Ipisu 1

Sulat kanu Manga Taw sa Ipisu

Su Salam

Salam sa lekanu. Su nia a sulat na ebpun sa laki a si Bulus a sinugu nu Isa al-Masih sia luyud kanu kahanda nu Kadenan. San i nia pakatumpa sa lekanu a manga taw sa Ipisu a 'bpamaginugut kanu Isa al-Masih a nasuti sabap sa lekanin. 2 San sa lekanu su da idsan nin a limu enggu su kalilintad a ebpun kanu Ama tanu a su Kadenan enggu kanu Mapulu tanu a su Isa al-Masih.

Su Palihala a dikena Matakapala a sia Nakanggulalan kanu Isa al-Masih

3 Su Kadenan a Ama nu Mapulu tanu a su Isa al-Masih a Kadenan nin bun na sangat a pebpugin. Na pinalihalan tanu nin kanu langun nu embalangan na palihala a dikena matakapala a ebpun sa sulega a sia luyud kanu Suti a Ruh nin. Na pinggula nin i entu sabap kanu kinaisa tanu kanu Masih 4 ka unan pan nu kinapangaden kanu dunia na pinamili tanu nin den sia kanu Isa al-Masih ka enggu tanu maikelas enggu di katilan sia kanu adapan nin. Sabap kanu limu nu Kadenan 5 na pigkahanda nin kanu paganay pan i mabaluy tanu a manga wata nin sia makanggulalan kanu Isa al-Masih sia luyud kanu kahanda nin a pakasuat sa lekanin. 6 Dait a benal a pugin su Kadenan kanu da idsan nin a limu nin a inenggay nin sa lekitanu sa maluwag sia kanu kinaisa tanu kanu kaisa-isa nin a ipegkalimu nin. 7 Na sia kanu kinaisa tanu sa lekanin na naaun tanu sia nakanggulalan kanu kinatuga nu lugu nin. Naampun su manga kabaladusan tanu sia luyud kanu da idsan nin a limu nu Kadenan a di 'gkapupus. 8 Na 'bpamelapay su kinaenggay nin sa entu sa lekitanu. Na sia kanu tidtu-tidtu a ilemu nin enggu katuntay 9 na inipayag'in sa lekitanu su nakapagena a kahanda nin sia luyud kanu ngin i pakasuat sa lekanin a pigkahanda nin sia kanu Isa al-Masih. 10 Na nia nin kahanda na u mauma den su timpu a katalutup kanu langun-langun, na saumpungen nin su langun na pinangaden nin kanu langit enggu lupa a nia lun endatu na su Masih. 11 Na napamili kami a taw nu Kadenan sia nakanggulalan kanu kinaisa nami kanu Isa al-Masih. Na kanu paganay pan na pigkahanda den i entu nu Kadenan a penggula kanu langun-langun sia luyud kanu ngin i kiug'in. 12 Na nia nin kahanda na mapugi sekanin kanu kasela nu kapegkagaga nin sabap sa lekami a nauna sinemalig kanu Masih. 13 Na maitu kanu bun ba, guna nu makineg su bantang a katigan a su Mapia a Tutuma a makapalipuas sa lekanu taman sa naginugut kanu kanu Isa al-Masih na inenggay nu Kadenan sa lekanu su Suti a Ruh a mana bun su inibpasad'in. Na namba i tanda sa sekanin den i kigkuan sa lekanu. 14 Na inenggay nin i entu a pamagel tanu sa inggay nin sa lekitanu su ipebpusaka nin kanu gay a katalutup'in kanu kabpelipuas'in sa lekitanu a manga taw nin. Na pugin su Kadenan kanu kasela nu kapegkagaga nin!

Su Pangeni-ngeni ni Bulus

15 Na sabap kanu entu enggu su kinakineg ku pantag kanu kapedsalig'u kanu Isa al-Masih a Mapulu enggu su kapegkalimu nu kanu langun na nasuti sabap sa lekanin 16 na tatap aku pedsukul-sukul kanu Kadenan enggu ibpangeni-ngeni ku 17 i su a Barakat sa Langun a Kadenan nu Mapulu tanu a su Isa al-Masih na enggan kanu nin sa ilemu a ebpun kanu Suti a Ruh enggu ipayag'in sa lekanu u entain sekanin ka enggu nu sekanin katawan sa tidtu-tidtu. 18 Ibpangeni-ngeni ku bun i bukatan nu Kadenan su pamusungan nu ka enggu nu katuntayan sa mapia su inam kanu kinapamili nin sa lekanu enggu ngin i kasela nu palihala a inibpasad'in kanu manga taw a nasuti sabap kanu Isa al-Masih. 19 Na ibpangeni-ngeni ku i patuntayan nin sa lekanu u ngin i dala idsan nin a kabarakat'in a makadtabang sa lekitanu a 'bpamaginugut. Isa bu i nia kanu kabarakat a inusal'in 20 kanu kinapambibiag'in 'bpaluman kanu Isa al-Masih enggu su kinapaayan nin lun sia kanu kawanan nin lu sa sulega. 21 Inipulu nin su Isa al-Masih kanu langun nu pegkamal enggu langun nu aden manga bagel'in a di 'gkangailay taman sa inenggay nin lun su ingala a da makalawan lun i kapulu nin sa dikena bu sa saguna a timpu ka taman sa taman. 22 Binaluy sekanin a pegkakataw kanu langun-langun enggu sinanganan sa kapanguluan nin su langun-langun sia kanu umpungan nu 'bpamaginugut 23 a iling-iling'u taw na entu ba i timbang a badan nu Isa al-Masih enggu 'bpelangkap su ngin i aden sa lekanin kanu entu a badan nin a su umpungan nu 'bpamaginugut taman den kanu langun nu pinangaden.