Su Kinapambibiag kanu Isa al-Masih
15
Manga lusud ku sa tian, papedtademan ku sa lekanu su Mapia a Tutuma a inipangusiat ku sa lekanu a natalima nu enggu sampay saguna na 'bpaninindegan nu. 2 Na sia nakanggulalan kanu entu na nakalipuas kanu amaika menem ka papanalusen nu su katagu nu sa ginawa kanu Mapia a Tutuma ka amaika di nu itagu sa ginawa na kaawan na katagan su kabpaginugut'u.3 Na initapenay ku den man sa lekanu su balapantag sa langun a panduan a natalima ku. Su entu a panduan na su Isa al-Masih na saben-sabenal a minatay sekanin sabap kanu kabaladusan tanu a mana su nakasulat kanu kitab. 4 Inilebeng enggu pinambibiag sekanin 'bpaluman kanu ikatelu nin gay a mana bun su nakasulat kanu kitab. 5 Na mibpayag sekanin kani Kipas enggu mibpayag bun kanu ped kanu sapulu enggu dua a pinamili.a 6 Na mibpayag bun sekanin kanu 'bpamaginugut a mindidilimudan a labi lima gatus i kadakel'in. Na sampay saguna na bibiag pamunb i kadakelan kanilan ugaid'a su ped na namamatay den. 7 Na mibpayag bun sekanin kani Yakub, entu pan ka kanu langun nu pinamili nin a sinugu. 8 Na saki i nauli den a pibpayagan nu Isa al-Masih apia nia nin kaaden i mana aku bun su wata kanu didalem'u tian a ginememaw sa dikena nin pan uras.c 9 Ka saki man i mababa sa langun kanu manga pinamili nin a sinugu enggu di ku dait i bedtuan sa pinamili a sinugu kagina pinamungkaidanan ku su 'bpamaginugut kanu Mapia a Tutuma a ebpun kanu Kadenan. 10 Ugaid'a sabap kanu da idsan nin a limu nu Kadenan na binaluy aku nin a masugu nin. Na su limu nin a entu a inenggay nin sa laki na dala kaawi na katagan. Ka sangat man a pidtantuanan ku enggalebek su galebekan sa lekanin kumin kanu ped a manga sinugu ugaid'a nanggula ku i entu sabap kanu da idsan nin a limu nu Kadenan sia sa laki dikena sa laki demun a kapegkagaga. 11 Na apia entain sa lekami na isa bu i ibpangusiat'in enggu entu bun ba su pinaginugutan nu.
Su Kambibiag 'Bpaluman nu Namamatay
12 Na amaika su Isa al-Masih ka ibpangusiat i pinambibiag sekanin 'bpaluman ulian nu kinapatay nin na ngintu ka su ped sa lekanu na pedtalun nilan i dala kambibiag 'bpaluman nu namamatay? 13 Na amaika dala kambibiag 'bpaluman nu namamatay na dala bun maitun pambibiaga 'bpaluman su Isa al-Masih. 14 Na amaika dala sekanin pambibiaga 'bpaluman na dala katagan nu ibpangusiat'ami enggu dala bun katagan nu kapedsalig'u. 15-16 Nia nin maena na pakambudtud kami kanu ibpangimbenal'ami a pinambibiag 'bpaluman nu Kadenan su Isa al-Masih kagina amaika dala kambibiag 'bpaluman nu namamatay na dala bun pambibiaga 'bpaluman su Isa al-Masih. 17 Na amaika dala pambibiaga 'bpaluman su Isa al-Masih na dala katagan nu kapedsalig'u. Dala pamun besen maampun su kabaladusan nu 18 enggu apia su namamatay a nalusud kanu Isa al-Masih na makaidtug besen sa naraka. 19 Ka amaika su inam tanu kanu Isa al-Masih ka sia bu taman kanu uyag-uyag tanu a nia sa dunia, na sekitanu den i duan-duan nin kanu langun nu taw.
