5
Na kagina ka maitu na sabap sa nabaluy kanu den a wata nu Kadenan a ipegkalimu nin, na nia nu unuti na su ukit'in. 2 Paguyag-uyag kanu sa aden kagkakalimua nin kanu uman i isa a mana bun kanu kinakalimu nu Masih sa lekitanu ka ininggihad'in su umul'in sabap sa lekitanu a mana mamut a kurban kanu Kadenan a sangat a 'gkasuatan nin.Su Kapaguyag-uyag sia Luyud kanu Malinawag
3 Na nia wagib sa lekanu na di kanu katilan sa kadsina a galebek atawa ka apia ngin a maledsik a galebek atawa ka subela-subela a kapaginagkay kagina dikena i entu pakadait kanu taw a nasuti sabap kanu Isa al-Masih. 4 Di bun dait a makineg sa lekanu su katalampasa enggu da katagan nin a manga bitiala atawa ka kandadamangias sa dikena mapia ka nia dait a makineg sa lekanu na su kadsukul-sukul kanu Kadenan. 5 Ka katawan nu a benal i su manga taw a pedsina atawa ka maledsik i galebek'in enggu su di mangasukul na di malusud kanu kapendatu nu Kadenan enggu kanu Masih. Na timbang a pedsimba sa balahala su taw a di masukul. 6 Na di nu semuguti i makapasibay kanu nu apia entain a mategel demawa kanu manga maitu ba a galebekan a dikena mapia. Kagina sabap kanu manga maitu ba a galebekan na makatingguma su lipunget'u Kadenan kanu apia entain a pedsungkang sa lekanin. 7 Tembu da kanu temampung kanu maitu ba a manga taw. 8 Ka kanu paganay na su uyag-uyag'u na sia sa kalibutengan ugaid'a saguna na migkalinawag den su uyag-uyag'u sia kanu Mapulu a su Isa al-Masih. Na paguyag-uyag kanu a mana kanu manga taw a sia naluyud kanu kalinawagan. 9 Kagina nia unga nu kalinawagan na langun na mapia, kaikelasan enggu katidtu. 10 Na paganadi nu sa mapia u ngin i makasuat kanu Kadenan a Mapulu. 11 Da kanu magigiamung kanu da katagan nin a galebekan a naluyud kanu kalibutengan, ka nia pan mula na makin nu ipayangas su entu. 12 Ka apia su kalabit lun bu su ibpamagena a galebekan nilan na makaya den a benal. 13 Ugaid'a langun man na katayawan na malinawag na mapayangas sa mapia 14 kagina su malinawag i pakagkaliwanag kanu langun-langun. Tembu nadtalu i
“Seka a nan a pedtulug na gedam ka,
embangun ka kanu lebeng'engka,
ka makatayaw sa leka su Masih.”
15 Na pangingati nu sa mapia su ukit'u kapaguyag-uyag'u sa di makaluyud kanu manga taw a di mamakatuntay, ka lu makaluyud kanu manga taw a mamakatuntay sa mapia. 16 Pamakuti nu su kanggula nu sa mapia ka dikena den mapia i timpu saguna. 17 Kagina ka maitu na di nu 'bpagilingi su manga taw a di mamakatuntay ugaid'a nia nu tuntayi na su ngin i kahanda nu Mapulu.
18 Da kanu pendalangutan ka makabinasa i nia kanu uyag-uyag'u. Makin nia nu palangkap sa lekanu na su Suti a Ruh. 19 Na sia kanu kadtatagapeda nu na edsengal kanu kanu Manga Sengala taman kanu ped pan a sengal sa kapugi kanu Mapulu sa senep sa atay. 20 Na kanu apia ngin a manggula na tatap kanu edsukul-sukul kanu Ama tanu a su Kadenan sia makanggulalan kanu ingala nu Mapulu tanu a su Isa al-Masih 21 enggu ibaba nu i ginawa nu kanu uman i isa sa lekanu sabap kanu kabpagadat'u kanu Isa al-Masih.
Su Papata kanu 'Gkalumaya
22 Sekanu a manga babay na ibaba nu i ginawa nu kanu manga kaluma nu sa mana nia nu bun 'bpangalimbaban kanu ginawa nu na su Mapulu tanu a su Isa al-Masih. 23 Kagina su mama na sekanin su ulu nu kaluma nin a mana bun su Masih a ulu nu umpungan nu 'bpamaginugut a iniupaman kanu badan nin enggu sekanin mismu i 'bpamelipuas kanu entu. 24 Na mana bun su kabpangalimbaba nu umpungan nu 'bpamaginugut kanu ginawa nilan kanu Masih na maitu kanu bun ba a manga babay, dait a ipangalimbaba nu i ginawa nu kanu manga kaluma nu sa kanu apia ngin.
25 Na sekanu menem a manga mama na ikalimu nu su kaluma nu sa mana bun su kapegkalimu nu Masih kanu umpungan nu 'bpamaginugut. Ininggihad'in i umul'in sabap kanu umpungan nu 'bpamaginugut 26 ka enggu masuti sa ukit a kalimpiu nin kanu umpungan nu 'bpamaginugut sia kanu kadtalu nu Kadenan a mana tanu nin penggagasan sa ig. 27 Na pinggula nin su entu ka enggu nin makaadap sa lekanin su umpungan nu 'bpamaginugut sa ikelas a dala mailay nengka lun a budseng atawa ka apia ngin a maledsik ka nia nengka lun mailay na kasuti enggu dala tila nin. 28 Tembu ba sekanu a manga mama na wagib a ikalimu nu su kaluma nu sa mana bun su kakalimu nu kanu ginawa nu ka su mama a ipegkalimu nin su kaluma nin na mana nia nin bun ipegkalimu na su ginawa nin. 29 Ka dala man taw a di nin kalilinian i badan nin ka nia pan mula na uyagen nin sa mapia taman sa 'bpia-pianan nin sa mana bun kanu kapebpia-pia nu Masih kanu umpungan nu 'bpamaginugut 30 ka timbang a sakabadan tanu nin bu. 31 Entu ba i sabap'in ka pitasen nu mama su ama nin enggu su ina nin ka idtampung'in su kaluma nin sa mana sakabadan bu silan.b 32 Na su nia ba a nakapagena paganay a inipayag den na sangat i kabalapantag'in ka pantag i nia kanu Masih enggu kanu umpungan nu 'bpamaginugut. 33 Ugaid'a apia ka maitu na nakawagib sa lekanu a manga mama i ikalimu nu su kaluma nu sa mana bun kanu kakalimu nu kanu ginawa nu. Na su babay menem na wagib a pagadatan nin su kaluma nin.