Sulat kanu Manga Taw sa Galasia
Su Salam
1
Salam sa lekanu, saki si Bulus a sinugu. Na su kinasugu sa laki na dikena ebpun kanu manusia atawa ka sia nakanggulalan kanu manusia ka su Isa al-Masiha demun i sinemugu sa laki enggu su Ama tanu a su Kadenan a napambibiag sa lekanin. 2 Su nia a sulat na ebpun sa lekami a lusud'u sa tian sa kabpaginugut. San pakatumpa sa lekanu a manga lumpukan nu 'bpamaginugut sa dalepa a Galasia. 3 Na san sa lekanu su da idsan nin a limu enggu su kalilintad a ebpun kanu Ama tanu a su Kadenan enggu kanu Mapulu tanu a su Isa al-Masih 4 a minggihad kanu umul'in sabap kanu kabaladusan tanu. Pinggula nin i entu sia luyud kanu kahanda nu Ama tanu a su Kadenan asal'a maaun tanu nin kanu kadaluakan a galebek a pakapayapat den kanu sakadunia sa saguna a timpu. 5 Na su pugi na kanu Kadenan taman sa taman. Amin!Su Kinapaninindeg'i Bulus kanu Tidtu a Mapia a Tutuma
6 Na nagaip aku ka malengkas gaid i kinataligkud'u kanu Kadenan a minenggat sa lekanu sa kapaginugut sia nakanggulalan kanu da idsan nin a limu nu Masih. Ka nia nu linamig na su salakaw a maya ta kun sa mapia a tutuma. 7 Ugaid'a da man salakaw pan a mapia a tutuma, pedtadinen kanu nilan bu ka nia nilan kiug na kasambian nilan su Mapia a Tutuma pantag kanu Masih. 8 Na namba ka makanaraka su apia entain a mangusiat sa panduan a liu kanu panduan nu Mapia a Tutuma a inipangusiat'ami sa lekanu apia nia nin pan kaaden i sekami i entu atawa ka su malaikat a ebpun sa sulega i mangusiat lun. 9 Na edsalumanan ku edtalu sa lekanu i “Apia entain i mangusiat sa panduan a liu kanu panduan nu Mapia a Tutuma a natalima nu na makanaraka.”
10 Ngin i kataw nu lun, nia ku 'gkapangingalap na su pugi nu manusia? Atawa ka su pugi nu Kadenan? Nia nu kataw ka nia ku 'bpanunugaten na su manusia? Dikena, ka su Kadenan. Ka amaika nia ku pamun 'bpanunugaten su manusia na nia nin maena na dikena aku ulipen nu Masih.
Su Mapia a Tutuma a Ibpangusiat'i Bulus na ebpun kanu Kadenan
11 Manga lusud ku sa tian, papegkatawan ku sa lekanu i su Mapia a Tutuma a ibpangusiat ku na dikena ebpun kanu manusia. 12 Dikena ku natalima i entu kanu apia entain atawa ka nakapamandu bu sa laki, ka su Isa al-Masih demun i napatuntay lun i entu sa laki.
13 Na katawan nu bun man u ngin i ukit a kabpaguyag-uyag ku kanu timpu a ipenggulalan ku pan su agama nu Yahudi ka sangat a pinamungkaidanan ku su lumpukan nu 'bpamaginugut kanu Kadenanb asal'a mabinasa silan. 14 Na minuna aku pan kanu kadakelan kanu manga edsaumula ku a manga taw a Yahudi sa kanu entu a manga timpu sa kapenggulalan kanu agama nu manga Yahudi ka pinamikalan ku a benal enggulalan su manga adat-betad'u manga kalukesan nami.
15-16 Ugaid'a pigkahanda nu Kadenan i kinapayag'in sa laki kanu Tunggal'in ka enggu ku makapangusiat kanu manga taw a dikena-Yahudi. Na su Kadenan i namili sa laki apia sia aku pamun kanu didalem'u tian nu ina ku enggu inisenggay aku nin asal'a mabaluy aku a mapanunugu nin sia makanggulalan kanu da idsan nin a limu nin. Na kanu kinapayag'in sa laki kanu Tunggal'in na dala ku i entu ibpanun semambut kanu apia entain. 17 Dala aku bun lu sa Awrusalim kanu manga sinugu nu Isa al-Masih a nangauna pan sa laki ka makin aku lu mibpawang sa Arabia.c Entu pan ka mimbalingan aku sa Damaskus.
18 Na guna maipus su telu lagun, na entu pan ka linemu aku sa Awrusalim asal'a makilala ku si Kipas.d Na nakasapulu enggu lima gay bu i kinadtangen ku lu sa lekanin. 19 Dala ped a nailay ku lu kanu manga sinugu nia tabia na si Yakub bu a tebped sa pused'u Mapulu.e
20 Na su Kadenan i pakailay sa dikena aku pendalebut kanu langun na pedtalun ku a nia sa lekanu.
21 Ulian nu entu, na linemu aku menem kanu manga dalepa sa Syria enggu Silisia.f 22 Na kanu entu a timpu na da aku pamun mailay nu manga lumpukan nu 'bpamaginugut kanu Masih sa dalepa a Yudia. 23 Matag'ilan bu 'gkakineg i su danden a 'bpamungkaid kanilan na saguna na ibpangusiat'in den su kapedsalig kanu Isa al-Masih a pembinasan nin kanu paganay a timpu. 24 Sabap sa entu, na napugi nilan su Kadenan.