Su Ukit a Kaikelas'u Taw
3
Sekanu a manga taw sa Galasia na 'gkaawan kanu den na akal! Nginan ka papembulibug kanu? Na maliwanag man a benal i kinapayag sa lekanu pantag kanu kinapatay nu Isa al-Masih kanu kayu a pinambalawaga! 2 Na nia ku bu makaidsa sa lekanu saguna, na ngintu, su kinatalima nu kanu Suti a Ruh na sia nakanggulalan kanu kapenggula nu kanu kasuguan atawa ka kanu kapedsalig'u kanu ngin i nakineg'u pantag kanu Isa al-Masih? 3 Benal a 'gkalipat kanu den! Ka kanu kinaludsu nu maginugut na sia nakanggulalan kanu Suti a Ruh ugaid'a saguna na mana nia nu den 'gkabpawangan sa kapedtalutup'u kanu kabpaginugut'u na sia den kanu lekanu demun a kapegkagaga. 4 Ngintu, su kinanggumalasayan nu na da den katagan nin? Basi aden pamun! 5 Dikena ba su kinaenggay nu Kadenan kanu Suti a Ruh enggu su kangagaipan a pinggula nin san sa lekanu, na dikena sabap kanu kapenggulalan nu kanu kasuguan, ka sabap kanu kapedsalig'u kanu ngin i nakineg'u?6 Nia nu 'gkakalendem na su Ibrahim, na initimbang sekanin sa ikelas sabap kanu kapedsalig'in kanu Kadenan.a 7 Na amaika maitu na mapayag i apia entain a taw i aden salig'in na entu ba i tupu nu Ibrahim. 8 Na naalung den man i entu kanu paganay sia kanu kitab sa itimbang'u Kadenan sa ikelas su manga taw a dikena-Yahudi sia makanggulalan kanu kasalig'ilan. Na su nia ba a Mapia a Tutuma na inipayag den man sia kanu kinadtalu kanu Ibrahim sa “Sia makanggulalan sa leka na palihalan su langun na bangsa.”b 9 Nia nin maena na apia entain i aden salig'in na lusud sekanin kanu palihala kanu Ibrahim a sinemalig kanu Kadenan.
10 Na inisinta su langun nu taw a nia nin pedsaligan na su kapenggulalan nin kanu kasuguan kagina nia nakadalem kanu kitab na “Isinta su apia entain a taw a di nin mapalalayun su kanggulalan nin kanu langun nu kasuguan a nakadalem kanu Kitab Taurat.”c 11 Na amaika maitu na mapayag a benal i di itimbang'u Kadenan sa ikelas su taw sia kanu kanggulalan nin kanu kasuguan kagina nia nakadalem kanu kitab na “Su taw a initimbang sa ikelas sia nakanggulalan kanu salig'in na maaden lun su uyag-uyag a da taman nin.”d 12 Na su kanggulalan kanu kasuguan na sia bu kanu kapegkagaga nu manusia sabap sa nakadalem bun kanu kitab i “Apia entain a taw i makanggulalan nin su langun nu kasuguan na makapaguyag-uyag sa da taman nin.”e Ugaid'a su kapenggulalan kanu kasuguan na dikena sabap kanu kapedsalig kanu Isa al-Masih.
13 Na sabap sa dala taw a makanggulalan nin i langun nu kasuguan na nakasinta tanu ugaid'a su Isa al-Masih na inaun tanu nin den kanu entu a sinta nu kasuguan sa ukit a kinaganti nin sa lekitanu kanu entu sia kanu kinasintaf lun, ka nakadalem kanu kitab i “Apia entain i mabitin sia kanu kayu na inisinta.”g 14 Na nia kahanda sa entu na asal'a makasabpet kanu manga taw a dikena-Yahudi su palihala kanu Ibrahim sia makanggulalan kanu Isa al-Masih ka enggu tanu matalima su inibpasad a Suti a Ruh sia makanggulalan kanu salig tanu.
