Su Ped a Papata ni Bulus kanu manga Taw sa Kurintu
13
Na ikatelu den i nia a kapedsan ku sa lekanu. “Na apia ngin i ipedsendit kanu taw na dait a makapaamad i entu nu dua kataw atawa ka telu kataw a saksi.”a 2 Na kanu ikadua a kinasan ku na nakapaingat ku den su manga pembaladusa a nan. Na pebpagingaten ku menem silan 'bpaluman taman den kanu ped pan a pembaladusa san sa di ku lasamen su apia entain a pembaladusa amaika makambalingan aku den san. 3 Na maamad'u lu ba i saben-sabenal a su Isa al-Masih na pedtalu sia pakanggulalan sa laki. Na dikena man malubay su Isa al-Masih sa kapatidtu nin sa lekanu ka mabagel sekanin sa entu. 4 Apia nia nin kaaden i malubay sekanin kanu kinatutuk lun kanu kayu a pinambalawaga ugaid'a 'bpaguyag-uyag sekanin saguna sia kanu kabarakat'u Kadenan. Na maitu kami bun ba, nabaluy kami a malubay sia kanu kinaisa nami sa lekanin ugaid'a 'bpaguyag-uyag kami bun kaped'in sia kanu kabarakat'u Kadenan sa kanu kapenggalebek'ami san sa lekanu.5 Na ilay nu sa mapia i ginawa nu ka enggu nu 'gkatawan u saben-sabenal a 'bpaguyag-uyag kanu sia luyud kanu salig'u. Ipaamad'u sa mapia su salig'u. Nia man dait na 'gkatalanged'u den kanu ginawa nu i su Isa al-Masih na pedtapiden kanu nin, nia tabia na dikena tidtu su kapedsalig'u. 6 Nia ku 'gkapangingalap na maamad'u bun kanu ginawa nu i tidtu kami a sinugu. 7 Na ipangeni-ngeni nami kanu Kadenan i di kanu makanggula sa apia ngin a mawag. Dikena nia nin sabap i asal'a mailay i tidtu kami a sinugu ka nia nin sabap na asal'a nia nu manggalebek na su ngin i mapia, apia nia nami pan kalagidan i mana kami dikena tidtu a sinugu. 8 Ka di kami man enggula sa makasungkang kanu bantang ka nia pan mula na itindeg'ami su entu. 9 Ka sangat man a magalaw kami amaika sia kanu kapegkalubay nami na mailay nami i pegkabagel kanu. Ka nia nami man ibpangeni-ngeni sa lekanu na mabaluy kanu a dala tila nin. 10 Tembu ba inisulat ku su langun nu nia sa lekanu gagalu nu dala aku pan san ka enggu kanu kauma ku san na di den nasisita a inggulalan ku pan sa peges su kapegkagaga a inenggay nu Mapulu sa laki. Ka inenggay nin man su entu a mausal sa kagkabagel'u dikena sa kabinasa nu.
Su Nauli a Salam enggu Pangeni-ngeni
11 Nia den mauli sa entu manga lusud ku sa tian sa paginugut na enggalaw-galaw kanu. Paginapas'u i di kanu den katilan, inggulalan nu su manga papata ku, pamagisa-isa kanu enggu paguyag-uyag kanu sa aden kalilintad'in. Ka amaika maitu na tapiden kanu nu Kadenan a malimu a 'gkabpunan nu kalilintad.
12 Na salamen na uman i isa su ped'in sia luyud kanu kinasuti lun nu Kadenan. 13 Pedsalamen kanu bun nu langun nu 'bpamaginugut sia. 14 Na san sa lekanu su limu nu Kadenan a Mapulu enggu su da idsan nin a limu a sia nakanggulalan kanu Mapulu a su Isa al-Masih apeg den nu kapagisa nu Suti a Ruh sa lekanu.
Wassalam