Su Papata sa Kababa na Ginawa
2
Na nia ku makaidsa sa lekanu saguna, na aden ba sa lekanu su kabagel'a manggiginawa sabap kanu Isa al-Masih enggu su kalilintad'u pamusungan sabap kanu limu nin? Ngintu, naisa kanu sia kanu Suti a Ruh, atawa ka aden ba sa lekanu su senep sa atay a kagkakalimua enggu lat a nanam? 2 Ka amaika aden sa lekanu su entu na makin nu papangiseg su kapegkagalaw ku sa ukit a kaisa na itungan nu. 'Gkakalimua kanu enggu papagisa nu su kahanda nu a mana kanu bun su edtetebped sa pused. 3 Da kanu enggula sa apia ngin a makagkapia bu kanu ginawa nu atawa ka makapulu nu i ginawa nu, ka makin nia nu enggula na ibaba nu i ginawa nu sa ukit a kapulu nu kanu ped'u. 4 Pagungayi nu sa u ngin i makagkapia kanilan, dikena sa kagkapia na ginawa nu bu.5 Na nia dait na maitu ba i ula-ula nu, a mana su palangay nu Isa al-Masih. 6 Sekanin na apia natatalanged sa lekanin su Kakadenan na da nin i entu usala sa lekanin a kapianan 7 ka nia nin pinggula na inibaba nin i ginawa nin enggu inisangan nin su kaulipen. Mimbaluy sekanin a manusia. Na sia kanu kinapaguyag-uyag'in sia sa dunia 8 na inibaba nin i ginawa nin ka mibpatiunut sekanin kanu kasuguan lun taman sa kapatay a mana su kinaimatay lun kanu kayu a pinambalawaga. 9 Na sabap sa entu na inipulu sekanin nu Kadenan kanu langun den nu mapulu taman sa inenggay nin lun su balapantag sa langun a ngala, 10 ka enggu sekanin sugiudan nu langun nu binaluy nu Kadenan magidsan pan i sia sa liwawaw na dunia enggu didalem'u lupa,a sampay den sa sulega, 11 taman sa di nilan ipamagena ka makin nilan edtalun i Mapulu su Isa al-Masih. Na kanu maitu ba na mapugi su Ama a su Kadenan.
Pagkalinawag'u su Dunia sia Luyud kanu Kapaguyag-uyag'u
12 Kagina ka maitu manga dua na suled, na mana bun su katatapan a penggulan nu a kabpaginugut, na makin nu paginapas i kanggula nu kanu entu sa aden gilek'in kanu Kadenan sa dikena bu sa timpu a kaped aku nu ka labi den sa saguna a dikena aku nu kaped. Ka amaika maitu na makapaguyag-uyag kanu sa makapailay sa inilipuas kanu den nu Kadenan. 13 Ka su Kadenan man i 'bpagenggay sa lekanu sa kahanda enggu kapegkagaga sa kanggula nu sa ngin i pakasuat sa lekanin.
14 Na sia kanu kanggula nu kanu apia ngin na da kanu embuku enggu da kanu 'bpapalawa 15 ka enggu di kanu katilan enggu ikelas kanu a nabaluy a manga wata nu Kadenanb kanu luk'u manga taw a pamakasibay sa saguna a timpu a sangat den i kadupang'in. Na mana kanu bun man su pamakatayaw a lu sa kawang-kawangan a pakagkalinawag kanu dunia sia kanu luk'ilan. 16 Na sabap sa ibpamamantag'u su kadtalu a pakaenggay sa uyag-uyag a da taman nin na makamamasela ku i dala kaawai na katagan su kinapaginapas ku sa lekanu sia kanu kambalingan nu Isa al-Masih. 17 Na upama menem ka makaigis i lugu ku a mana bun su ipegkurban a ipembubusc a kaped'u kurban nu a unga nu kabpaginugut'u na sangat a magalaw aku, magalaw aku kaped'u langun. 18 Na dait a maitu kanu bun ba, magalaw kanu bun kaped ku.
Su Dait a Ilingan nu 'Bpamaginugut
19 U miug su Mapulu a su Isa al-Masih na pasanen ku sa lekanu si Timuti ka makagalaw sa laki amaika aden mapanudtul'in sa laki pantag sa 'gkambebetad'u san. 20 Ka da den salakaw pan sa lekanin sia a senep sa atay i kabpagungaya nin sa lekanu sa mapia 21 ka su ped na nia nilan bu 'bpagitungen na su ginawa nilan, dikena kanu ngin i pakasuat kanu Isa al-Masih. 22 Na katawan nu bun u endaw taman i kinadtabang'i Timuti sa laki sa kinapayapat kanu Mapia a Tutuma ka mana nia nin bun pedtabangan na ama nin demun. 23 Na endaw demun i kataw ku sa kabpawangan na manggula ku sia na pasanen ku sekanin sa lekanu. 24 Ugaid'a aden salig ku kanu Mapulu sa di bun mauget na makasan aku bun sa lekanu.
25 Napagitung ku bun i nasisita a paulin ku san sa lekanu su suled tanu sa paginugut a si Ipapruditus a nasugu nu sa kasampay nu sa tabang'u sa laki sa kanu manga nasisita ku. Nadtagapeda ku bun sekanin sa galebekan enggu kanu kabpaninindeg kanu Mapia a Tutuma. 26 Na langun nu san na sangat a 'gkagkalendem'in gaid taman sa 'gkalidu i ginawa nin kagina natawan nu i dinemalu sekanin. 27 Na benal man a dinemalu sekanin taman sa paidu sama na matay ugaid'a mapia pan ka inikalimu sekanin nu Kadenan. Na dikena bu sekanin ka apeg ku, ka da den kaumani su lidu na ginawa ku. 28 Tembu 'gkalinian ku a benal i makapauli ku den sekanin san sa lekanu, ka enggu sa kailay nu sa lekanin 'bpaluman na mapia i ginawa nu, taman sa kakulangan bun mambu su lidu na ginawa ku. 29 Kagina ka maitu na kanu kauma nin san na edsakaw-sakaw nu sekanin sa mapia a aden kagalaw nin, ka suled tanu bun sekanin sa paginugut kanu Isa al-Masih. Na su taw a maya ba sa lekanin a nia na enggi nu sa alaga 30 kagina inisigkil'in su umul'in sa kinatabang'in sa laki a di nu 'gkanggula ka dala kanu sia, taman sa napaidusaman bun i umul'in sa kapenggalebek'in kanu galebekan pantag kanu Isa al-Masih.