Su manga Naalung'i Bulus enggu su Inipayag lun nu Mapulu
12
Na nasisita man i embabadtug aku apia 'gkatawan ku bun i dala makagkapia nin su entu. Na ipayag ku sa lekanu saguna su inipaalung enggu su manga inipayag'u Mapulu. 2-3 Na nakasapulu enggu pat lagun den i naipus na aden katawan ku a taw a 'bpaginugut kanu Isa al-Masih a init lu kanu ikatelu a pangkat'u sulega. Na di ku katawan u matakapala a su badan nin i init lu atawa ka su ngiawa nin bu. Na su Kadenan bu i labi a pakataw sa entu. Na su entu a taw 4 na init lu sa sulega. Daka nakakineg sekanin lu sa makagaip-gaip a dala makagaga lun edsinantal enggu dala isugut kanu apia entain i kapanudtul kanu entu. 5 Na makamamasela ku su pantag kanu nanggula nu entu a taw ugaid'a pantag kanu ginawa ku na dala makamamasela ku nia tabia na su manga kalubayan ku. 6 Ugaid'a amaika menem ka pegkiug aku sa 'bpamamasela, na dikena kababalan su entu ka benal. Ugaid'a di ku den enggulan i entu ka enggu di 'gkapulu i kailay nu taw sa laki sa kanu ngin i matakapala a 'gkailay atawa ka 'gkakineg'ilan sa laki. 7 Na sabap kanu inipayag'u Kadenan a entu a manga kagaipan na inisugut'u Kadenan i lasayn aku nu Datu na Giadsal sa sakit a mana sudang kanu badan ku ka enggu di ku makamamasela su ginawa ku. 8 Na nakatelu aku nakapangadap mangeni kanu Mapulu sa kaawa nu entu a sakit sa laki. 9 Ugaid'a nia nin inisawal sa laki na “Su kapegkalimu ku na da kulang'in san sa leka ka su kapegkagaga ku na labi man a 'gkapayag sa mapia sia kanu kalubayan nu taw.” Tembu sangat a magalaw aku kanu kapembabadtug ku kanu manga kalubayan ku kagina sabap sa entu na lalayun sia sa laki su kapegkagaga nu Isa al-Masih. 10 Na namba i sabap'in ka 'gkagalaw aku sia kanu manga kalubayan ku, sia kanu kapapegkaya sa laki, sia kanu kapapegkapasang sa laki enggu kanu kabpamungkaid sa laki taman den kanu manga kamalasayan a 'gkatala ku sabap kanu paginugut ku kanu Isa al-Masih. Kagina sia kanu kalubayan ku na papegkabagelen aku.Su Kapegkalimu ni Bulus kanu manga Taw sa Kurintu
11 Na nakailing aku man sa babal ugaid'a sekanu bun i sinemundul sa laki sa kamamasela ku a entu. Nia pan dait na inimamasela aku nu ka nakalepeng aku bun kanu manga taw a nadtalu a mangategel a sinugu apia nia nin kaaden i dala makamamasela ku kanu ginawa ku. 12 Na su manga tanda a saben-sabenal a sinugu su isa a taw na nailay nu bun i entu sia kanu manga tanda a kangagaipan taman den kanu manga ped pan a kabarakatan a pinggula ku san sa lekanu sa aden kasabal'in. 13 Na su langun na pinggula ku kanu ped a lumpukan nu 'bpamaginugut na pinggula ku bun san sa lekanu, nia bu tabia na su da ku bu kabpaliugat mangeni sa lekanu sa tabang. Na amaika mawag su entu na ampun aku nu.
14 Na saguna na adil aku den sa kasan ku menem sa lekanu sa ikatelu den i nia a kambalingan ku san. Na maitu bun ba, di ku bun sekanu lingasan sa kadtabang'u sa laki kagina dikena nia ku nasisita su manga kaaden nu ka nia ku nasisita na sekanu. Ka dikena man su manga wata i dait a lemimud sa kaaden sa kanu manga lukes'in ka su manga lukes i dait a enggula sa entu kanu manga wata nin. 15 Ka nia paman labi a makagalaw sa laki na su kaenggay ku sa lekanu sa kanu ngin i kaaden ku apeg den nu ginawa ku. Na amaika maitu sa sangat a ipegkalimu ku sekanu na dait ba a sapindit bu i kakalimu nu sa laki? 16 Na 'gkatawan nu bun man a benal i dikena aku pakalingasa sa lekanu. Ugaid'a su ped sa lekanu na nia nilan pedtalun na tagakalen aku ka nakua ku kun sekanu sa akal. 17 Na ngintu, pinamakutan ku sekanu sia kanu apia entain a sinugu ku san sa lekanu? Dala. 18 Na si Titus a pinamitialan ku sa kasan nin sa lekanu a pinaunut ku sa lekanin su suled tanu bun sa paginugut, na ngintu, pinamakutan kanu nin? Dala. Ka isa bu man i tangga na ginawa nami enggu ukit'ami.
19 Na aden a entu na nia matagu sa ginawa nu sampay saguna na ibpaninindeg'ami bu su ginawa nami sa lekanu. Ugaid'a dikena maitu manga papedtayan a lusud ku sa tian, ka pedtalun nami su entu sia kanu adapan nu Kadenan sabap sa nalusud kami kanu Isa al-Masih enggu langun man nu penggulan nami na sia kanu kagkabagel'u. 20 Na penggeda-geda man i ginawa ku sa kasan ku sa lekanu sa dikena nia ku mailay su 'gkapangingalap ku a mailay ku sa lekanu enggu maitu kanu bun sia sa laki ka dikena nia nu mailay su 'gkapangingalap'u a mailay nu sa laki. Ka tabia bun ka kauman ku sekanu a 'bpamangukag, pebpapangalikuda enggu pendidilipungeta, pedsesenggaya, pegkalatan na uman i isa i ped'in, pendidilibaka, pebpapuluan na uman i isa i ped'in enggu di 'bpamagayun. 21 Na penggeda-geda aku bun sa kanu kambalingan ku san na basi ibaba nu Kadenan i ginawa ku kanu adapan nu. Na sangat man a malidu i ginawa ku kanu madakel a taw a mimbaladusa a di nilan pedtaubatan su pinggalebek'ilan a mangaledsik, kapedsisina enggu kanguda na ginawa.