Su Kapedtalu sa Embalang-balang a Basa enggu Kapayag kanu Kadtalu nu Kadenan
14
Paginapas'u su kakalimu enggu paginagkay nu kemua su manga kapegkagaga a ebpun kanu Suti a Ruh nu Kadenan labi den su kapayag kanu kadtalu nu Kadenan. 2 Kagina su manga taw a pedtalu sa embalang-balang a basa na dikena nia nin ipembitiala su taw ka su Kadenan kagina dala pakatuntay sa lekanin. Na pakadtalu bu sekanin sa maitu ba a nakapagena i maena nin sia kanu tabang'u Suti a Ruh. 3 Ugaid'a su taw a pebpayag kanu kadtalu nu Kadenan na nia nin ipembitiala na su taw ka pakapagkabagel'in i salig'ilan enggu manggiginawa nilan taman sa aden kalilintad'u pamusungan nilan. 4 Na su taw man a pedtalu sa embalang-balang a basa na nia nin pakapagkabagel na su ginawa nin ugaid'a su taw a pebpayag kanu kadtalu nu Kadenan na nia nin pakapagkabagel na su umpungan nu 'bpamaginugut. 5 Na kalilinian ku man a benal i makadtalu kanu langun sa embalang-balang a basa ugaid'a labi a kalilinian ku u mayag kanu sa kadtalu nu Kadenan. Ka labi man a mapia su taw a pebpayag kanu kadtalu nu Kadenan kumin kanu taw a pedtalu sa embalang-balang a basa, nia bu tabia na amaika aden mapatuntay sa u ngin i maena nu pedtalun nin a entu asal'a makapagkabagel kanu lumpukan nu 'bpamaginugut.6 Manga lusud ku sa tian, ngin i kapianan nin sa lekanu u seman aku a edtalu sa embalang-balang a basa? Dala, nia tabia a aden kapianan nin sa lekanu na amaika seman aku a aden makapangusiat ku sa lekanu a inipayag'u Kadenan sa laki atawa ka pinakatawan nin sa laki atawa ka su kadtalu nin enggu su manga panduan. 7 Na apia su manga palabuni-bunian a dala uyag-uyag'in a mana su palendag atawa ka su kubing ka u di mapia i kapauni lun na di kasabutan u ngin a uni i ipebpaguni lun. 8 Na amaika su tambuli ka di mapia i kapauni lun na panun i katuntay nu manga sundalu lun asal'a makapagadil silan sa kambunua? 9 Na maitu bun ba amaika edtalu kanu sa embalang-balang a basa na panun ba i katuntay lun u ngin i maena nu pedtalun nu? Nia nu nalagidan na mana kanu bun pembitiala sa sambel. 10 Na nia nin kabantang na madakel man i basa sa dunia. Na uman i isa kanu langun nu entu na aden maena nin. 11 Ugaid'a amaika di ku 'gkasabutan i pedtalun sa laki nu taw na mana bun sekanin lapu sa laki enggu maitu aku bun, mana aku bun lapu sa lekanin sabap sa di kami pakadsabuta. 12 Tembu sekanu, na kagina ka 'gkapaginagkay nu a benal i kapegkagaga a ebpun kanu Suti a Ruh na makin nia nu paginagkay kemua na su kapegkagaga a makapagkabagel kanu umpungan nu 'bpamaginugut.
13 Na kagina ka maitu na su taw a inenggan sa kategelan sa kadtalu sa embalang-balang a basa na ipangeni-ngeni nin bun i enggan sekanin sa kategelan sa kapatuntay kanu maena nu pedtalun nin a entu. 14 Kagina amaika mangeni-ngeni aku sa embalang-balang a basa na ebpun kanu atay ku su entu, dikena ebpun kanu itungan ku. 15 Na amaika maitu na ngin ba i dait a enggulan ku? Nia ku enggulan na mangeni-ngeni aku sa ebpun kanu atay ku enggu mangeni-ngeni aku bun sa ebpun kanu itungan ku. Edsengal aku sa kapugi kanu Kadenan sa ebpun kanu atay ku enggu edsengal aku bun sa kapugi sa Kadenan sa ebpun kanu itungan ku. 16 Ka u dikena maitu na panun i kasumpat sa “Amin” nu 'bpamakikineg kanu ipedsukul-sukul sabap sa di nilan 'gkasabutan, 17 na apia mapia pan a benal su ipedsukul-sukul na di bun makapagkabagel kanu ped. 18 Na saki na pedsukul-sukul aku kanu Kadenan ka pakadtalu aku sa embalang-balang a basa a lawan pan sa lekanu. 19 Ugaid'a apia ka maitu na sia kanu kandidilimudan nu 'bpamaginugut na nia ku tinemu i lima taga bu i madtalu ku a 'gkasabutan a makaenggay sa pamandu kanu ped kumin sa ngibu-ngibuan a kadtalu a dala pakasabut lun.