Su Kabalapantag'u Kapasadan nu Kadenan kanu Tupu nu Ibrahim
15 Manga lusud ku sa tian, na nia matakapala a makaenggay ku sa lekanu a upaman na su kapasadan a napagayunan den nu duakambala a taw na dili den mapakay a masalin atawa ka kaumanan pan. 16 Na labi den su inibpasad'u Kadenan a palihala kanu Ibrahim enggu kanu tupu nin. Na dikena nia nin pidtalu sia i “kanu manga tupu” a nia nin maena na su madakel a taw, ka nia nin pidtalu na “kanu tupu”h a nia nin maena na sakataw bu a taw, a su Isa al-Masih bu. 17 Na nia ku ba a nia pedtalun sa lekanu na di kaawan na katagan nu kasuguan a entu su inibpasad a palihala nu Kadenan kanu Ibrahim, ka su kasuguan a entu na kamuli-muli bu i kinaenggay lun ka nakapat gatus enggu telupulu lagun pan i pageletan nin kanu kinaenggay nu Kadenan kanu kapasadan nin kanu Ibrahim. 18 Ka amaika matalima besen nu taw su palihala a entu kanu Ibrahim sia makanggulalan kanu kasuguan na nia nin maena na di den madtalu a sia nakanggulalan kanu kinabpasad'in. Ugaid'a nia nin kabantang na su palihala na inenggay nu Kadenan kanu Ibrahim sa ukit a kinabpasad'in lun.
19 Na amaika maitu na ngintu guna ka inenggay pan su kasuguan? Inenggay su entu asal'a makapailay kanu manga taw u ngin i manga kabaladusan a galebek gagalu na di pan pakauma su tupu a pibpasadan.i Na inenggay nu Kadenan su kasuguan sia nakanggulalan kanu manga malaikat enggu aden pan nasampayatan nilan lun. 20 Na entu pan ka nadtalu a aden nasampayatanj lun, na nia nin maena na aden pan ped a taw a nakaamung kanu entu ugaid'a su Kadenan na da nin den ipanalig-salig su kinaenggay nin kanu pasad'in ka sekanin demun. 21 Na amaika maitu na ngintu, sungkang su kasuguan kanu manga pasad'u Kadenan? Dikena! Ka mana bu man ka aden kasuguan a makaenggay sa uyag-uyag a da taman nin kanu taw na entu den ba i inusal'u Kadenan a makapaikelas kanu taw. 22 Ugaid'a inipayag'u kitab i su langun nu taw na baladusa ka enggu makaenggay nu Kadenan su inibpasad'in kanu apia entain a taw a semalig kanu Isa al-Masih.
Su Ukit a Kaluyud'u Taw kanu manga Taw a Initimbang'u Kadenan sa Ikelas
23 Na kanu di pan katawan su kapedsalig kanu Isa al-Masih na su kasuguan i pegkumpen sa lekitanu gagalu na di pan 'gkauma su timpu a makasalig tanu kanu Isa al-Masih. 24 Tembu ba su manga kasuguan a nia i nabaluy a nakatuludu a makakumpen sa lekitanu gagalu na di pan pakauma su Masih ka enggu tanu makaluyud sia kanu manga taw a initimbang a ikelas sia makanggulalan kanu kapedsalig tanu sa lekanin. 25 Na saguna a nakapayag den su kasalig na nakapitas tanu den kanu pedtuludu a entu a pegkumpen sa lekitanu. 26 Ka sia nakanggulalan kanu kapedsalig kanu Isa al-Masih na nabaluy kanu den langun a wata nu Kadenan kagina nalusud kanu den kanu Isa al-Masih. 27 Ka apia entain i nasalawatan sia kanu Masih na inisangan nin den kanu ginawa nin su Masih. 28 Na dala den kambidayan nin, magidsan pan i Yahudi atawa ka dikena-Yahudi, ulipen atawa ka dikena ulipen, babay atawa ka mama ka naisa den langun sia kanu Isa al-Masih. 29 Na amaika nalusud kanu den kanu Masih na tupu kanu den nu Ibrahim enggu pebpusakan kanu den kanu inibpasad.