7
Manga papedtayan ku a pakat ku, na kagina ka aden sa lekitanu su maitu a manga pasad'u Kadenan na itangka tanu i ginawa tanu kanu apia ngin a makagkaledsik kanu badan tanu enggu ginawa tanu. Paginapasen tanu su talutup a kaikelas sabap kanu gilek tanu kanu Kadenan.Su Kapegkagalaw ni Bulus
2 Bukati nu su atay nu sa lekami. Dala man pinggula nami a mawag kanu apia entain enggu dala bun nakapasibay nami enggu nadsalimbut'ami. 3 Na dikena nia ku kapedtalu sa nia i pedsugaten ku sekanu sa kawagib. Ka mana bun su pidtalu ku sa lekanu a tatap kanu sia kanu atay nami kapatay pan sa kauyag. 4 Na masela man i salig ku sa lekanu enggu sangat a ibpemamasela ku sekanu. Sangat man a papegkabagelen nu i manggiginawa ku sia kanu kapedtala nami kanu manga kamalasayan taman sa 'bpamelapay su kapegkapia na ginawa ku.
5 Na apia man su kinauma nami sa Masidunia na da bun makatelen su badan nami. Ka papegkapasangan kami sa apia ngin a ukit. Ka sia kanu embala-bala na nan su manga pegkuntela sa lekami enggu sia menem kanu atay nami na penggeda-geda sabap sa lekanu. 6 Ugaid'a su Kadenan a papegkabagel kanu taw a pegkalubay i ginawa nin i napagkagalaw sa lekami sia kanu kinauma ni Titus. 7 Na dikena bu su kinauma ni Titus i nakapagkagalaw sa lekami ka apeg'u napanudtul'in sa lekami a kinapagkagalaw nu sa lekanin. Napanudtul'in bun i 'gkapanadeng'u a benal i kailay nu sa laki enggu 'gkalidu i ginawa nu pantag sa laki taman sa ibpaninindeg aku nu. Na sabap sa entu na makin nangiseg su kinagalaw ku.
8 Na apia man nakalidu sa ginawa nu su sulat ku sa lekanu na dala ku a benal i entu kadsenditi. Nia ku bu nadsenditan na nailay ku a nakalidu sa ginawa nu su entu ugaid'a apia ka maitu na nangagan bu su entu a lidu na ginawa nu. 9 Na saguna na 'gkagalaw aku dikena sabap kanu kinalidu na ginawa nu ka sabap sa nabaluy i entu a lalan sa kinadtaubat'u. Na kahanda man nu Kadenan su entu enggu da kanu bun kagkaidi nu kinalidu na ginawa nu a entu sa lekami. 10 Kagina su lidu na ginawa a sia luyud kanu kahanda nu Kadenan na nia nin unga na kadtaubat a lalan sa kalipuasan. Tembu di dait a kadsenditan su entu. Ugaid'a su lidu na ginawa a kaduduniay na nia nin unga na kapatay.a 11 Na ilay nu u ngin i unga nin sa lekanu su lidu na ginawa a luyud kanu kahanda nu Kadenan. Ka nia nu den kalilinian na su kanggula sa mapia, adil kanu den a benal sa kapaamad'u sa ginawa nu sa dikena kanu 'gkawagiban kanu ipedsendit sa lekanu. 'Gkalipungetan nu su taw a penggula sa kabaladusan, senep sa atay su kapegkagilek'u enggu 'gkapanadeng'u su kailay nu sa laki taman sa pegkiugan nu den a benal ipapenggedam su limu nu sa laki. Pinaginapas'u su kasugat sa kawagib kanu taw a mimbaladusa. Inipaamad'u i dikena kanu 'gkawagiban kanu entu a kabaladusan. 12 Na apia ka maitu na dikena nia ku kinadsulat sa lekanu i pendawayn ku su taw a penggula sa mawag enggu ibpaninindeg ku menem su taw a pinggulan sa mawag ka nia ku kinadsulat sa lekanu na asal'a 'gkailay nu u endaw taman i kapegkalimu nu sa lekami sia kanu adapan nu Kadenan. 13 Na sangat man a nakagkabagel kanu manggiginawa nami su langun nu entu.
Na liu kanu kinagkabagel'a manggiginawa nami na labi pan a nakagalaw sa lekami su kinailay nami kanu kagalaw ni Titus sabap kanu kinapalilintad'u kanu itungan nin. 14 Na u ngin i inimamasela ku sa lekanin pantag sa lekanu na da aku nu makapagkaya ka naamad'in i entu sa lekanu sa kanu kinasan nin. Na naamad i benal su inimamasela nami a entu kani Titus sa nia nin kapagidsan sa kabenal na su kabenal'u langun nu kadtalu nami sa lekanu. 15 Na makin nangiseg saguna su kapegkalimu nin sa lekanu uman nin 'gkagkalendem su kabpaginugut'u enggu su kinatalima nu sa lekanin a unut su senep sa atay a kabpagadat. 16 Na 'gkagalaw aku ka masela man i salig ku sa lekanu.