kadenan.a 3 Kagina nia nin kabantang na nia pedtaliman nu Kadenan na sekitanub a pedsimba sa lekanin sia makanggulalan kanu Ruh nin enggu nia nin ibpemamasela na su Isa al-Masih. Na dikena tanu nia pedsaligan su kabpagagama a dait kun a unutan 4 apia nia nin pan kaaden i mapakay a benal a saligan ku su entu. Ka amaika su ped a taw ka 'bpagitungen nilan i su kabpagagama i ibpemamasela nilan na labi aku den.5 Ka amaika paletak bu i embitialan na saki na pinaletak aku kanu ikawalu gay na kinagemaw ku,c tupu aku nu Israil sia kanu Buniamin enggu talanged aku a taw a Hibru.d U sia menem embitialan sa kasuguan nu Musa na inunutan ku su entu ka saki na lusud aku kanu lumpukan a Parisiyu.e 6 Na amaika sia menem embitialan sa kapaninindeg kanu agamaf na saki na namungkaid aku kanu 'bpamaginugut kanu Isa al-Masih. Na u sia menem agilen kanu kapenggulalan kanu manga kasuguan a dait kun a unutan asal'a makatimbang sa ikelas kanu Kadenan na dala kulang ku.
7 Ugaid'a su langun nu entu a nia ku lun kataw ka makagkapia sa laki na initimbang ku den sa da katagan nin sabap kanu Isa al-Masih. 8 Na dikena bu entu, ka apeg den nu langun pan na sia kanu ginawa ku na ipedtimbang ku den sa dala katagan nin sabap kanu da idsan nin a kapegkakilala ku kanu Isa al-Masih a Mapulu tanu. Na inendan ku kanu ginawa ku su langun-langun asal bu na maisa aku sa lekanin 9 enggu malusud aku lun. Na dikena aku initimbang'u Kadenan sa ikelas sabap kanu kapenggulalan ku kanu kasuguan ka initimbang aku nin sa ikelas sabap kanu salig ku kanu Isa al-Masih. Ka ipedtimbang'u Kadenan sa ikelas su taw sia makanggulalan kanu salig'in kanu Isa al-Masih. 10 Nia ku kiug na makilala ku sa tidtu-tidtu su Isa al-Masih a mana su kalangkap sa laki nu kabarakatan sia kanu kinapambibiag lun 'bpaluman enggu kaamung ku kanu kamalasayan nin. Pegkiugan ku i kailingan ku sekanin sia kanu kinapatay ning 11 ka aden a entu na malusud aku kanu manga taw a pambibiagen 'bpaluman nu Kadenan.
12 Na dikena nia nin maena i nakua ku den su entu atawa ka natalutup den i entu sa laki ka 'bpaginapasen ku pamun i kanggulalan kanu ngin i kahanda nu Isa al-Masih sa laki. 13 Manga lusud ku sa tian, dikena ku ipedtimbang i ginawa ku sa nakua ku den su entu ugaid'a nia balapantag sa laki na katagak ku kanu ngin i naipus ka nia ku paginapasen na su ngin i mauma pan. 14 Na mana bun su kapegkuya, na paginapasen ku i makauma aku kanu lumpakan ka enggu ku matalima su balas a inadil'u Kadenan kanu manga inenggat'in 'bpawang sa sulega sia makanggulalan kanu Isa al-Masih.
15 Na nia dait kanu apia entain sa lekitanu a matua den sa paginugut na maitu bun ba i pagitungen nin. Na amaika aden kapagitung'u a mana sakabias kanu pedtalun ku a nia sa lekanu na su Kadenan den i mapatuntay lun i entu sa lekanu. 16 Ugaid'a nia masela na u ngin i bantang a natuntayan tanu na papanalusen tanu su entu.
17 Manga lusud ku sa tian, edtatagapeda kanu miling sa laki, nia nu ilay na su manga taw a 'bpaguyag-uyag sia luyud kanu upaman a inenggay nami sa lekanu. 18 Kagina mana bun man su tatap a pedtalun ku sa lekanu paganay, na 'bpalumanan ku den menem edtalu sa lekanu a pakaigis i lu ku, sa madakel i pedsungkang kanu Mapia a Tutuma pantag kanu kinapatay nu Isa al-Masih kanu kayu a pinambalawaga. Ka sia kanu ukit'u kabpaguyag-uyag'ilan na inawan nilan sa katagan su entu. 19 Na silan ba a entu a manga taw na nia nin den kabpawangan na kanarakan. Nia nilan pegkakadenanen na su kiug'u ginawa nilan taman sa ibpemamasela nilan pan i kapenggula nilan sa kayayan ka nia nilan bu 'gkapagitung na su kaduduniay. 20 Na sekitanu na lu tanu nalusud kanu sulega a su 'gkabpunan nu 'bpagangapan tanu a 'bpamelipuas a su Isa al-Masih a Mapulu. 21 Na sia makanggulalan kanu kabarakat'in na 'gkandatuan nin su langun-langun. Na baluyn nin su badan tanu a nia a 'gkaledak kanu badan a di 'gkaledak a mana bun kanu badan nin sa kanu ulian nu kinambibiag'in 'bpaluman.