2
Tembu nia ku napagitung na di aku den seman sa lekanu amaika makalidu den menem sa ginawa nu. 2 Ka amaika saki man i sabapan na kalidu na ginawa nu na panun pan i kapagkagalaw nu sa laki? Kagina sekanu man i papegkagalaw sa laki. 3 Tembu nia ku pinggula na napapait aku sa sulat sa lekanu paganay ka enggu sa kauma ku san na di den malidu i ginawa ku sa lekanu a papegkagalaw sa laki. Ka masela man i salig ku sa su kagalaw ku na kagalaw nu bun langun. 4 Na su kinasulat ku a entu sa lekanu na dikena malemu kanu ginawa ku taman sa madakel man i nakaigis a lu kanu mata ku sabap kanu kapegkalidu na ginawa ku. Ugaid'a dikena nia nin maena i 'bpelidun ku i ginawa nu ka papegkatawan ku bu sa lekanu u endaw taman i kapegkalimu ku sa lekanu.Su Kaampun kanu Mindusa
5 Na pantag menem kanu taw a entu a pembaladusa na dikena saki bu i malidu i ginawa nin sa entu ka apia ngin den na langun nu na malidu bun i ginawa nin sa entu amaika dikena aku menem pedsusubela sa kapedtalu ku sa entu. 6 Ugaid'a nasasangan den man kanu entu a taw su inisiksa lun a napamagayunan nu kadakelan kanu 'bpamaginugut. 7 Ka nia man dait na ampun nu sekanin saguna enggu pagkabagel'u i manggiginawa nin ka enggu di kasubelan na lidu na ginawa. 8 Kagina ka maitu na 'bpangenin ku sa lekanu i ipagedam'u sa lekanin sa mapia su limu nu lun. 9 Na nia pan sabapan na kinasulat ku a entu sa lekanu paganay na asal'a katawan ku u ngintu, saben-sabenal a 'bpaginugutan nu su inisugu ku sa lekanu? 10 Na apia entain i ampunen nu, na ampunen ku bun. Na sia sa laki na u ngin i dait a ampunen kanu entu a taw na inampun ku den. Na pinggula ku i entu kagina su entu na lekanu bun a kapianan sia kanu adapan nu Isa al-Masih 11 asal'a di tanu kapamakutan mamagakal'u Datu na Giadsal kagina katawan tanu man a benal su ngin i manga mawag a kahanda nin.
Su Dala Kapagilaya ni Bulus kani Titus lu sa Truas
12 Na guna aku makauma lu sa dalepa a Truasa ka ibpangusiat ku su Mapia a Tutuma pantag kanu Isa al-Masih na inadil'u Isa al-Masih sa laki su ukit sa kabpangusiat ku pantag sa lekanin sa dala nakaungen lun. 13 Ugaid'a apia ka maitu na dala bun malilintad i manggiginawa ku sabap sa da kami makapagilaya kanu lusud tanu sa tian sa paginugut a si Titus. Na guna su maitu na nagetaw aku kanu 'bpamaginugut lu, ka tinemalus aku lu sa Masidunia.
Su Kambantas a sia Makanggulalan kanu Isa al-Masih
14 Ugaid'a sukul-sukul kanu Kadenan ka sabap kanu kinaisa tanu kanu Isa al-Masih na lalayun tanu nin 'bpangunanan a mana tanu ipegkuyug a nataban nin. Su Kadenan bun i pabpelapat kanu ilemu pantag kanu Masih sa kanu apia endaw a dalepa sia makanggulalan sa lekami. Na su nia a ilemu na mana kamut'u kamutan. 15 Kagina sia kanu Kadenan na mana kami baw nu mamut a kurban a su Isa al-Masih. Na 'gkabaw su entu nu apia entain a taw magidsan pan i 'gkalipuas atawa ka pakaidtug sa naraka a taw. 16 Na sia kanu manga taw a makaidtug sa naraka na nia nami baw na pakapatay. Ugaid'a sia menem kanu manga taw a malipuas na nia nami baw na pakauyag. Na entain ba man i makagaga lun i entu enggula a galebekan? 17 Ugaid'a sabap sa nalusud kami kanu Isa al-Masih enggu pinamili kami nu Kadenan a masugu nin na 'gkanggula nami su entu sia kanu adapan nu Kadenan sa senep sa atay, dikena pagidsan nu madakel a taw a ibpamantiali nilan su kadtalu nu Kadenan asal'a makagkuleta silan.