Su Tabang kanu 'Bpamaginugut lu sa Awrusalim
16
Na pantag menem kanu 'bpelimuden a ipedtabang kanu 'bpamaginuguta na nia nu ilingi na su ngin i inisugu ku kanu manga lumpukan nu 'bpamaginugut sa Galasia 2 sa uman muna-muna a gay nu sakapadian na pedsenggay su uman i isa sa ibpagenggay nilan sia luyud kanu ngin i 'gkapantiali nilan ka enggu sa kauma ku san na naadil den su entu. 3 Na amaika makauma aku den san, na sugun ku su apia entain a mapamili nu a makasigkil sa tabang'u lu sa Awrusalim enggu padtapiken ku sa sulat pantag kanu manga tabang a entu. 4 Ugaid'a amaika nia mapia i unutan ku silan sa kasigkil lun na unutan ku silan.Su manga Kahanda ni Bulus
5 Na nia ku kahanda sa kanu kasan ku na maut aku pan muna sa Masidunia. 6 Na basi malu matana-tana aku san sa lekanu enggu aden a entu na san aku taman sa kapupus'u timpu na kapembalat ka enggu aku nu kadtabangan sa kanu kabpelalakaw ku. 7 Na di ku kalinian i mukit aku bu san ka nia ku kalinian na makadtangen aku pan san sa lekanu amaika menem ka isugut'u Mapulu. 8 Ugaid'a nasisita a edtangen aku pan sia sa Ipisu taman sa kanu Kanduli nu Pintikusb 9 kagina mapia i timpu ku sia sa kapenggalebek ku kanu galebekan kanu Kadenan apia nia nin kaaden i madakel bun i pedsungkang sia kanu entu.
10 Na amaika makauma san si Timuti na sakaw nu sekanin sa mapia ka enggu malilintad i ginawa nin ka pagidsan ku bun sekanin a penggulalan kanu galebekan kanu Mapulu. 11 Tembu ba enggi nu sekanin sa alaga. Na amaika embalingan den sekanin sia na paganat'u sekanin sa malilintad ka 'gkapangingalap ku man a benal sekanin taman den kanu manga suled sa paginugut sia.
12 Na pantag menem kanu suled tanu a si Apulus na inibpaliugat ku lun mangeni i seman pan sa lekanu apeg'u ped pan a manga suled sa paginugut ugaid'a di pan 'gkatelang i ginawa nin sa kasan nin saguna ugaid'a seman bun sekanin u aden a nia manga kutika nin.
Su Nauli a Papata enggu su Salam
13 Na tatap kanu edsipat. Pakabagel'u i tindeg'u sa kasalig enggu pakawalaw nu i aki nu taman sa pakabagel'u i ginawa nu. 14 Na apia ngin i enggulan nu na enggula nu sa aden kakalimu nin.
15 Manga lusud ku sa tian, katawan nu bun i si Istipanas taman den kanu sakambinabatan nin, na silan i pagan-paganayan a nabaluy a 'bpamaginugut sa dalepa a Akaya enggu pinggula nilan i endaw i taman i nagaga nilan kanu 'bpamaginugut. 16 Na 'bpangenin ku sa lekanu i ibaba nu i ginawa nu kanilan enggu su manga ped pan a pagidsan nilan a gumagalebek kanu Kadenan.
17 Na sangat man a napia i ginawa ku sa kinasia ni Istipanas, Purtunatus enggu Akayus ka penggalebeken nilan su di nu 'gkanggalebek sabap sa dala kanu sia. 18 Pinagkapia nilan i ginawa ku taman den sa lekanu. Tembu ba su maya ba a manga taw na dait a enggi nu sa alaga.
19 Pedsalamen kanu nu manga lumpukan nu 'bpamaginugut sia sa prubinsia a Asia. Na sia kanu Mapulu tanu na pedsalamen kanu bun ni Akila enggu Prisila taman den kanu ped a 'bpamaginugut a pendidilimudan sa kanu walay nilan. 20 Na pedsalamen kanu bun nu langun nu ped pan a suled sa paginugut sia. Na salamen na uman i isa i ped'in sia luyud kanu kinasuti lun nu Kadenan. 21 Na pedsalamen ku bun sekanu. Na saki demun mismu i sinemulat kanu nia a salam ku. 22 Na kamulekan su apia entain a di nin ikalimu su Mapulu. Hu Mapulu, embalingan ka den man! 23 Na san sa lekanu su dala idsan nin a limu nu Mapulu tanu a su Isa al-Masih 24 enggu sia luyud sa lekanin na ipegkalimu ku sekanu langun.
Wassalam