Su Kapangalimuan
8
Manga lusud ku sa tian a 'bpamaginugut, nia nami kalilinian na kasabutan nu u ngin i pinggula nu manga lumpukan nu 'bpamaginugut sa Masidunia sabap kanu da idsan nin a limu nu Kadenan a inenggay nin kanilan. 2 Ka kanu timpu a kinatala nilan sa mapasang a kamalasayan na apia maitu i 'gkatamanan nilan na 'bpamelapay bun kanu atay nilan su kagalaw tembu apia miskinan silan na 'bpamelapay bun kanu atay nilan su kabpangalimuan. 3-4 Na makapangimbenal ku i midtetebu silan menggay sa lawan pan kanu ngin i dait a ibpagenggay nilan kanu 'bpamaginugut a pakanasisita taman sa silan pan i napakalimu-limu sa lekami sa kaamung'ilan edtabang. 5 Na su pinggula nilan na minuna pan kanu ngin i 'bpagantapen nami a enggulan nilan ka saben-sabenal a initapenay nilan i ginawa nilan kanu Mapulu enggu sia sa lekami sia luyud kanu kahanda nu Kadenan. 6 Tembu ba pinamitialan nami si Titus sa dait a italus'in su galebek a nia a kapangalimuan san sa lekanu kagina ka sekanin bun mambu i tinemutulu sa lekanu sa kanggula nu sa maitu. 7 Na mana bun su da nu kadtalipenda kanu katulangedan nu kanu langun-langun magidsan pan i sia kanu kapedsalig'u, kangadtalu nu, kapedtuntay nu enggu kapegkalilini nu penggula sa mapia apeg'u kapegkalimu a inipailay nami sa lekanu na maitu bun ba i di nu kadtalipenda kanu kapangalimuan nu.8 Na dikena ku i nia ipedsugu sa lekanu ka nia ku kapedtalu sa nia na asal'a maamad ku sa lekanu u endaw taman su kapegkalimu nu sa ukit a kalabit ku sa lekanu kanu katulangedan nu ped sa kalilini nilan sa kadtabang. 9 Ka katawan nu bun man u endaw taman su dala idsan nin a kapegkalimu nu Mapulu tanu a su Isa al-Masih sa apia man kawasa sekanin na nabaluy sekanin a miskinan sa lekanu a kapianan ka enggu sia makanggulalan kanu kamiskin nin na mabaluy kanu a kawasa.
10 Na sia bu sa laki na mapia a benal sa lekanu amaika italus'u su naludsuan nu a nan a galebekan sa kanu naipus a lagun sa dikena bu matag penggalebeken nu ka 'gkalilinian nu pan gaid penggula. 11 Na patalus'u su entu taman sa imasad'u ka enggu nu matalutup su entu sia luyud kanu kapegkiug'u lun a benal penggula a luyud kanu ngin i 'gkagaga nu. 12 Kagina amaika aden sa lekanu su kalilini enggula sa entu na apia ngin i ipangalimuan nu a sia luyud kanu ngin i 'gkagaga nu na taliman nu Kadenan su entu, ka di kanu nin man pebpagenggayn sa di nu magaga.
13 Na dikena nia nami menem kahanda i makasesengaw su ped na sekanu menem na 'gkapasangan ka nia nami kahanda na su kadtitimbang'u 'gkatamanan nu uman i isa. 14 Ka su kapegkasengaw nu saguna na pakadtabang kanu kanu pakanasisita. Na amaika sekanu menem i makanasisita enggu silan menem i makasesengaw na silan menem i edtabang sa lekanu. Na amaika maitu na makadtitimbang su 'gkatamanan nu uman i isa. 15 Ka nia man nakadalem kanu kitab na
“Su kinemua sa madakel na dala edsusubela su nakua nin
enggu su kinemua sa paidu na dala bun 'gkulang.”a
Su Kapedtabang'i Titus enggu su manga Tagapeda nin
16 Na pedsukul-sukul aku sa Kadenan ka inipangguatay nin kani Titus su kalilini sa kadtabang sa lekanu sa mana bun su kapegkalilini nami pedtabang sa lekanu. 17 Ka dikena nin bu tinalima su pinangeni nami a kasan nin sa lekanu ka 'gkalilini a benal sa kapedsan nin sa lekanu sabap sa kapegkalilini nin pedtabang sa lekanu. 18 Na paunuten nami bun sa lekanin su lusud tanu sa tian sa paginugut a kilala a benal kanu manga lumpukan nu 'bpamaginugut sabap kanu kapebpayag'in kanu Mapia a Tutuma. 19 Na liu pan sa entu na sekanin bun i pinamili nu manga lumpukan nu 'bpamaginugut a makadtatanggunut sa lekami sa kanu kapendadalakaw nami sa kapegkua enggu kabpagumun kanu inipangalimuan nu 'bpamaginugut ka enggu mapugi su Mapulu enggu makapailay tanu su kapegkiug tanu pedtabang. 20 Na pinggula nami su entu ka enggu dala madtalu pantag sa lekami kanu kapedtuganul'ami kanu ibpangalimuan nu 'bpamaginugut. 21 Ka nia nami man kalilinian penggula na u ngin i wagib kanu adapan nu Mapulu enggu kanu adapan nu manga taw. 22 Na paunuten nami bun kanilan su sakataw pan a lusud tanu bun sa tian sa paginugut a batalu den sekanin sa kapananabangan, labi den i kapegkiug'in pedtabang saguna sabap sa masela a benal i salig'in sa lekanu. 23 Na makapantag menem kani Titus, na isa sekanin a gumagalebek kanu Kadenan a kaped ku kanu galebekan san sa lekanu enggu su manga ped'in menem a lusud tanu bun sa tian sa paginugut na silan i sinugu nu manga lumpukan nu 'bpamaginugut enggu su ukit a kapaguyag-uyag'ilan na pakapugi kanu Isa al-Masih. 24 Kagina ka maitu na ipailay nu su kakalimu nu kanilan ka enggu nilan 'gkaamad i benal su ibpemamasela nami pantag sa lekanu taman sa mapayag i entu kanu manga lumpukan nu 'bpamaginugut.