Su Papata kanu manga Wata enggu kanu manga Lukes
6
Sekanu a manga wata na paginuguti nu su manga lukes'u ka nia ba man i wagib sia kanu Mapulu a su Isa al-Masih. 2 Pagadati nu su ama nu enggu su ina nu. Ka nia ba man i muna-muna a kasuguan a aden pasad lun a 3 “Mapia i manggula-ula nengka enggu makapaguyag-uyag ka sa mauget.”a4 Sekanu menem a manga lukes,b na da kanu enggula sa punan a ikasakit'a ginawa nu wata nu. Makin nia nu enggula na pagkasela nu silan sa nia nu papaganadi kanilan enggu ipamandu kanilan na su ngin i sia luyud kanu Mapulu.
Su Papata kanu manga Ulipen enggu kanu manga Mapulu
5 Sekanu menem a manga ulipen na pagadati nu enggu paginuguti nu sa senep sa atay su nadtalu a mapulu nu sa mana bun nia nu 'bpaginugutan na su Masih. 6 Paginuguti nu silan sa dikena bu kanu timpu a 'gkailay kanu nilan asal'a mapia i kailay nilan sa lekanu ka paginuguti nu silan a isa kanu a ulipen nu Masih a 'bpaginugutan nin su ngin i kahanda nu Kadenan sa senep sa atay. 7 Enggalebek kanu sa aden kagalaw nu ginawa nu sa mana nia nu bun penggalebekan na su Mapulu a su Isa al-Masih, dikena su manusia. 8 Kagina katawan nu man i pembalasan nu Mapulu su apia entain a taw sa kanu apia ngin i penggulan nin a mapia, magidsan pan i ulipen atawa ka dikena. 9 Na sekanu menem a manga mapulu na maitu bun ba i pakaidi nu kanu manga ulipen nu, 'bpia-piani nu silan, di nu den silan mapakagileki. Ka nia nu 'gkakalendem na isa bu i Mapulu nu lu sa sulega, isa bu i kapegkailay nin sa lekanu.
Su Pangalaw nu 'Bpamaginugut kanu Sasat'u Saitan
10 Nia mauli sa entu na pakabagel kanu sia kanu Mapulu, kua nu su bagel a ebpun kanu kabarakat'in a da idsan nin. 11 Iselub'u su langun na ibpangalaw a inenggay nu Kadenan sa lekanu ka enggu di kanu maleseb'u Datu na Giadsal kanu manga akal'in. 12 Kagina dikena nia tanu man pakambunua su manga taw ka nia tanu pakambunua na su di 'gkangailay a pendatu enggu pegkamal kanu manga taw a sia pamun kanu kalibutengan taman den kanu langun pan na saitan. 13 Kagina ka maitu na iselub'u su langun na ibpangalaw a inenggay nu Kadenan sa lekanu asal'a makaatu kanu kanu timpu a semasat su Saitan. Na amaika adil kanu den sa kaatu nu kanu Saitan na di kanu katabanan. 14 Tembu pakabagel'u su tindeg'u! Ibpakut'u su bantang enggu iselub'u su kaikelasan a kelung'u laleb. 15 Idtalumpa nu su Mapia a Tutuma a pakapambalingan kanu taw kanu Kadenanc asal'a di kanu maudtang. 16 Na liu kanu langun nu entu, na isangan nu su kelung a su salig a pakaimatay kanu apuy nu langun nu pegkaleg a asad'u busug'u Datu na Giadsal. 17 Iselub'u bun su kalipuasan a kelung'u ulu enggu isangan nu su sundang'u Suti a Ruh a su kadtalu nu Kadenan. 18 Padtatap'u su kapangeni-ngeni nu kanu langun a dait pan a ibpangeni-ngeni sia luyud kanu tutulu nu Suti a Ruh apeg den nu langun nu 'bpangenin nu kanu Kadenan. Pangingati nu i makadtalipenda nu su kapangeni-ngeni nu kanu langun nu 'bpamaginugut. 19 Na ipangeni-ngeni aku nu bun sa uman ku ukan su ngali ku na su Kadenan i menggay sa laki sa kangadtalu ka enggu ku makapayag sa dala gilek'in su Mapia a Tutuma a nakapagena paganay. 20 Ka nasaligan aku man sa kapangusiat kanu Mapia a Tutuma tembu nabilanggu aku. Na ipangeni-ngeni nu i 'gkabagel i aki ku sa kapangusiat ku sa entu ka nia ba man i dait.
Su Mauli a Salam
21 Na si Tikikus a papedtayan tanu a suled tanu sa paginugut enggu 'gkasaligan a panunugun sia kanu galebekan pantag kanu Mapulu a su Isa al-Masih na sekanin i mataw manudtul sa lekanu kanu langun-langun nu 'gkanggula ku sia ka enggu nu katawan u ngin i 'gkambebetad ku enggu penggalebeken ku sia. 22 Na nia ba i sabap a kapapedsan ku sa lekanin ka enggu nu katawan u ngin i 'gkanggula nami sia enggu makapagkabagel'in pan i manggiginawa nu. 23 Na san sa lekanu a manga suled'ami sa paginugut su kalilintad, su kagkakalimua enggu su salig, na su langun nu entu na ebpun kanu Ama tanu a su Kadenan enggu kanu Mapulu tanu a su Isa al-Masih. 24 Na san sa lekanu a di pedtaman i kapegkalimu nin kanu Mapulu tanu a su Isa al-Masih su dala idsan nin a limu nu Kadenan.
Wassalam