Su Bagu a Uyag-uyag sia kanu Isa al-Masih
2
Na kanu paganay na timbang a minatay kanu sabap kanu manga kapedsungkang'u enggu kanu manga kabaladusan nu. 2 Nia nu inunutan na su ukit'u manusia a kaduduniay enggu nia nu pinaginugutan na su kiug'u Saitan a datu nu di 'gkangailay.a Sekanin bun i pendatu kanu pamusungan nu manga taw a di 'bpamaginugut kanu Kadenan. 3 Na langun tanu na maitu tanu bun ba kanu paganay, nia tanu bun 'bpaginugutan na su kamamanusiay a kiug'u ginawa, penggulan tanu su mawag a 'gkagkahanda tanu enggu 'gkapagitung tanu. Na sabap sa nakaandang i entu sa lekitanu na mana bun su ped a taw na nalusud tanu kanu nanget a lipunget'u Kadenan. 4 Ugaid'a sabap kanu 'bpamelapay a limu nu Kadenan enggu su da idsan nin a lat a nanam'in sa lekitanu 5 na pinambibiag tanu nin 'bpaluman kaped'u Isa al-Masih kanu timbang a kinapatay tanu sabap kanu kinasungkang tanu sa lekanin. Na inilipuas tanu nin sabap kanu da idsan nin a limu nin. 6 Na sia kanu kinaisa tanu kanu Isa al-Masih na nakaunut tanu kanu kinapambibiag lun 'bpaluman nu Kadenan taman sa nalusud tanu kanu kinapaayan lun lu sa sulega. 7 Na pinggula nin i entu ka enggu nin makapailay sia kanu mangauma pan a timpu su da idsan nin a 'bpamelapay a limu nin enggu su kapianan nin sa lekitanu sia nakanggulalan kanu Isa al-Masih. 8 Ka inilipuas tanu nin sabap kanu da idsan nin a limu nin sia nakanggulalan kanu kapedsalig tanu. Dikena i nia sabap kanu ngin i pinggula tanu ka saben-sabenal a su Kadenan i minenggay lun i nia sa lekitanu 9 ka amaika maitu na di makadsandag'u uman i isa i sabap i entu kanu kapegkagaga nin. 10 Ka sekanin mismu i nangaden sa lekitanu 'bpaluman sia kanu kinaisa tanu kanu Isa al-Masih. Na pinggula nin su entu ka enggu tanu kaunutan su manga mapia a pigkahanda nin sa lekitanu kanu nangauna pan a timpu.Su Kinaisa nu Yahudi enggu Dikena-Yahudi sia kanu Isa al-Masih
11 Na kagina ka maitu na su sekanu a pimbata a dikena-Yahudi na nia nu 'gkakalendem na u ngin kanu kanu paganay. Pedtawagen kanu sa dikena paletakb nu manga taw a pedsandag sa napaletak silan a su manga Yahudi. (Ugaid'a nia nin kabantang na su kapebpaletak'ilan na adat bu i entu a penggulan kanu lawas'ilan.) 12 Na kanu paganay a entu na di nu pan katawan su Isa al-Masih. Da kanu pamun masakup'u manga kapasadan a inibpasad'u Kadenan kagina dikena kanu lusud kanu manga taw nin a Israil. Na 'bpaguyag-uyag kanu sia sa dunia sa da inam'in ka da pan sabut'u kanu Kadenan. 13 Ugaid'a saguna, na sia kanu Isa al-Masih na su sekanu a nakatangka kanu Kadenan paganay na nakasupeg kanu den sia nakanggulalan kanu lugu nu Isa al-Masih.c 14 Na sekanin demun i napapamagayun sa lekitanu, sekanin i napapagisa kanu Yahudi enggu dikena-Yahudi. Iniawa nin su kaitem'a atay nilan a mana lending a nakapagelet a sabapan na kinabpitas'u duakambala a entu. 15 Ka sia nakanggulalan kanu kinanggihad'in kanu umul'in na inawan nin sa bisa su pangitaban nu manga Yahudi a nia nin dalem na embalang-balang a kasuguan nilan ka enggu mabaluy su duakambala a entu sa mana bagu a pinangaden sia sa lekanin. Na kanu maya ba a ukit na naaden su kapamagayun. 16 Na sia bun nakanggulalan kanu kinapatay nu Isa al-Masih kanu kayu a pinambalawaga na nakapambalingan nin kanu Kadenan su duakambala a entu ka inisa nin silan a mana sakabadan bu sia kanu Kadenan taman sa iniawa nin su kaitem'a atay nilan. 17 Na sinemia su Isa al-Masih ka inipangusiat'in su Mapia a Tutuma makapantag kanu kapambalingan kanu taw a nadtalu a nakatangka kanu Kadenand enggu kanu manga nadtalu a masupeg kanu Kadenan. 18 Sabap kanu Isa al-Masih na isa bu i kapegkasupeg tanu kanu Ama tanu a su Kadenan sia makanggulalan kanu kaisa-isa nin a Ruh nu Kadenan.
19 Na nia nin maena na dikena kanu den salakaw kanu manga taw nu Kadenan ka kaped kanu den kanu manga nasuti sabap kanu Isa al-Masih enggu nalusud kanu den kanu manga taw nin. 20 Na sekitanu a 'bpamaginugut na mana tanu walay, na nia tanu palaus na su manga sinugu nu Isa al-Masih enggu su manga nabi. Na su Isa al-Masih i udsadan nu palaus'u walay a balapantag sa langun. 21 Sekanin i papegkapeta kanu langun nu edsiap-siapan nu walay enggu sekanin bun i papegkaulad kanu entu taman sa mabaluy a Suti a 'Bpagagaman kanu Mapulu. 22 Na sabap sa nalusud kanu den kanu Isa al-Masih na isa kanu den kanu papegkakapetan a entu a su pegkalebenan nu Kadenane sia makanggulalan kanu Ruh nin.