20 Ugaid'a su Isa al-Masih na saben-sabenal a pinambibiag sekanin 'bpaluman. Na entu ba i pebpagilay sa natatalanged a embibiag 'bpaluman su namamatay.d 21 Na kagina ka naaden su kapatay sia nakanggulalan kanu sakataw a taw na naaden bun su kambibiag 'bpaluman nu namamatay sia nakanggulalan kanu sakataw a taw. 22 Ka sabap sa tupu tanu nu Adam na matay tanu langun. Ugaid'a sabap kanu Isa al-Masih na makambibiag tanu langun a nalusud sa lekanin. 23 Ugaid'a uman i isa na aden natatalanged a kutika nin sa kapambibiag lun 'bpaluman: Su Isa al-Masih i muna-muna a pinambibiag 'bpaluman, entu pan ka su manga taw a nalusud sa lekanin sia kanu kambalingan nin sa dunia. 24 Na mauma den ba a entu su kapupus kanu langun, na pupusen den nu Isa al-Masih su langun nu aden bagel'in sa kakamal, su 'bpamendatu enggu su langun nu aden manga bagel'in a di 'gkangailay, entu pan ka itapenay nin den kanu Ama a su Kadenan su kandatu nin. 25 Kagina dait man a endatu su Isa al-Masih taman sa makapasugiud'in kanu palad'a ay nin su langun nu kuntela nin. 26 Na nia den mauli a kuntela a binasan nin na su kapatay. 27 Ka nia man nakadalem kanu kitab na “Pinandatuan nu Kadenan sa lekanin su langun-langun.”e Ugaid'a entu pan ka pidtalu a “Pinandatuan sa lekanin su langun-langun,” na dikena nia nin maena i pakalalagit'in 'gkandatuan su Kadenan a napandatu sa lekanin kanu langun-langun. 28 Na amaika kandatuan den nu Isa al-Masih su langun-langun na apia sekanin a Tunggal'u Kadenan a pinandatu nin na pandatun nin su Kadenan sa lekanin. Na amaika maitu na kandatuan nu Kadenan su langun-langun.
29 Na amaika saben-sabenal a dala kambibiag 'bpaluman nu namamatay na ngintu ka aden manga taw a papedsalawat sabap kanu manga namamatay? 30 Na ngintu ka sekami na apia 'gkatawan nami den i kagkaidan kami kanu uman kutika kanu nia a galebekan na ipedtalus'ami bun? 31 Manga lusud ku sa tian, mana aku bun man pedsangul sa kapatay kanu uman-uman gay! Na dikena i nia kalebutan ka nia nin pagidsan sa kabenal na su kabpemamasela ku sa lekanu sabap kanu kinaisa nu kanu Mapulu tanu a su Isa al-Masih. 32 Na amaika su nanggula ku a entu sa dalepa a Ipisu a timbang a mimbunua aku sa talaw a binatang ka sia bu sa dunia i katagan nin ka dala besen kambibiag 'bpaluman nu namamatay na dala besen kapianan nin i entu sa laki. Na amaika maitu na “Makin tanu mamakut keman enggu minem ka aden a entu na namag na matay tanu den.”f 33 Na da kanu man mapapagakal. Ka mana bun su kadtalu a “Su tagapeda a dupang na pakabinasa kanu mapia a ula-ula.” 34 Na imaman kanu man sa mapia. Taligkudani nu su kapembaladusa ka su ped man sa lekanu na dikena pakasugat i kinatuntay nilan kanu Kadenan. Na pedtalun ku i nia sa lekanu ka enggu nu 'gkatun i kaya nu.
35 Na aden a entu na su ped sa lekanu na makaidsa nin i “Panun basi i kapambibiag 'bpaluman kanu namamatay? Ngin basi i palas'a lawas'ilan?” 36 Nia ku makasawal kanu maitu ba a manga taw a dala sabut'in na: Di man metu su lagas nia tabia na katangguban pan na lupa.g 37 Na apia ngin i ipembubul'engka magidsan i bantad atawa ka ped a pamumulan na dikena nia nengka ipembubul su lawas'in ka nia nengka ipembubul na su lagas'in, na amaika metu den su entu na salakaw den a lawas. 38 Na su Kadenan i 'bpagenggay sa lawas kanu lagas a entu sia luyud kanu ngin i kiug'in. Na uman i lagas na aden lawas a inenggay lun nu Kadenan a nakadait lun. 39 Na dikena langun na lawas na pamagidsan ka aden lawas'a taw, aden lawas'a binatang, aden lawas'a papanuk enggu aden lawas'a seda. 40 Na apia su manga lawas'u pinangaden kanu kawang-kawangan na embidaya i kapia na palas'in kanu pinangaden sia sa lupa. 41 Apia su senang na embidaya i kasigay nin kanu ulan-ulan, maitu bun ba su kasigay nu bitun. Na apia su manga bitun na embibidaya bun i kasigay nilan.
