Su Bagu a Kapasadan nu Kadenan
3
Aden a entu na madtalu nu menem i ibpemamasela nami i ginawa nami. Na dikena kami pagidsan nu ped a nasisita nilan pan i makadtatanggit sa sulat a pamagel'ilan magidsan pan i san pakatumpa sa lekanu atawa ka san pakabpun sa lekanu. 2 Ka sekanu den man i nabaluy a sulat a 'gkadtatanggit'ami a nakasulat sia kanu pamusungan nami a 'gkasabutan sa mapia enggu 'gkabatia nu apia entain. 3 Na 'gkailay man sa lekanu i sekanu i sulat a ebpun kanu Isa al-Masih a inisulat sia nakanggulalan sa lekami. Su nia a sulat na dikena inisulat sa ukit a dawat ka sia kanu Ruha nu kaisa-isa nin a Kadenan, dikena bun sia inisulat kanu manga tebi nu watu ka sia inisulat kanu pamusungan nu taw.4 Na masela i salig'ami sa benal su pedtalun nami sia kanu adapan nu Kadenan sabap sa nalusud kami kanu Isa al-Masih. 5 Na di nami magaga enggula su langun nu entu sa lekami bu a kapegkagaga. Ka su Kadenan man i 'bpagenggay sa lekami sa kapegkagaga penggula sa entu. 6 Sekanin bun i minaluy sa lekami a kasaligan kanu kapebpayag kanu bagu a kapasadan.b Su nia a kapasadan na dikena su inisulat a kasuguan ka sia i nia kanu Suti a Ruh. Ka su inisulat man a entu a kasuguan na 'bpagagak sa kapatayc ugaid'a su Ruh na 'bpagenggay sa uyag-uyag.
7 Na su kasuguan a entu a pakaagak sa kapatay a inisulat kanu tebi a watu na lu su sigay nu Kadenan kanu kinaenggay nin lun tembu di 'gkadtulikan nu manga taw a Israil su beneng'u Musa ka 'gkaipeng silan ugaid'a pebpapas bun su entu.d Na amaika su entu ka inipailay nu Kadenan i kasigay nin 8 na labi lawan den i kapailay nin kanu sigay nin kanu galebekan sia kanu Ruh nin. 9 Na amaika su galebekan sia kanu inisulat a entu a kasuguan a pakasugat sa kawagib kanu manga taw ka aden lu sigay nu Kadenan na labi lawan den su galebekan a pakaagak kanu taw sa katimbang lun sa ikelas. 10 Ka su sigay nu entu a kasuguan na mibpapas den sabap sa nalawanan nu sigay nu bagu a kapasadan. 11 Na amaika su galebekan a entu a mibpapas ka aden sigay nin na labi lawan den a aden sigay nin su bagu a kapasadan a di 'gkapupus.
12 Tembu da den gilek'ami sa kapebpayag'ami kanu bagu a kapasadan ka masela man i salig'ami sabap kanu langun nu entu. 13 Na dikena kami pagidsan nu Musa a tinangguban nin su beneng'in ka asal'a di 'gkailay nu manga taw a Israil su kapebpapas'u kasigay nu beneng'in. 14 Ka nia nin kabantang na inawan man sa katuntay su manga taw a Israil ka sampay saguna na uman pembatian su danden a kapasadan na mana aden nakadalinding kanu mata nilan ka enggu di nilan mailay su tidtu a maena nu danden a kapasadan. Na nia bu kaawa nu entu na sia bu makanggulalan kanu Isa al-Masih. 15 Tembu sampay saguna na uman pembatian su danden a kapasadan a sia nakanggulalan kanu Musa na nadalindingan pamun su mata nilan. 16 Ugaid'a apia entain menem i semupeg kanu Mapulu na maawa su nakadalinding a entu kanu mata nilan.
17 Na su pedtalun sia a Mapulu na su Suti a Ruh nu Kadenan, na apia entain i aden sa lekanin su Ruh nu Mapulu na makambaya-baya den sekanin. 18 Na sekitanu na naawan den na tanggub'a beneng ka enggu 'gkailay sa lekitanu su sigay nu Mapulu.e Na pembagun tanu nin taman sa makailing tanu sa lekanin a 'bpangiseg-'bpangiseg bun su sigay tanu a ebpun kanu Mapulu a su Ruh nu Kadenan.