20 Manga lusud ku sa tian, na di nu papedsisiwata i itungan nu makapantag kanu nia. Sia kanu manga galebekan a dikena mapia na nia nu menem ilingi na su manga wata a da pamun sabut'ilan sa kanggalebek sa mawag ugaid'a su kapagitung'u na pakatua nu. 21 Na nia nakadalem kanu kitab na “Nia pedtalun nu Kadenan na ‘Edtaluan ku su nia a manga taw sia makanggulalan kanu manga basa nu ped a taw enggu kadtalu nu manga lapu a taw ugaid'a di bun silan mamakikineg sa laki.’ ”a 22 Na su kapedtalu man sa embalang-balang a basa na inenggay a tanda sa kanu manga taw a dikena 'bpamaginugut, dikena kanu manga taw a 'bpamaginugut. Ugaid'a su kapayag kanu kadtalu nu Kadenan na inenggay a tanda i entu kanu manga taw a 'bpamaginugut, dikena kanu manga taw a dikena 'bpamaginugut. 23 Tembu sia kanu kandidilimudan nu 'bpamaginugut na amaika edtalu kanu langun sa embalang-balang a basa na nia mapagitung'u dikena 'bpamaginugut a makauma sa lekanu a da sabut'in kanu entu na 'gkangabuneg kanu. 24 Ugaid'a amaika nia nilan kauman sa lekanu i pebpayag kanu langun sa kadtalu nu Kadenan na matagu sa ginawa nilan i baladusa silan enggu kaimamanan nilan su tidtu a 'gkambebetad'ilan 25 taman sa mapayag su namakapagena kanu atay nilan tembu ba makasugiud silan ka simban nilan su Kadenan enggu nia nilan madtalu na “Saben-sabenal a san sa lekanu su Kadenan.”
Su Atulan sa Kausal kanu Kapegkagaga sia kanu Kasimba kanu Kadenan
26 Manga lusud ku sa tian, na panun ba i kanggula nu kanu langun nu entu? Na nia nu enggula na sia kanu kandidilimudan nu na su ped sa lekanu na edsengal sa kapugi kanu Kadenan, su ped menem na mamandu, su ped menem na mayag kanu kahanda nu Kadenan, su ped menem na edtalu sa embalang-balang a basa enggu su ped menem na mapatuntay kanu maena nu entu. Na enggula nu su langun nu entu ba sa kagkabagel'u umpungan nu 'bpamaginugut. 27 Na su edtalu sa embalang-balang a basa na manga dua kataw atawa ka telu kataw bu. Edsusukelia bu silan sa kadtalu enggu aden bun mapatuntay kanu maena nu pedtalun nilan. 28 Ugaid'a amaika dala makapatuntay kanu maena nu pedtalun nilan a entu na di den silan edtalu sa maitu sia kanu kandidilimudan nilan. Lu nilan bun den i entu edtalun kanu Kadenan. 29 Na su dait a pebpayag kanu katigan nu Kadenan na dua kataw atawa ka telu kataw bun ka su ped menem na silan i edtimbang-timbang lun milay su inipayag a entu. 30 Na amaika su 'bpamakikineg ka aden pebpayagan nu Kadenan kanu katigan nin na temelen pan su nauna ka pasukeli nin pan su pinayagan a entu. 31 Ka mapakay man a benal a makadsusukelia kanu langun mayag sa kadtalu nu Kadenan ka enggu kanu makapagenggaya sa kataw ebpun kanu Kadenan taman sa 'gkabagel i manggiginawa nu uman i isa sa lekanu. 32 Na su manga pebpayag kanu katigan a ebpun kanu Kadenan na katawan nilan kemumpen su kapegkagaga nilan 33 kagina su Kadenan na dikena Kadenan nu kasamukan ka Kadenan nu kalilintad.
Na mana bun kanu langun nu lumpukan nu 'bpamaginugut a sinuti nu Kadenan, 34 na nia dait kanu manga babay na di den edtalu ka makikineg bu sia kanu kapendidilimudan nu 'bpamaginugut kagina dikena inisugut kanilan i kadtalu sia kanu kandidilimudan. Na nia dait a enggulan nilan lu na ibaba nilan i ginawa nilan a mana bun su nakadalem kanu kasuguan. 35 Na amaika aden 'gkalinian nilan pedtuntay na idsa nilan bun den kanu kaluma nilan sia kanu kauma nilan kanu walay nilan. Kagina kayayan kanu manga babay i edtalu sia kanu kapendidilimudan nu umpungan nu 'bpamaginugut.
36 Na di nu 'bpagitung i sekanu i 'gkabpunan nu kadtalu nu Kadenan atawa ka sekanu bu i napangusiatan sa entu. 37 Na apia entain i nia nin kalangan sa ginawa nin i inenggan sa kapegkagaga sa kapayag kanu kadtalu a ebpun kanu Kadenan atawa ka apia ngin a kapegkagaga a ebpun kanu Suti a Ruh na dait a taliman nin i su inisulat ku a nia sa lekanu na kasuguan a ebpun kanu Mapulu. 38 Na apia entain i dili mamamantag kanu nia ba na di bun sekanin ipamamantag.