Su Bagu a Badan
5
Na amaika mabinasa den su balung-balung a pendalesan tanu sia sa dunia a mana su badan tanu na aden walay a pagkalebenan nu Kadenan sa lekitanu lu sa sulega a dala kapegkabinasa nin a dikena inumbal'u manusia. 2 Na pakauliang tanu sa kapedtala tanu sa kamalasayan kanu nia a badan tanu sa dunia tembu 'gkapangingalap tanu den a benal a makasangan den sa lekitanu su badan sa sulega. 3 Ka amaika makasangan den sa lekitanu su badan sa sulega na di makagkawas-kawas su ngiawa tanu. 4 Ka gagalu na sia tanu pan kanu badan tanu sa dunia na 'gkapasangan tanu kanu manga kamalasayan a 'gkatala tanu ugaid'a dikena nia nin maena i 'gkalilinian tanu i makagkawas-kawasa su ngiawa tanu ka nia tanu 'gkalilinian na makasangan sa lekitanu su badan a lu sa sulega ka enggu su badan tanu sa dunia a aden papatayan nin na kasambian nu badan sa sulega a da papatayan nin. 5 Na su Kadenan bun i minadil sa lekitanu sa kanu entu ba a kahanda nin. Na inenggay nin sa lekitanu su Suti a Ruh nin a pamagel tanu sa tumanen nin su inibpasad'in.6 Tembu ba dala kandua-dua na ginawa nami. Na 'gkatawan nami bun man i taman sa sia kami pan kanu badan nami sa dunia na di nami pan madtagapeda sa matakapala su Mapulu. 7 Ugaid'a dikena i entu pakaungen ka 'bpaguyag-uyag kami man sa ukit a kapedsalig sa lekanin dikena sa matakapala a 'gkailay nu mata. 8 Tembu dala a benal kandua-dua na ginawa nami. Na nia nami pan tinemu i matagak'ami den su badan sa dunia ka enggu nami den madtagapeda sa matakapala su Mapulu. 9 Na namba i sabap'in i nia nami den pinadsatiman kanu ginawa nami na u panun i kasuat'ami sa lekanin magidsan pan i sia kami pamun sa dunia atawa ka dala den. 10 Ka uman i isa sa lekitanu na semangul sa kukuman nu Isa al-Masih ka enggu tanu matalima su ngin i makadait sa lekitanu sia luyud kanu ngin i pinggalebek tanu sia sa dunia magidsan pan i mapia atawa ka mawag.
Su Kambalingan kanu Kadenan sia Makanggulalan kanu Isa al-Masih
11 Na kagina ka katawan nami u ngin ba i tidtu-tidtu a kagilek kanu Mapulu na di nami telenan su manga taw sa kapapaginugut kanilan kanu Isa al-Masih. Na su Kadenan man i pakataw sa u entain kami enggu 'gkapangingalap'ami bun i katawan kami nu bun sa tidtu-tidtu. 12 Na dikena nia nin maena i ibpemamasela nami menem i ginawa nami sa lekanu ugaid'a nia nami pegkiugan na aden makamamasela nu pantag sa lekami ka enggu aden makasawal'u kanu manga taw a nia nilan ibpemamasela na u ngin bu i matakapala a 'gkailay kanilan, dikena su ngin i sia kanu dalem'u pamusungan nilan. 13 Na amaika nia menem kapegkailay nu sa lekami i 'gkabuneg kami na sabap i entu kanu kabpaginugut'ami kanu Kadenan. Ugaid'a amaika nia nu menem kapegkailay sa lekami i mapia i itungan nami na lekanu i entu a kapianan. 14 Kagina su limu man nu Isa al-Masih i pakasekat sa lekami. Kagina natatalanged'ami man i minatay su Isa al-Masih sa kanu kapianan nu langun nu taw tembu timbang a minatay tanu langun. 15 Na minatay sekanin sa kapianan nu langun nu taw ka enggu su apia entain a nakatalima kanu uyag-uyag a da taman nin na di den silan maguyag-uyag sia kanu kiug'ilan demun ka sia den silan maguyag-uyag kanu Isa al-Masih a minatay enggu pinambibiag 'bpaluman sa kanilan a kapianan.
16 Tembu saguna na dikena nami den 'bpagilayn su apia entain a taw sia luyud kanu kamamanusiay a kapagitung, ka apia su kapagitung'ami paganay pantag kanu Isa al-Masih na sia bun luyud kanu kamamanusiay ugaid'a saguna na dikena den maitu. 17 Na kagina ka maitu na apia entain i nalusud kanu Masih na nabagu den sekanin. Na u ngin i danden sa lekanin na naawa den su langun nu entu ka nabagu den. 18 Na su langun nu nia na ebpun kanu Kadenan a napambalingan sa lekitanu sia sa lekanin sia makanggulalan kanu Isa al-Masih enggu sekanin i minenggay sa lekami kanu nia a galebekan a su kapambalingan kanu manga taw sia sa lekanin. 19 Nia nin maena na sia kanu Isa al-Masih na pambalinganen nu Kadenan su taw sia sa lekanin taman sa di den ipedtimbang a baladusa silan. Na sinaligan kami sa kapayag pantag kanu kambalingan nu taw kanu Kadenan. 20 Kagina ka maitu na su Isa al-Masih i sinemugu sa lekami enggu sia makanggulalan sa lekami na 'bpagenggaten kanu nu Kadenan sa kambalingan nu sa lekanin. Na sia makanggulalan kanu ingala nu Isa al-Masih na ibpamagayuk'ami sa lekanu sa embalingan kanu den kanu Kadenan. 21 Ka su Isa al-Masih a dala kabaladusan nin na inipanggumaked'u Kadenan sa lekanin su kabaladusan tanu asal'a makatimbang tanu sa ikelas sia kanu Kadenan sia makanggulalan kanu kinaisa tanu sa lekanin.