2
Na nakasapulu enggu pat lagun i naipusa na mimbalingan aku menem sa Awrusalim a kaped ku si Barnabas enggu pinaunut ku bun si Titus. 2 Mimbalingan aku lu sia luyud kanu kahanda a inipayag'u Kadenan. Saleta na pinasabutan ku kanilan su Mapia a Tutuma a ibpangusiat ku kanu manga taw a dikena-Yahudi. Ugaid'a su nia na inidtalipulu ku bu embitiala kanu manga 'bpagadatan a 'gkangaunutan ka enggu ku 'gkatawan u 'gkaayunan nilan asal'a di kaawan na katagan su ngin i pinaginapas ku atawa ka su 'bpaginapasen ku pan. 3 Na mapia ka naayunan nilan ka apia si Titus a naped ku a dikena-Yahudi na da nilan tegela sa kapapaletak lun.b 4 Na nambitiala bu man i kapapaletak sabap sa aden den manga taw a 'bpamagigiling sa 'bpamaginugut kanu Isa al-Masih a dala kasipati i kinasimbul'ilan kanu lumpukan nu 'bpamaginugut. Na pedsipatan nilan su kapembaya-baya tanu sia kanu Isa al-Masih ka nia nilan kiug na maulipen tanu kanu manga kasuguan nu agama nu manga taw a Yahudi. 5 Ugaid'a da nami a benal silan suguti sa entu a penggulan nilan sa apia saka-kutika asal'a mapalalayun sa lekanu su tidtu-tidtu a panduan nu Mapia a Tutuma.6 Na su manga taw a entu a 'bpagadatan a 'gkangaunutan, na dala bun nadtalu nilan a nakauman kanu ngin i pinasabutan ku a entu. Na su 'gkangaunutan a nia na dikena den balapantag u entain silan kagina sia kanu adapan nu Kadenan na isa bu i kapegkailay nin kanu apia entain. 7 Na makin nilan naimamanan su inisalig'u Kadenan sa laki a su kapangusiat kanu Mapia a Tutuma kanu manga taw a dikena-Yahudi a mana bun su kinasugu nin kani Pitru lu kanu manga taw a Yahudi. 8 Na su Kadenan a minenggay kani Pitru sa bagel sa kinasugu nin lun lu kanu manga taw a Yahudi na sekanin bun i minenggay sa laki sa bagel sa kinasugu nin sa laki lu kanu manga taw a dikena-Yahudi. 9 Na guna kaimamani ni Yakub, Kipas enggu si Yuhan a 'gkangaunutan a pedtiakap kanu umpungan nu 'bpamaginugut i su Kadenan i minenggay sa laki sa bagel sa kapangusiat kanu manga taw a dikena-Yahudi na tinalima kami nilan kani Barnabas a tagapeda nilan. Na nia nami napagayunan na sekami i lu kanu manga taw a dikena-Yahudi enggu silan menem i lu kanu manga taw a Yahudi. 10 Na nia nilan bu pinangeni sa lekami na di nami idtalipenda su manga miskinan sa kadtabang kanilan. Na nakadtabua a benal mambu i entu bun ba i 'gkalilinian ku penggula.
Su Kalipuasan na sia kanu Kasalig kanu Isa al-Masih
11 Ugaid'a kanu kinakakap'i Kipas sa Antiuk na dinaway ku sekanin kagina dikena mapia su pinggula nin. 12 Ka kanu da pan makauma lu su manga taw a Yahudi a tagapeda ni Yakub na pegkan sekanin a kaped'u manga taw a dikena-Yahudi ugaid'a guna makauma silan na tinangkan nin su manga taw a dikena-Yahudi ka di nin kalilinian a mailay sekanin nu manga taw a Yahudic lu. 13 Na inilingan sekanin nu manga ped a 'bpamaginugut a Yahudi taman sa apia si Barnabas na naakat kanu kabpamagigiling'i Kipas sa kanu kinatangka nin a entu kanu manga taw a dikena-Yahudi. 14 Na guna ku mailay i dikena pakatidtu su penggalebeken nilan, ka dikena den luyud kanu panduan nu Mapia a Tutuma na dinaway ku si Kipas sa nia ku lun pidtalu kanu kaadapan nu langun nu taw a natabu lu na “Nia dait na di nengka kapailingan kanu manga taw a dikena-Yahudi su kapaguyag-uyag sia luyud kanu adat-betad'u manga taw a Yahudi, ka apia seka a nan a Yahudi na dikena ka bun 'bpaguyag-uyag sia luyud kanu adat-betad'u manga taw a Yahudi.”
15 Na sekami na pimbata kami a Yahudi, dikena pagidsan nu manga taw a dikena-Yahudi a nia nami lun kapegkailay na baladusa kagina da masakup'u kasuguan. 16 Ugaid'a apia ka maitu na katawan nami den i di makatimbang sa ikelas su taw sia makanggulalan kanu kanggulalan nin kanu kasuguan, ka nia bu katimbang'u Kadenan sa lekitanu sa ikelas na sia bu makanggulalan kanu kasalig kanu Isa al-Masih. Tembu pedsalig kami kanu Masih asal'a makatimbang kami sa ikelas sia makanggulalan kanu kasalig sa lekanin dikena kanu kanggulalan kanu kasuguan. Kagina dala taw a makatimbang sa ikelas sia kanu kanggulalan nin kanu kasuguan.
17 Na amaika sia kanu kapebpapangilay nami sa katimbang'ami sa ikelas sia makanggulalan kanu Isa al-Masih ka 'gkaimamanan nami i baladusa kami a mana bun su manga taw a dikena-Yahudi a da masakup'u kasuguan, na ngintu, nia nin maena na pakandusa kami sabap kanu kapedsalig'ami kanu Masih? Dikena! 18 Ugaid'a amaika embalinganan ku pamun su ngin i inendan ku den a mana su kasuguan nu agama nu Yahudi na makin ku pan pakapailay i baladusa aku. 19 Ka sia man luyud kanu kasuguan na napukas aku den kanu entu ka enggu aku makapaguyag-uyag sia kanu Kadenan. Ka iniunut ku den man i ginawa ku kanu kinapatay nu Isa al-Masih lu kanu kayu a pinambalawaga. 20 Tembu su kabpaguyag-uyag ku saguna na dikena den i nia saki ka su Masih den i 'bpaguyag-uyag sia kanu ginawa ku. Kagina su kabpaguyag-uyag ku a nia a manusia na sia den pakanggulalan kanu kapedsalig ku kanu Tunggal'u Kadenan a pegkalimu sa laki taman sa ininggihad'in su umul'in sabap sa laki. 21 Di ku man idsambi su da idsan nin a limu nu Kadenan kanu manga kasuguan ka dala man makatimbang sa ikelas sia makanggulalan kanu kasuguan, ka amaika aden na nia nin maena na dala katagan nu kinapatay nu Isa al-Masih.