42 Na maitu bun ba sia kanu kambibiag 'bpaluman nu namamatay. Na su badan a inilebeng na maledak i entu ugaid'a su badan a pambibiagen na di den maledak taman sa taman. 43 Na su badan a ibpelebeng na dikena den mapia enggu malubay ugaid'a amaika pambibiagen 'bpaluman na mapia den enggu mabagel. 44 Na su ibpelebeng, na badan sia sa dunia ugaid'a su pambibiagen 'bpaluman na badan den sa sulega. Ka amaika aden badan sa dunia na aden bun badan sa sulega.
45 Na mana bun man su nakadalem kanu kitab a su muna-muna a taw a su Adam na pinambalangiawa.h Ugaid'a su nauli a Adami na nabaluy sekanin a 'bpangenggay sa uyag-uyag. 46 Ugaid'a dikena nia nauna i badan sa sulega ka nia nauna na su badan sa dunia entu pan ka su badan sa sulega. 47 Na su muna-muna a taw na ebpun sa dunia ka linimbag ebpun sa libubuk ugaid'a su nakatundug a taw na ebpun sa sulega. 48 Na pagidsan su badan nu langun na taw sa dunia kanu muna-muna a entu a taw ugaid'a su badan nu taw a makasulega na makapagidsan kanu taw a entu a ebpun sa sulega. 49 Na u ngin i kapagidsan tanu kanu taw a linimbag ebpun sa libubuk na mauma bun i timpu a makapagidsan tanu bun kanu taw a ebpun sa sulega.
50 Manga lusud ku sa tian, nia ku ba a entu pedtalun sa lekanu na su matakapala a nia a badan tanu na di masulut a makaamung kanu kapendatu nu Kadenan atawa ka su 'gkaledak na di mapakay kanu da kapedtaman nin a lu sa sulega.
51 Na pakikineg kanu, pedtalun ku sa lekanu su nakapagena a kahanda nu Kadenan a dikena langun tanu na temala sa kapatayj ugaid'a natatalanged a langun tanu na kasambian i badan nin. 52 Na sakelap mata bu i kanggula sa entu sia kanu mauli den a kayup kanu tambuli kagina amaika yupen den su tambuli na pambibiagen den su namamatay enggu di den matay 'bpaluman enggu sambian den su badan tanu. 53 Kagina nasisita man a kasambian su badan tanu a nia a 'gkaledak enggu aden papatayan nin kanu badan a di den 'gkaledak enggu da den papatayan nin. 54 Ka amaika kasambian den su 'gkaledak a nia a badan a aden papatayan nin kanu di den 'gkaledak enggu da den papatayan nin a badan na entu den ba su gay a natuman su nakadalem kanu kitab a
“Nabinasa nin den su kapatay ka natalutup den su kinapanaban.”k
55 “Endaw den su kapanaban nu kapatay? Endaw den su kabisa nin?”l
56 Aden bu man bisa nu kapatay sabap kanu kabaladusan enggu aden bagel'u kabaladusan sabap kanu kasuguan.m 57 Ugaid'a sukul-sukul kanu Kadenan ka sekanin i napapanaban sa lekitanu sia nakanggulalan kanu Mapulu tanu a su Isa al-Masih! 58 Tembu ba manga lusud ku sa tian a ipegkalimu ku na pakabagel'u i tindeg'u sa lekanin enggu di nu papegkalubay i salig'u sa lekanin. Tatap'u enggula i endaw i taman a magaga nu sa kanggalebek kanu galebekan kanu Mapulu ka 'gkatawan nu man i di kaawan na katagan su galebekan nu sa lekanin.