Si Bulus enggu su manga 'Bpamagigiling a Sinugu
11
Na nia ku 'gkapangingalap sa lekanu na kadsabalan aku nu kanu paidu a nia a mana kababalan a kadtalu ku. 'Bpangenin ku sa lekanu i edsabali aku nu sa entu. 2 Ka pakapangalikud aku man sa lekanu a mana su kabpangalikud'u Kadenan. Ka mana kanu bun man laga a inibpasad ku sa kadtampung'in kanu isa a mama. Na su entu a mama na su Isa al-Masih. Na nia ku kalilinian na makapalad ku sekanu sa lekanin sa dala tila nu. 3 Ugaid'a 'gkagilekan aku sa telenan nu su senep sa atay a kapaginugut'u kanu Isa al-Masih sabap sa makasibay su palitiala nu a mana su Siti Hawaa a napagakalan nu nipay. 4 Kagina malemu kanu a benal pakapalitiala amaika aden pakauma sa lekanu a 'bpangusiat sa salakaw pantag kanu Isa al-Masih a dikena su ibpangusiat'ami. Pedtaliman nu bun su ped a ruh a salakaw kanu natalima nu enggu pedtaliman nu bun su ibpangusiat sa lekanu a mapia a tutuma a salakaw kanu natalima nu a tidtu a Mapia a Tutuma.5 Na nia ku lun kapegkailay na pakalepeng aku bun kanu manga taw a nadtalu a mangategel a sinugu. 6 Ka apia dikena aku gaid mategel sa kadtalu-talu ugaid'a aden sa laki su katuntay kanu bantang. Na nakapaamad'ami i entu sa lekanu sa mapia sa kanu apia ngin a ukit.
7 Na ngintu, kabaladusan i kababa ku kanu ginawa ku asal'a makapulu kanu sabap sa inipangusiat ku sa lekanu su Mapia a Tutuma a ebpun kanu Kadenan sa dala bayad'in? 8 Na dikena man mawag i kinatalima ku kanu tabang a ebpun kanu ped a lumpukan nu 'bpamaginugut asal'a kanggalebekan ku sekanu. 9 Ka kanu san aku pan sa lekanu na amaika aden nasisita ku na da ku ibpaliugat sa lekanu ka nia man nangaden kanu manga nasisita ku na su manga lusud sa tian sa paginugut a nakabpun sa Masidunia. Na inabungan ku a benal i makaugat aku sa lekanu sa apia ngin a ukit taman sa papanalusen ku su entu. 10 Na su ibpemamasela ku a nia na dala makagaga lun melen kanu prubinsia a Akaya. Na su kabantang'u entu na mana bun su kabantang'u Isa al-Masih a sia sa laki. 11 Na dikena nia maena nu entu i dikena ku sekanu ipegkalimu. Ka su Kadenan man i labi a pakataw u endaw taman i kapegkalimu ku sa lekanu!
12 Na papanalusen ku su maitu a ukit ku ka enggu 'gkapelen su 'bpamedsungkang sa lekami sa su kabpemamasela nilan sa su galebekan nilan na isa bu kanu penggalebeken nami. 13 Kagina su entu man a manga taw na dikena tidtu a sinugu, manga salimbuten silan a gumagalebek enggu 'bpamagigiling silan sa sinugu silan nu Isa al-Masih. 14 Na dikena man i entu pakagaip kagina maitu bun ba su Datu na Giadsal a 'bpamagigiling sa malaikat'u kaliwanagan. 15 Tembu dikena pakagaip i su manga ulayat'in na 'bpamagigiling sa ikelas a gumagalebek. Na masabpet'ilan man su ngin i unga nu galebek'ilan.
