Su Kabpaninindeg'i Bulus kanu Galebekan nin
10
Na nia pedtalun nu ped na matalaw aku amaika pakapagadapa ku sekanu ugaid'a mawalaw aku amaika di ku sekanu pakapagadapa. Na sia luyud kanu kababa na ginawa nu Isa al-Masih enggu kananaw nin na saki si Bulus 2 a 'bpangeni sa lekanu sa sia kanu kapamagadapa tanu na di den nasisita a makapailay ku pan sa lekanu su kawalaw a dait a enggulan ku kanu manga taw a nia nilan 'gkapagitung sa lekami na 'bpaguyag-uyag sia luyud kanu kamamanusiay. 3 Na benal man a 'bpaguyag-uyag kami a manusia ugaid'a dikena kami pembunua sa ukit a kamamanusiay. 4 Ka nia nami man matalem sa kapembunua na dikena pagidsan na 'bpagusalen nu taw sa kapembunua ka nia nami 'bpagusalen na su kabarakat'u Kadenan a pembinasa kanu manga bagel'u kuntela. Pembinasan nami su di pakasugat a manga itungan 5 enggu su ipemamasela a kapagitung a sungkang kanu tidtu a kapegkakilala nu taw kanu Kadenan. Na pegkuan nami su entu a kapagitung'ilan ka ipedtapenay nami kanu Isa al-Masih asal'a sia maluyud sa lekanin su entu a kapagitung'ilan. 6 Na adil kami sa kapatidtu kanu apia entain a pedsungkang u saben-sabenal a matalutup den su paginugut'u.7 Na nia nu bu man 'gkailay na su matakapala a 'gkailay nu mata nu. Na amaika 'bpaginugut kanu sa lusud kanu kanu Isa al-Masih na pagitung'u bun i lusud kami bun kanu Isa al-Masih. 8 Na di ku a benal ikaya amaika pedsusubela aku kanu kabpemamasela ku pantag kanu kapegkagaga a inenggay sa lekami nu Mapulu. Kagina su entu na inenggay sa lekami a mausal sa kagkabagel'u dikena sa kabinasa nu. 9 Na di ku kalilinian i nia matagu sa ginawa nu na 'bpanginggileken ku sekanu kanu manga sulat ku. 10 Kagina nia kadtalu nu ped na “Su manga sulat'in na maugat enggu mabagel ugaid'a amaika pakapagadapa sekanin na malubay enggu su kadtalu nin na dala katagan nin.” 11 Na patuntayan ku kanu nan a manga taw u ngin i kangadtalu nami sia kanu manga sulat'ami na ipenggulalan nami su entu amaika makapagadapa nami den sekanu.
12 Na di nami man ilepeng i ginawa nami atawa ka isulagid kanu nan a manga taw a ibpemamasela nilan i ginawa nilan. Na 'gkailay a benal i kada na akal'ilan sa kapedtengkad'ilan sa ginawa nilan enggu kapapedsulagid'ilan kanu ginawa nilan sa silan demun. 13 Ugaid'a sekami na dikena nami ibpemamasela su liu kanu ngin i inisangan sa lekami a galebek ka nia nami bu ibpemamasela na su ngin bu i inisangan sa lekami nu Kadenan a nakasampay taman sa lekanu. 14 Tembu ba su kabpamandu nami sa lekanu na dikena i entu nakaliu kanu ngin i inisangan sa lekami ka sekami man i nauna a nakauma san sa lekanu a namandu kanu Mapia a Tutuma pantag kanu Isa al-Masih. 15 Na dikena nami man ibpagamung 'bpemamasela su galebekan nu ped a taw. Ugaid'a nia nami 'gkapaginagkay na miseg su salig'u kanu Kadenan asal'a makaiseg bun su galebekan nami san sa lekanu 16 ka enggu nami makapangusiat su Mapia a Tutuma kanu manga dalepa a mawatan sa lekanu ka enggu di madtalu sa lekami i ibpemamasela nami su galebekan a ped a taw i minggalebek lun. 17 Na apia entain i pegkiug 'bpemamasela na nia nin imamasela na su Mapulu.a 18 Kagina dikena man su taw a ibpemamasela nin i ginawa nin i matalima ka su taw a ibpemamasela nu Mapulu.