Su Kakawasan a Nakatagu kanu Binangga
4
Na inisalig'u Kadenan su nia a galebekan sa lekami sia nakanggulalan kanu da idsan nin a kapegkalimu nin. Tembu di kami semangkup 2 ka makin nami ipangusiat sa matakapala su bantang a kadtalu nu Kadenan. Ikias'ami su manga ibpamagena a galebek a pakaya, su kasalimbut enggu su kapasibay kanu kadtalu nu Kadenan. Na kanu maitu ba a ukit na makapailay nami kanu manga taw i matulanged kami enggu nia labi a pakailay sa entu na su Kadenan. 3-4 Na benal man a aden manga taw a nadalindingan i mata nilan ka enggu di nilan 'gkatuntayan su Mapia a Tutuma a ibpangusiat'ami ugaid'a su entu ba a manga taw na su di 'bpamaginugut a makaidtug den sa naraka. Na su Datu na Giadsal a pendatu kanu sagugunay a timpu i dinemalinding kanu mata nilan asal'a di nilan mailay su sigay nu Mapia a Tutuma a makapantag kanu kabarakat'u Isa al-Masih a alung-alung'u Kadenan. 5 Na dikena man nia nami ibpangusiat i makapantag kanu ginawa nami ka nia nami ibpangusiat na su Isa al-Masih na sekanin su Mapulu. Na pebpanunugu kami sa lekanu sabap kanu Isa al-Masih. 6 Kagina su Kadenan a midtalu sa “Makatayaw su maliwanag sia kanu kalibutengan”a na sekanin demun i nakatayaw kanu atay nami ka enggu kaliwanagan su ginawa nami sa katuntay kanu sigay nin a 'gkailay sia kanu Isa al-Masih.b7 Na su balapantag a nia a kakawasan a sia sa lekami na mana nakabetad kanu budta a binangga ka enggu mailay sa mapia i su Kadenan i saben-sabenal a 'gkabpunan nu entu a dala idsan nin a kabarakatan, dikena sa lekami. 8 Na sangat a papegkapasangan kami sa apia ngin a ukit ugaid'a di kami 'gkatalaw, apia nia nin kaaden i aden a entu na 'gkabulibug kami sa u ngin i enggulan nami ugaid'a di kami bun 'gkaawan na inam. 9 'Bpamungkaidanan kami ugaid'a di kami papedtadayn nu Kadenan. Aden a entu na papegkasakitan kami ugaid'a di kami bun pebpatay. 10 Ka apia endaw kami man pebpawang na tatap kami pedsangul sa kapatay a mana su nanggula nu Isa al-Masih ka enggu mailay sia sa lekami su uyag-uyag'u Isa al-Masih. 11 Ka taman man a bibiag kami pan na tatap kami pedsangul sa kapatay sabap kanu kabpaginugut'ami kanu Isa al-Masih ka enggu mailay su uyag-uyag'u Isa al-Masih a di 'gkapupus sia kanu badan nami a 'gkapupus bun. 12 Na apia ka maitu sa pedsangul kami sa kapatay sia kanu kabpangusiat'ami ugaid'a nia nin mambu 'gkaunga sa lekanu na uyag-uyag a da taman nin.c
13 Na mana bun su nakadalem kanu kitab a “Sabap kanu paginugut ku na pedtalu aku,”d na maitu kami bun ba, 'bpangusiat kami sabap sa 'bpaginugut kami. 14 Ka 'gkatawan nami i su Kadenan a napambibiag kanu Mapulu tanu a su Isa al-Masih na sekanin bun i mapambibiag sa lekami sia kanu Isa al-Masih ka enggu kami nin mapananggit sia kanu adapan nin a kaped'ami sekanu. 15 Na su langun man nu nia na lekanu a kapianan ka enggu sia makanggulalan kanu kapegkadakel'u makatalima kanu da idsan nin a limu nu Kadenan na 'gkadakel-'gkadakel bun su pakadsukul-sukul a pakapugi kanu Kadenan.
Su Uyag-uyag a Unut su Salig
16 Tembu entu ba i sabap'in sa di kami semangkup sa apia nia nin kaaden i pegkalubay-pegkalubay bun su badan nami ugaid'a pegkabagel-pegkabagel bun mambu su manggiginawa nami kanu uman-uman gay. 17 Kagina su gagalu bu a nia a kamalasayan a 'gkatala nami saguna na madtalu a dikena bun gaid mapasang ka nia nin unga na su dala kapedtaman nin enggu dala pagidsan nin a kabadtugan. 18 Tembu sekami na dikena nami den 'bpagilayn u ngin i matakapala a 'gkailay nu mata nami sia sa dunia ka nia nami den 'bpagilayn na su dikena matakapala a 'gkailay nu mata nami. Kagina su ngin i matakapala a 'gkailay nu mata na 'gkapupus bun ugaid'a su dikena matakapala a 'gkailay nu mata na dala kapegkapupus'in.