Su Kahanda nu Kadenan kanu manga Dikena-Yahudi
3
Na sabap sa entu, na saki a nia a si Bulus a nabilanggu sabap kanu kabpangusiat ku makapantag kanu Isa al-Masih sia kanu kapianan nu a manga dikena-Yahudi na ibpangeni-ngeni ku sekanu. 2 Saben-sabenal i nakineg'u den su pantag kanu kinasalig'u Kadenan sa laki sa kapayag kanu da idsan nin a limu nin sa lekanu. 3 Na sia nakanggulalan kanu kinapayag sa laki nu Kadenan na pinakatawan nin sa laki su nakapagena a kahanda nin a mana bun su nalabit ku a entu sa lekanu. 4 Na kanu kabatia nu kanu nalabit ku a entu na katawan nu u ngin i kadalem'u katuntay ku kanu nakapagena a kahanda pantag kanu Masih. 5 Na dala i nia makapayag kanu manga nangauna a manga taw ugaid'a saguna na inipayag den kanu manga pinamili a sinugu nu Isa al-Masih enggu kanu manga nabi sia nakanggulalan kanu Suti a Ruh. 6 Na su nakapagena a nia a kahanda nu Kadenan na lusud su manga dikena-Yahudi kanu manga pebpusakan nu Kadenan enggu mana sakabadan bu silan sia kanu Kadenan. Lusud silan kanu inibpasad'u Kadenan sabap kanu kinaisa nilan kanu Isa al-Masih sia nakanggulalan kanu Mapia a Tutuma.7 Na sabap kanu da idsan nin a entu a limu nu Kadenan a inenggay nin sa laki na sia nakanggulalan kanu kabarakat'in na binaluy aku nin a makapangusiat kanu Mapia a Tutuma. 8 Na apia saki i mababa den sa langun kanu 'bpamaginugut na inikalimu aku nu Kadenan sa kinasangan nin sa laki sa kapangusiat ku kanu manga dikena-Yahudi pantag kanu da kapegkapupus'in a palihala sia kanu Isa al-Masih. 9 Inisangan nin bun sa laki su kapatuntay ku sa mapia kanu langun nu manga taw kanu nakapagena sa nauget den a gay a kahanda nu Kadenan a nangaden kanu langun-langun. 10 Na nia nin kahanda sa kinasangan nin sa laki sa entu na asal'a sia makanggulalan kanu umpungan nu 'bpamaginugut na kaimamanan nu langun nu di 'gkangailay a pegkamal enggu aden manga bagel'in su ilemu nu Kadenan a 'gkapayag sa madakel a ukit. 11 Na iganat pan sa ganatan na kahanda den i entu nu Kadenan. Na tinuman nin den i entu sia nakanggulalan kanu Mapulu tanu a su Isa al-Masih. 12 Na kagina ka nalusud tanu sa lekanin na makasupeg tanu den kanu Kadenan sa dala geda-geda nin sia makanggulalan kanu kapedsalig tanu kanu Isa al-Masih. 13 Tembu 'bpangenin ku sa lekanu i di nu mapagkalubay i manggiginawa nu sabap kanu kamalasayan a 'gkatala ku saguna sabap sa lekanu ka lekanu i nia ba a kapianan.
Su Kabpangeni-ngeni ni Bulus kanu manga Taw sa Ipisu
14 Na entu ba i sabap'ina i pedsugiud aku 'bpangeni-ngeni sa lekanu kanu Ama tanu a su Kadenan 15 a nabpunan nu langun nu sakambinabatan sia sa dunia taman den kanu langun nu aden lu sa sulega. 16 Na ibpangeni-ngeni ku i sia luyud kanu da kapegkapupus'in a palihala nu Kadenan na pagkabagelen nin su atay nu sia makanggulalan kanu Suti a Ruh nin 17 taman sa mapalalayun kanu atay nu su Masih sia makanggulalan kanu kasalig'u sa lekanin. Na endalig enggu metu sa lekanu su limu 18 ka enggu nu katuntayan sa tidtu-tidtu apeg'u ped pan a sinuti u endaw taman atawa ka ngin i kaulad enggu kadalem'u 19 limu nu Masih a di magaga magitung'u manusia ka enggu talutup sa lekanu su kaikelasan nu Kadenan.
20-21 Na kanu Kadenan su pugi taman sa taman sabap kanu langun nu penggulan nin sia kanu umpungan nu 'bpamaginugut a sia pakanggulalan kanu Isa al-Masih. Sekanin i pakagaga 'bpangenggay kanu lawan pan kanu ngin i 'bpangenin tanu atawa ka 'gkangguniat tanu sia makanggulalan kanu kabarakat'in a sia sa lekitanu. Amin.