5
Na su baya-baya a nia na inenggay nu Masih sa lekitanu asal'a makambaya-baya tanu. Tembu pakabagel'u i tindeg'u ka da kanu den a benal mapaulipen 'bpaluman.Su Tidtu a Ukit sa Kambaya-baya
2 Tanudi nu! Saki si Bulus a pedtalu demun sa lekanu sa amaika mapapaletak kanu na inawan nu sa katagan su kinanggihad'u Masih kanu ginawa nin. 3 Na edtalun ku menem sa lekanu 'bpaluman i apia entain i mapapaletak sabap kanu agama nu manga Yahudi na makabpaliugat lun su kanggulalan nin kanu langun nu kasuguan. 4 Na su 'bpaginapas sa makatimbang sa ikelas sia makanggulalan kanu kasuguan na inipitas'in i ginawa nin kanu Masih enggu tinagak'in su da idsan nin a limu. 5 Ugaid'a sekitanu na sia pakanggulalan kanu Suti a Ruh na nia tanu tindeg na itimbang tanu sa ikelas sabap kanu salig tanu. Na nia ba i 'gkapangingapan tanu. 6 Ka apia entain man i naisa sia kanu Isa al-Masih na dikena den balapantag i napaletak atawa ka dala, ka nia den balapantag na su kasalig a mailay sia kanu kakalimu.
7 Paganay na mapia gaid i talaguy nu kabpaginugut'u. Ugaid'a entain guna i namba a minelen a nan sa lekanu sa kanggulalan nu kanu bantang? 8 Dikena i nan ebpun kanu Kadenan ka sekanin demun i namili sa lekanu. 9 Na su panduan a di pakatidtu na mana bun i nia su paidu a pakembang a amaika makasimbul kanu inadum na makapakembang'in su langun nu entu. 10 Na pedsalig aku kanu Mapulua sa nia nu bu ipamamantag na su ngin bu i inipamandu ku sa lekanu. Ugaid'a natatalanged ku i apia entain man i namba a pedtadin a nan sa lekanu na nanget a masabpet'in su unga nu entu a galebek'in.
11 Manga lusud ku sa tian, na amaika saben-sabenal a ibpangusiat ku pamun su kapapaletak asal'a taliman nu Kadenan su taw, na ngintu ka 'bpamungkaidanan aku nilan pamun? Amaika benal i entu na di nilan den ikalipunget su kabpangusiat ku pantag kanu kinapatay nu Isa al-Masih kanu kayu a pinambalawaga. 12 Na namba ka su langun nu pedtadin a nan sa lekanu ka dikena bu mapapaletak ka makin mapakapun den silan!
Su Kapaguyag-uyag sia kanu Suti a Ruh
13 Manga lusud ku sa tian, pigkahanda nu Kadenan i makambaya-baya kanu. Ugaid'a di nu musal su inenggay nin a entu sa lekanu a baya-baya sa kanu mawag a kiug'a ginawa ugaid'a makin nia nu enggula na 'gkakalimua kanu sia makanggulalan kanu kadtatabanga nu. 14 Kagina su langun na kasuguan na naputus bu sa satiman a nia a kasuguan a “Ikalimu nengka su ped'engka sa mana bun su kakalimu nengka kanu ginawa nengka.”b 15 Ugaid'a tanudi nu, ka amaika mamagukag kanu a mana manga binatang na mabinasa na uman i isa i ped'in.
16 Na nia ku madtalu sa lekanu na dait a paguyag-uyag kanu sia luyud kanu Suti a Ruh. Ka amaika maitu na di nu manggalebek su kamamanusiay a kiug'u ginawa nu. 17 Kagina su kamamanusiay a kiug'u ginawa na sungkang kanu Suti a Ruh, na su Suti a Ruh menem na sungkang kanu kamamanusiay a kiug'a ginawa. Tembu ba di tanu manggula su apia ngin a kiug'a ginawa tanu kagina edsungkanga su dua a nia. 18 Na amaika su Suti a Ruh i pendatu kanu ginawa nu na dikena kanu sakup'u kasuguan.
19 Na mapayag a benal i su kamamanusiay a galebek na kadsina, kaledsik'a atay, kanguda na ginawa, 20 kasimba kanu balahala, kapangalintaw, kaitem'a atay, kapamagukag, kapangalikud, kakalipunget, kadsigia sa dikena mapia, kabpipitas, kadsesenggaya, 21 kalait'a palangay, kandalangutan a 'gkaunutan na kamustakilan taman den kanu ped pan a mawag a galebek. Na pedtaluan ku menem sekanu 'bpaluman sa mana bun kanu kinadtalu ku sa lekanu paganay sa, su taw a maya ba i penggalebeken nin na di makalusud kanu kapendatu nu Kadenan.
22 Ugaid'a nia menem unga nu Suti a Ruh na su kakalimu, kapia na ginawa, kalilintad, katigkel, kapianan, kapia na palangay, katulangedan, 23 kananaw na kambitiala enggu kakumpen kanu ginawa. Na dala kanu langun nu nia i sungkang kanu kasuguan. 24 Na su langun nu naisa sia kanu Isa al-Masih na iniunut'ilan den su ginawa nilan apeg den nu mawag a kiug'u ginawa nilan sia kanu kinapatay nu Isa al-Masih kanu kayu a pinambalawaga.