Sulat kanu Manga Taw sa Pilipi
Su Salam
1
Salam sa lekanu, su nia a sulat na ebpun kanu ulipen nu Isa al-Masiha a si Bulus enggu si Timuti. San i nia pakatumpa sa lekanu a manga taw sa dalepa a Pilipi a nasuti sabap kanu Isa al-Masih taman den kanu manga pedtiakap enggu su 'gkangasaligan kanu 'bpamaginugut san. 2 San sa lekanu su da idsan nin a limu enggu su kalilintad a ebpun kanu Ama tanu a su Kadenan enggu kanu Mapulu tanu a su Isa al-Masih.Su manga Pangeni-ngeni ni Bulus kanu 'Bpamaginugut sa Dalepa a Pilipi
3 Uman ku sekanu ibpangeni-ngeni na pedsukul-sukul aku kanu Kadenan a pedsimban tanu. 4 Na sia kanu kabpangeni-ngeni ku na sangat a 'gkapia i ginawa ku 5 ka endaw demun i kinapaginugut'u kanu Mapia a Tutuma taman den saguna na 'bpagamungan aku nu sa kapebpayapat lun. 6 Na 'gkasisigulu ku i imasaden nu Kadenan su mapia a nia a galebekan a linudsuan nin san kanu uyag-uyag'u taman kanu kambalingan nu Isa al-Masih. 7 Na dait bun man a maitu i manggiginawa ku sa lekanu kagina sangat a ipegkalimu ku sekanu. Kaped ku sekanu kanu kabagel'u manggiginawa a inenggay nu Kadenan sa laki sa kabpaninindeg kanu Mapia a Tutuma enggu kanu kabpangimbenal lun taman den sa kinabilanggu ku saguna. 8 Su Kadenan i pakailay u endaw taman i kapegkalimu ku sa lekanu a mana bun su kapegkalimu nu Isa al-Masih.
9 Nia ku ibpangeni-ngeni sa lekanu na mangiseg pan su limu nu sia luyud kanu mapia a ilemu enggu katuntay kanu ngin i mawag enggu mapia. 10 Ka amaika maitu na katawan nu mamili u ngin i labi a mapia asal'a sia kanu kambalingan nu Isa al-Masih na matilak su atay nu enggu dala tila nu. 11 Ka kanu entu ba a gay na su ula-ula nu na ikelas den sia makanggulalan kanu Isa al-Masih. Na amaika maitu na 'gkapugi su Kadenan taman sa 'gkaenggan sekanin sa alaga.
Su Mapia a Unga nu Kinabilanggu ni Bulus
12 Manga lusud ku sa tian, papegkatawan ku sa lekanu i su kinabilanggu ku na makin den nakagkabagel kanu kapebpayapat kanu Mapia a Tutuma, 13 ka apia su langun nu pedtameng a sundalu nu Sultan sia enggu su langun nu ped pan a manga taw na natawan nilan i nia sabapan a kinabilanggu ku na lusud aku kanu Masih. 14 Sabap kanu nia a nanggula ku na madakel kanu manga lusud tanu sa tian i migkabagel i salig'in kanu Mapulu taman sa naawan silan na gilek sa kapebpayapat kanu kadtalu nu Kadenan.
15 Apia nia nin pan kabantang i aden ped a manga taw a matag 'bpangusiat na sabap bu sa kapedsekel enggu kapedsigia. Ugaid'a aden bun ped a mapia i kahanda nin kanu kabpangusiat'in pantag kanu Masih. 16 Na su silan ba a nia a 'bpangusiat sabap sa kakalimu nilan sa laki na katawan nilan i sinanganan aku sa kapaninindeg kanu Mapia a Tutuma. 17 Ugaid'a su silan menem a entu a 'bpangusiat pantag kanu Masih sa dikena senep sa atay na kapianan na ginawa nilan bu i 'gkapagitung'ilan. Na nia nilan 'gkapangingalap na panun i kalusak ku sia sa bilangguan. 18 Ugaid'a dikena den i entu balapantag, ka apia ngin pan a ukit, magidsan pan i senep sa atay atawa ka dikena senep sa atay na nia balapantag na makapangusiat su pantag kanu Masih. Na sabap sa entu na sangat a 'gkapia i ginawa ku.
Na enggalaw-galaw aku 19 ka sia makanggulalan kanu pangeni-ngeni nu enggu kanu tabang'u Isa al-Masih sia makanggulalan kanu Ruh nin a linemangkap sa laki na katawan ku i nia kabpawangan nu 'gkanggula ku a nia na kalipuasan ku.b 20 Na maitu bun ba, 'gkainam ku enggu 'gkapangingalap ku i di aku kayan kanu adapan nu Kadenan ka nia pan mula na kapatay pan sa kauyag na makin mapugi su Isa al-Masih sia kanu kapaninindeg ku lun a mana bun su katatapan. 21 Kagina sia sa laki na su kasangul bu kanu Isa al-Masih i enggulan ku taman sa bibiag aku, na amaika matay aku menem na kapianan ku pan i entu. 22-23 Ugaid'a amaika makapaguyag-uyag aku pamun na nia nin maena na makapatalus ku pan su galebekan ku taman sa makaunga pamun. Sangat a 'gkabad i itungan ku u ngin i pamilin ku, ka sia bu sa laki na nia ku kalilinian na madala aku den, ka ngin den i kapia nin u madtagapeda ku den su Isa al-Masih. 24-25 Ugaid'a 'bpaginugut aku sa sabap sa lekanu na nasisita ku pamun i makapaguyag-uyag aku. Tembu katawan ku i madtagapeda ku pamun sekanu langun asal'a su salig'u enggu su kapegkagalaw nu a unga nu kapedsalig'u na mangiseg pamun. 26 Na amaika maitu na mangiseg bun mambu su kapugi nu kanu Isa al-Masih sabap sa laki sia kanu kadtatagapeda tanu 'bpaluman.
Su Papata ni Bulus sa Kapaguyag-uyag sia Luyud kanu Mapia a Tutuma
27 Ugaid'a apia ngin i manggula na apas'u a benal i makapaguyag-uyag kanu sia luyud kanu ngin i makadait kanu Mapia a Tutuma makapantag kanu Isa al-Masih. Ka magidsan pan i makapagilaya tanu sa dili na katawan ku i nia ku makineg sa lekanu na mabagel i tindeg'u, taman sa di kanu 'bpipitas ka makin kanu pan maisa sa kapaninindeg kanu salig tanu kanu Mapia a Tutuma, 28 enggu dala ikagilek'u kanu manga taw a pedsungkang. Ka amaika maitu na entu ba i amadan sa kalipuasan nu enggu amadan menem i entu sa kanarakan nilan. Na su nia na su Kadenan bun i nabpunan nin 29 kagina inenggan kanu sa kapianan sa dikena bu kapaginugut kanu Isa al-Masih ka su kapianan sa kanggumalasayan sabap sa lekanin. 30 Na su 'gkatala nu a kamalasayan na mana bun su kinanggumalasayan ku a nailay nu, enggu su 'gkakineg'u saguna a 'gkatala ku a kamalasayan.