Galasia 4

1-2 Na nia ku ba a entu pedtalun sa lekanu, na amaika wata pan su apia entain a pebpusakan, na gagalu na di pan mauma su timpu a initandu sa lekanin nu ama nin na nasisita nin pamun su makatuludu lun apeg'u manga kaaden nin. Na su 'gkambebetad'in na mana bun su ulipen a dala baya-baya nin, apia sekanin pan i kigkuan kanu langun-langun. 3 Na maitu tanu bun ba gagalu na da pan sabut tanu kanu bantang na ulipen tanu pamun nu manga adat-betad sia sa dunia. 4 Ugaid'a nauma den man su timpu a initandu nu Kadenan, tembu pinasia nin den su Tunggal'in a pimbata nu babay enggu nasakup'u kasuguan 5 ka enggu nin maaun su manga nasakup'u kasuguan ka enggu tanu mabaluy a wata nu Kadenan. 6 Na kagina ka nabaluy tanu den a wata nu Kadenan na palalayunen nin den kanu atay tanu su Ruh nu Tunggal'in a su tatap a pedtawag lun sa “Ama, Ama!” 7 Na amaika maitu na dikena tanu den ulipen. Na kagina ka binaluy tanu den nu Kadenan a wata nin na isa tanu den kanu pebpusakan nin.

Su Papata kanu manga Taw sa Galasia

8 Na kanu da pan sabut'u kanu Kadenan na ulipen kanu nu manga pegkakadenanen. 9-10 Ugaid'a saguna na nakilala nu den su tidtu a Kadenan atawa ka nia mapia a kadtalu lun na nakilala kanu den nu Kadenan. Na ngintu ka ipenggulalan nu pan su galebekan sa kabpagagama nu manga taw a Yahudi sia kanu manga timpu, kanu manga gay, kanu manga ulan-ulan enggu kanu manga lagun? Na mana nu bun pembalinganan su adat-betad sia sa dunia a malubay enggu dala katagan nin. Ngintu, 'gkalinian nu menem a maulipen kanu nu entu 'bpaluman? 11 'Gkagilekan aku sa kaawan na katagan su kinapaginapas ku sa lekanu.

12 Manga lusud ku sa tian, 'bpangenin ku sa lekanu i saki i ilingi nu, ka pagidsan ku den man sekanu a dikena-Yahudi a da masakup'u kasuguan nu Yahudi. Na da bun pinggula nu sa laki a dikena mapia kanu nangaipus a timpu. 13 Na katawan nu bun i su nauna a kinapangusiat ku sa lekanu kanu Mapia a Tutuma na nia nin nadsabapan na da aku pangengelag. 14 Na apia ka maitu sa mana nabatalu kanu sabap kanu da ku kapangengelag na dala aku nu a benal ilusak atawa ka ikias ka makin aku nu pan tinalima sa mapia a mana bun su malaikat'u Kadenan atawa ka mana su Isa al-Masih demun. 15 Na endaw den guna su entu a kinapia na ginawa nu sa laki? Ka saki demun i makapangimbenal sa entu sa mana bu man ka mapakay a suaten nu su mata nu kanu entu a timpu ka enggu nu makaenggay sa laki na pinggula nu den. 16 Ugaid'a saguna, na ngintu ka nabaluy aku nu den a kuntela nu sabap kanu kapedtalu ku sa lekanu sa bantang?

17 'Bpaginapasen kanu nilan man a benal ugaid'a dikena sa mapia a kahanda ka nia nilan tangga na makapitas kanu sa laki ka enggu silan i kaunutan nu. 18 Na mapia bun man i kapaginapas amaika mapia i kahanda lun saleta na maitu ba man i dait a enggulan nu kanu langun nu timpu na maginapas sa mapia sa dikena bu sa timpu a kaped aku nu. 19 Manga dua na wata, na iling-iling'u babay, na mana ku bun sekanu pembatan pebpaluman a 'gkalasay na masakit taman sa di pan mailay sa lekanu 'bpaluman su uyag-uyag'u Masih. 20 Na ngin den man i kapia nin u mana bu man ka pakapagadapa ku sekanu ka makambitiala ku sekanu sa mapia ka sangat man a 'gkabulibug aku u panun i katabang ku sa lekanu!

Su Upaman kanu Dua Kataw a Wata nu Nabi Ibrahim

21 Na sekanu a pegkiug papedsakup kanu kasuguan nu Nabi Musa na edtalu nu kun sa laki u ngintu, 'gkatuntayan nu bun su kasuguan? 22 Ka nia man nakadalem kanu kitab na su Ibrahim na aden dua kataw a wata nin a mama, su sakataw na wata nin kanu ulipen a babay enggu su sakataw menem na wata nin kanu aden baya-baya nin a babay. 23 Na su wata kanu ulipen a babay na pimbata sia luyud kanu kahanda nu manusia ugaid'a su wata kanu aden baya-baya nin a babay na pimbata sia luyud kanu inibpasad'u Kadenan. 24-25 Na su dua kataw a nia a babay na tuladan nu dua a kapasadan. Na su satiman a kapasadan na su kapasadan kanu palaw sa Sinai a inenggay kanu Musa lu kanu dalepa a Arabia. Na si Hagiar i tuladan nu entu a kapasadan kagina sekanin taman kanu embatan nin na ulipen kagina nia nilan bangsa na ulipen. Na si Hagiar a nia na tuladan bun nu dalepa a Awrusalim sa saguna a timpu. Kagina su taw sa Awrusalim taman kanu manga muliataw nin na ulipen kanu kasuguan. 26 Ugaid'a su babay a si Sara a aden baya-baya nin na tuladan sekanin nu Awrusalim lu sa sulega, na sekanin i nabaluy a ina tanu. 27 Ka nia man nakadalem kanu kitab na

“Su seka a bayas a babay a di embata na enggalaw-galaw ka!

Seka a da makagedam sa sakit sa kapembata na lalis ka den sa kapia na ginawa.

Kagina apia tinagak ka na kaluma nengka,

na nia pan madakel i mambata nengka kumin kanu babay a lu bun i kaluma nin.”

28 Manga lusud ku sa tian, sekitanu na manga wata tanu sia kanu inibpasad a entu nu Kadenan a mana bun su Iskak. 29 Na mana bun kanu paganay na su wata a pimbata sia luyud kanu kahanda nu manusia na 'bpamungkaidanan nin su Iskak a pimbata sia luyud kanu Ruh nu Kadenan, na maitu bun ba i 'gkanggula sa saguna a timpu na 'bpamungkaidanan tanu nu manga taw a nasakup'u kasuguan. 30 Ugaid'a nia nakadalem kanu kitab na paawan su ulipen a babay apeg'u wata nin ka di man dait a makiwalis su wata nu ulipen a babay kanu ipebpusaka kanu wata nu babay a aden baya-baya nin. 31 Kagina ka maitu manga lusud ku sa tian, na dikena tanu wata sia kanu ulipen a babay ka wata tanu sia kanu aden baya-baya nin a babay.