6
Na sia kanu kapenggalebek'ami a nia a pedtapiden kami nu Kadenan na 'bpangenin nami sa lekanu i di nu semuguti sa kaawan na katagan su da idsan nin a limu nu Kadenan a natalima nu. 2 Ka nia man kadtalu nu Kadenan na“Kanu timpu a inadil ku a kutika na pinakikineg ku seka,
kanu kutika nu kalipuasan na tinabangan ku seka.”a
Ilay nu, nia den ba su kutika a inadil'u Kadenan a su kutika nu kalipuasan!
3 Na di kami man mangaden sa kagebpa nu apia entain ka enggu di katilan su galebekan nami kanu Kadenan. 4 Na pakapailay nami i saben-sabenal i sinugu kami nu Kadenan sia kanu kapedtigkel'ami kanu apia ngin a kamalasayan enggu kapasang'a 'gkanggula, 5 kapapegkasakit sa lekami, kapembilanggu sa lekami enggu su kapedsamuk sa lekami nu manga taw. Na pedtantu kami penggalebek apia nia nin kaaden i aden a entu na dala tulug'ami enggu dala 'gkakan nami. 6 'Bpaguyag-uyag kami sa matilak, aden katuntay nin enggu katigkel'in taman sa 'bpangalimuan kami. Sia sa lekami su Suti a Ruh enggu su tidtu-tidtu a kapegkalimu. 7 Ibpangusiat'ami su bantang sia makanggulalan kanu kabarakat'u Kadenan a sia sa lekami. Na su kaikelasan i matalem'ami sia kanu biwang kawanan a lima nami. 8 Na magidsan pan i 'bpagadatan kami atawa ka dili, pebpugin kami atawa ka ipedsinta kami na bantang su kadtalu nami ugaid'a apia ka maitu na ipedtimbang kami pamun nu ped sa manga budtuden. 9 Na apia pegkilalan kami nu madakel ugaid'a aden bun ped a di pegkilala sa lekami. Na timbang man a minatay kami den ugaid'a bibiag kami bun. Papegkasakitan kami sabap sa kapapedtidtu sa lekamib ugaid'a dikena kami bun menem pebpatay. 10 Na apia nia kapegkailay nu taw i 'gkalidu i ginawa nami ugaid'a nia nin kabantang na magalaw kami. Miskinan kami ugaid'a madakel i pakapagkawasa nami. Na apia nia kapegkailay nu taw sa lekami i dala kaaden nami ugaid'a nia nin kabantang na lekami su langun-langun.c
11 Manga lusud'ami sa tian a manga taw sa Kurintu, na mimbantangan kami sa lekanu sa mapia sa kanu manga kadtalu nami sa lekanu enggu su kapegkalimu nami sa lekanu na dala tedtab'in. 12 Na dikena nami pedsapalan i ginawa nami sa kapegkalimu nami sa lekanu. Ugaid'a sekanu na pedsapalan nu i ginawa nu sa kapegkalimu nu sa lekami. 13 Na ipembitiala ku sekanu sa mana su kapembitiala nu ama kanu wata nin sa 'bpangenin ku sa lekanu i ikalimu kami nu sa mana bun su kapegkalimu nami sa lekanu.
Su Di Kapagisa kanu manga Taw a dikena 'Bpamaginugut
14 Na di nu ipagisa su manga taw a dikena 'bpamaginugut. Ka di man mapakay a maisa su ikelas a taw enggu su dikena ikelas. Na maitu bun ba, di bun mapakay a maisa su maliwanag enggu su malibuteng. 15 Di bun masulut a maisa su Masih enggu su Datu na Giadsal.d Na maitu bun ba su 'bpamaginugut enggu su dikena 'bpamaginugut na di bun mapakay a maisa. 16 Di bun masulut a maisa su Suti a 'Bpagagaman kanu Kadenan enggu su manga pegkakadenanen. Na sekitanu man su Suti a 'Bpagagaman nu kaisa-isa nin a tidtu a Kadenan sa nia nin kadtalu na
“Tapiden ku silan sia kanu kabpaguyag-uyag'ilan.
Saki i Kadenan nilan
enggu silan menem i mabaluy a manga taw ku.”e
17 Nia pan ped a kadtalu nu Kadenan na
“Tagak'u silan
enggu pitas kanu kanilan.
Di nu kemembil su apia ngin a maledsik,f
ka amaika maitu na taliman ku sekanu.
18 Na saki i mabaluy a Ama nu
enggu sekanu menem i mabaluy a manga wata ku a babay-mama.
Na saki ba su Kadenan a Mapulu a Barakat sa Langun i pedtalu sa entu.”