6
Manga lusud ku sa tian, apia entain i mailay nu a nasasat a taw, na sekanu a pendatuan nu Suti a Ruh na patidtu nu sekanin sa malalanat demun a ukit. Na pangingati nu bun i di kanu makalalagit masasat. 2 Edtatabanga kanu kanu mangaugat a lidu na ginawa, ka kanu maya ba a ukit na pakanggulalan nu su inisugu nu Masih. 3 Na amaika aden sa lekanu i nia nin 'gkapagitung na balapantag sekanin kumin kanu ped'in inunta na dikena bun menem na su entu a taw na pedsalimbuten nin i ginawa nin. 4 Na ilayn tanu man muna su manga penggalebeken tanu ka enggu tanu mailay u aden makamamasela tanu kanu ginawa tanu. Ugaid'a di tanu den padsulagidan su ginawa tanu kanu ped a taw. 5 Kagina uman i isa sa lekitanu na nakabpaliugat lun su kapananggit'in kanu ngin i nakasangan lun a galebekan.6 Na su 'bpamandu kanu kadtalu nu Kadenan na dait a umunan sekanin nu 'bpamandun nin kanu langun nu 'gkatalima nin a kapianan. 7 'Gkambudtudan nu i ginawa nu amaika nia nu kataw na kapagakalan nu su Kadenan ka apia ngin man i inipamula nu taw na entu bun ba i masabpet'in 8 kagina su taw a nia nin inipamula na su kamamanusiay na nia nin masabpet na su kabinasan. Ugaid'a su taw a nia nin inipamula na su ngin i luyud kanu Suti a Ruh na nia nin masabpet na su uyag-uyag a da taman nin a ebpun kanu Suti a Ruh. 9 Na dait man a di tanu masemu sa kanggula sa kapianan ka aden bun gay a masabpet tanu su entu amaika di tanu semangkup. 10 Tembu taman a pakagaga tanu pamun sa kanggula sa kapianan kanu apia entain na enggulan tanu su entu, labi den kanu manga suled tanu sa paginugut.
Su Mauli a Papata
11 Iganat sia ba na da ku den isalig i kinasulat ku lun ka saki demun i sinemulat sa nia. Ilay nu su kasela na batang a inusal ku.
12 Nia man a nan pebpeges sa lekanu sa kapapaletak'u na su manga taw a pegkiug pebpagilay sa maliwawaw a kapianan, kagina 'gkagilekan silan sa kapamungkaidanan amaika ipangusiat'ilan i aden uyag-uyag tanu a da taman nin sabap kanu kinapatay nu Masih kanu kayu a pinambalawaga. 13 Na apia man su manga taw a napaletak na dikena nilan bun pakanggulalan su langun nu kasuguan. Ugaid'a pebpegesen kanu nilan sa kapapaletak'u asal'a makamamasela nilan i entu. 14 Ugaid'a saki na da makamamasela ku nia tabia na su kinanggihad'u Mapulu tanu a su Isa al-Masih kanu ginawa nin lu kanu kayu a pinambalawaga. Kagina sia nakanggulalan kanu pinggula nin a entu na napukas aku den kanu kasuguan sia sa dunia enggu su kasuguan a nia na da den katagan nin sa laki. 15 Dikena den balapantag i napaletak tanu atawa ka dala, ka nia den balapantag na binagu tanu den. 16 Na su sekanu a 'bpaguyag-uyag sia luyud kanu nia ba a pidtalu ku na san sa lekanu su kalilintad enggu su tabang'u Kadenan a malimu taman den kanu langun pan a 'bpamaginugut kanu Kadenan.a
17 Na iganat saguna na di nu den 'bpelunsani su kamalasayan ku, ka madakel den i baneg kanu lawas ku a amadan sa kabpaginugut ku kanu Isa al-Masih.
18 Manga lusud ku sa tian, na san sa lekanu su da idsan nin a limu nu Mapulu tanu a su Isa al-Masih. Amin.
Wassalam