Su Kinaisa nu 'Bpamaginugut sia kanu Isa al-Masih
4
Kagina ka maitu na saki a nia a nabilanggu sabap kanu kabpangusiat ku pantag kanu Mapulu tanu a su Isa al-Masih na 'bpangenin ku sa lekanu sa tidtu-tidtu i paguyag-uyag kanu sa ukit a kapaguyag-uyag'u taw a pinamili nu Kadenan. 2 Dait a aden sa lekanu su kababa na ginawa, kananaw na kambitiala, katigkel enggu kadtutuntaya sa aden kagkakalimua nin. 3 Paginapas'u i mapalalayun nu su kapamagisa-isa a ebpun kanu Suti a Ruh sia makanggulalan kanu kapaguyag-uyag'u sa malilintad a pakasaumpung sa lekanu. 4 Ka mana bun su kinabaluy sa lekitanu a 'bpamaginugut sa sakabadan bu enggu isa bu i Suti a Ruh a natalima tanu na maitu bun ba na isa bu i inam tanu sa kanu kinapamili sa lekitanu nu Kadenan. 5 Isa bu i Mapulu tanu, isa bu i salig tanu enggu isa bu i inisalawat sa lekitanu. 6 Isa bu i Kadenan tanu a Ama tanu langun. Sekanin i pegkakataw sa lekitanu langun, su galebek'in na sia pakanggulalan kanu apia entain sa lekitanu enggu lalayun sekanin sia sa lekitanu.7 Na uman i isa sa lekitanu na inenggan sa kapegkagaga sia luyud kanu ngin i inenggay nu Masih. 8 Na nakadalem i nia sia kanu kitab a
“Kanu kinapangimpulu nin na aden inenggay nin kanu manga taw nin enggu pidtapik'in su nangataban nin.”a
9 Na entu pan ka nadtalu a “nangimpulu sekanin” na nia nin maena na nangalimbaba muna sia sa lupa.b 10 Na su sekaninc a entu a nangalimbaba na sekanin bun mismu su nangimpulu lu kanu pulu pan nu langit asal'a masakup'in su sakadunia. 11 Na inenggan nin sa kapegkagaga su uman i isa, su ped na binaluy nin a mapanunugu nin, su ped menem na binaluy nin a nabi a makapayag kanu kadtalu nin, su ped na binaluy nin a makapayapat kanu Mapia a Tutuma, su ped na binaluy nin a makatiakap kanu umpungan nu 'bpamaginugut enggu makapamandu kanu kadtalu nu Kadenan. 12 Na pinggula nu Isa al-Masih su entu ka enggu maadil su manga nasuti sa kanggalebek sia sa lekanin ka enggu 'gkabagel su iniupaman sa badan nu Isa al-Masih a su umpungan nu 'bpamaginugut. 13 Na amaika maitu na maisa tanu sia kanu salig tanu enggu katuntayan sa mapia u entain su Tunggal'u Kadenand asal'a 'gkatua tanu sa paginugut taman sa talutup i kailing tanu kanu Masih. 14 Na amaika maitu na dikena tanu den mana wata a manaut a malemu kapagakalan a mana su laun a apia endaw masugat'u sambel na lu menem makabayug. Na di tanu den kadulatan atawa ka kapagakalan nu manga taw a tagakalen kanu panduan nilan a di pakatidtu 15 ka makin nia tanu enggulan na edtalu sa bantang sa ukit a aden kakalimu nin. Na kanu maya ba a ukit na 'gkatua tanu sa paginugut taman sa nia tanu kailingan kanu langun nu galebek tanu na su Isa al-Masih a ulu tanu. 16 Na sabap sa lekanin na pegkasela su badan a pinagkakapeta nin atawa ka pinadsusumpat'in su manga embuku-bukuan enggu ugat a papegkabagel kanu edsiap-siapan nu badan. Na sia kanu kadtabed'u uman i edsiap-siapan nu badan na 'gkabagel su badan a su umpungan nu 'bpamaginugut sia makanggulalan kanu kagkakalimua tanu.
Su Kambagu sia kanu Isa al-Masih
17 Na sia kanu bagel a inenggay nu Mapulu sa laki na ipebpaliugat ku sa lekanu i da kanu den maguyag-uyag a mana su kapaguyag-uyag'u manga taw a di 'bpamaginugut kanu Kadenan. Ka su nia a manga taw na da katagan nin su ukit a kapagitung'ilan 18 enggu naawan silan na katuntay kanu ngin i mapia. Da silan makaamung kanu uyag-uyag a ibpagenggay nu Kadenan sabap kanu kada na sabut'ilan enggu su kategas'u pamusungan nilan. 19 Naawan den silan na kaya taman sa nia nilan bu kalinian enggula na su kanguda na ginawa enggu da den pinda nin i kapenggula nilan sa embalang-balang a maledsik a galebek. Na kabpapangilay na ginawa nilan a benal su entu.
20 Ugaid'a sekanu na dikena maitu i nasabutan nu kanu Masih. 21 Na 'gkadsisigulu ku i nakineg'u den su makapantag kanu Isa al-Masih taman sa napamandu kanu kanu entu sia luyud kanu bantang a sia sa lekanin. 22 Na nia inipamandu makapantag kanu danden a ukit a uyag-uyag'u na dait a luwasen su andang a ula-ula nu a nabinasa den sabap kanu manga kiug'a ginawa nu a pakapasibay sa lekanu. 23 Dait a ipabagu nu su ukit a kapagitung'u 24 ka nia nu isangan na su bagu a ula-ula a pinangaden sia luyud kanu alung-alung'u Kadenan a ikelas enggu matidtu sia luyud kanu bantang.
25 Kagina ka maitu na tagaken tanu den su kabudtud ka nia tanu bu kambitiala kanu ped tanu na bantang kagina mana tanu bun sakabadan. 26 Na amaika malipunget kanu na ingati nu i makandusa kanu. Di nu mapasaut sa kasedepan na senang su lipunget'u 27 enggu di nu menggi sa ukit su Datu na Giadsal sa masasat kanu nin. 28 Su tanegkawn na di den manegkaw ka makin mamantiali sa mapia ka enggu aden bun makadtabang'in kanu manga pakanasisita. 29 Da kanu edtalu sa apia ngin a mawag ka nia nu bu edtalu na endaw bu i makadtabang enggu makagkabagel ka entu ba i makagkapia kanu 'bpamakikineg. 30 Di nu menggi sa lidu na ginawa su Suti a Ruh nu Kadenan a inenggay nin sa lekanu a tanda sa nalusud kanu den kanu Kadenan taman kanu gay a matalutup den su kinalipuas'in sa lekanu. 31 Iawa nu su sakit'a ginawa, su lipunget, su kapegkagkaga enggu su kapanila-tila taman den kanu langun na mawag pan a kahanda kanu ped'u. 32 Ka makin nia nu enggula na pagkapia nu i palangay nu enggu lati nu sa nanam i uman i isa sa lekanu. Pamagampuna kanu a mana su kinaampun nu Kadenan sa lekanu sia nakanggulalan kanu Isa al-Masih.