Su Tabang kanu Pakanasisita a 'Bpamaginugut
9
Na di den nasisita a sulatan ku pan sekanu pantag kanu kapedtabang kanu 'bpamaginugut. 2 Ka katawan ku man su kapegkiug'u a benal pedtabang. Na namba i ibpemamasela ku pantag sa lekanu kanu manga taw sa Masidunia. Pidtalu ku kanilan i iganat kanu naipus a lagun na adil den a benal sa kadtabang su sekanu a manga taw sa Akaya. Na su kapegkiug'u pedtabang i nakaenggat kanu kadakelan kanilan sa kadtabang. 3 Na pedsugun ku san su manga lusud tanu a nia sa tian sa paginugut ka enggu kanu den makapagadil kanu manga ipedtabang'u a mana bun su pidtalu ku kanilan pantag sa lekanu. Na amaika maitu na su kabpemamasela nami pantag sa lekanu na di madtalu i dikena benal. 4 Ka aden a entu na basi aden munut sa laki a manga taw sa Masidunia, na amaika nia nilan mailay i dikena kanu pamun besen adil na makagkaya kami enggu apia sekanu na makagkaya kanu bun. 5 Tembu ba napagitung ku i pamitialan ku su manga lusud tanu a nia sa tian sa muna den san silan ka enggu nilan maadil su manga tabang a inibpasad'u. Na kanu maya ba a ukit na maadil su entu sa dikena malegen sa ginawa ka maluwag.6 Nia nu 'gkakalendem na su kadtalu a nia a
“Su paidu i inisaud'in
na paidu bun i masabpet'in,
su madakel menem i inisaud'in
na madakel bun i masabpet'in.”
7 Na uman i isa sa lekitanu na dait a inggay nin su ngin i nabputusan nu ginawa nin a inggay nin sa dala kandua-dua nin enggu maluwag kanu atay nin kagina su taw a menggay sa aden kagalaw nin na pakasuat kanu Kadenan. 8 Na su Kadenan na magaga nin man mangaden sa lekanu su apia ngin a palihala a lawan pan kanu ngin i nasisita nu ka enggu sia kanu langun na timpu na di kanu 'gkulang taman sa makadtabang kanu pan kanu ped sa kagkapia nilan 9 a mana bun su nakadalem kanu kitab a
“Inipayapat'in su manga tabang'in kanu manga pakanasisita kanu embala-bala.
Su kapianan nin na di mapupus taman sa taman.”a
10 Na su Kadenan a 'bpangaden sa uni kanu 'bpangangawid enggu 'bpangaden sa makan na sekanin bun i mangaden sa lekanu sa uni a makasaud'u enggu mapagkadakel kanu entu ka enggu mangiseg su kadakel'u masabpet'u a kapianan. 11 Palihalan kanu nu Kadenan kanu langun nu ukit ka enggu madakel i kadtabangan nu. Na amaika maitu na madakel i makadsukul-sukul kanu Kadenan sabap kanu manga tabang'u a sia nakanggulalan sa lekami.
12 Ka su nia man a galebekan nu na dikena nia nin bu 'gkapangaden su nasisita nu 'bpamaginugut ka pakapangaden bun sa sangat a kapedsukul-sukul'u manga taw kanu Kadenan. 13 Na sia kanu galebekan nu a nia na pakapaamad'u su katulangedan nu. Na madakel i pakapugi kanu Kadenan sia kanu kapenggulalan nu kanu paginugut'u kanu Mapia a Tutuma pantag kanu Isa al-Masih enggu su kabpangalimuan nu kanilan sa maluwag sa atay taman den kanu ped pan a taw. 14 Na su kabpangeni-ngeni nilan sa lekanu na pakapailay kanu senep sa atay a limu nilan sa lekanu sabap kanu dala idsan nin a limu nu Kadenan a nailay nilan sa lekanu. 15 Na sukul-sukul kanu Kadenan kanu dala pagidsan nin a inenggay nin.