Su Kamalasayan a Natala ni Bulus kanu Kinabaluy nin a Sinugu
16 Na 'bpalumanan ku edtalu sa lekanu i di nu 'bpagitunga i babal aku. Ugaid'a amaika menem ka entu ba i 'gkapagitung'u sa laki na padtaday aku nu den sa entu ka enggu apia paidu bu na makamamasela aku. 17 Na u ngin i pedtalun ku kanu nia a kabpemamasela ku na dikena i entu ebpun kanu Mapulu ka ebpun kanu kababalan nu kamamanusiay ku. 18 Na kagina ka madakel bun a kabpemamasela a luyud kanu kamamanusiay na mamung aku bun mambu sa kabpemamasela. 19 Ka matag'u man ipedtimbang i ginawa nu sa balaitungan kanu ugaid'a kalinian nu gaid 'bpagunut su manga babal a manga taw! 20 Ka di nu demun pedsungkangen su apia entain a 'bpangungulipen bu sa lekanu, pembusaw kanu apia ngin a kaaden nu, 'bpamakut sa lekanu, pebpapulu sa lekanu enggu pedtebpi kanu beneng'u. 21 Na amaika makaya i malubay kami sa kanggula sa manga maitu ba na pedtaliman ku.
Ugaid'a u ngin i ipembabadtug'u apia entain, na makambabadtug ku bun su entu (apia nia nin kaaden i pakailing aku sa babal sa kapedtalu ku sa nia). 22 Ka amaika manga taw silan a Hibru na taw aku bun a Hibru. Na u manga taw silan a Israil na taw aku bun a Israil. Na u manga tupu silan nu Ibrahim na tupu aku bun nu Ibrahim. 23 Na u panunugun silan nu Masih na labi aku den a panunugun nu Masih. (Na pakailing aku sa babal saguna sa kapedtalu-talu sa nia.) Na labi aku man a midtantu enggalebek kumin kanilan, madakel i kinabilanggu ku enggu di den mabilang i kinapametay sa laki taman sa tatap man 'gkapaidusaman su umul ku. 24 Na nakalima aku nabpalumanan mapalebpad'u manga pagidsan ku bun a Yahudi sa enggaga-telupulu enggu siyaw kalebpad su uman i kinalebpad'ilan sa laki. 25 Nakatelu aku napametay sa tungked enggu nakaisa menem i kinapamalantay sa laki sa watu. Nakatelu aku bun nakatala sa migkalat i kapal a pinagedan ku. Na nalalamagan enggu nagagabian na penggampung-gampung aku bu kanu lagat. 26 Na sia kanu kapendadalaug ku na tatap 'gkapaidusaman i umul ku magidsan i sia sa manga pulangi, kanu manga tanegkawn a manga taw enggu kanu manga taw a sakalugu ku bun taman den kanu manga dikena-Yahudi. Maitu bun tatap bun 'gkapaidusaman su umul ku kanu manga siudad, kanu tawan-tawan a manga dalepa enggu kanu manga lagat taman den kanu manga taw a 'bpamagigiling sa lusud sa tian sa paginugut.
27 Na tinemala aku sa mapasang a kinanggalebek enggu nalugat aku a benal. Tatap dala tulug ku sa magabi, 'bpelunusan aku enggu dala 'gkainum ku. Tatap dala pegken ku enggu 'bpanenggawn aku ka dala gaid 'gkambalegkas ku. 28 Na liu pan sa entu, na uman gay na 'gkambawa-bawa ku pan su lidu na ginawa kanu langun nu lumpukan nu 'bpamaginugut. 29 Ka entain ba man kanilan i penggedam sa kalubayan a di ku 'gkagedam su kalubayan nilan? Entain ba i pakapambaladusa kanilan a dikena i entu pakasakit kanu ginawa ku?
30 Na amaika emamasela aku man na nia ku imamasela na su langun na kalubayan ku. 31 Na su Kadenan a Ama nu Mapulu tanu a su Isa al-Masih a Kadenan nin bun i pakataw sa dikena aku pembudtud. Sekanin i pebpugin taman sa taman! 32 Na kanu lu aku pan sa dalepa a Damaskus a nia lun pendatu na si Datu Aritas, na pinatamengan nin su bengawan nu siudad kanu gubilnadul lu ka enggu aku masigkem. 33 Ugaid'a pinapageda aku kanu bukag ka initudtun aku kanu liu nu alad a lu aku pinaukit kanu paliungan asal'a makalipuas aku kanu entu a gubilnadul.