Su Kabalapantag'u Kakalimu
13
Na apia makadtalu aku paman sa embalang-balang a basa nu manga taw enggu kanu manga malaikat amaika dala sa laki su kakalimu na mana aku bun su agung atawa ka gandingan a pabpagunin sa pakaingel bu. 2 Na apia aden sa laki su kapegkagaga sa kapayag kanu kadtalu nu Kadenan enggu katuntay kanu langun a nakapagena a kahanda nu Kadenan enggu katuntay kanu langun nu pantag sa lekanin taman sa aden sa laki su masela a salig a mapakay a makapaalat ku su manga palaw amaika dala sa laki su kakalimu na da bun katagan ku a taw. 3 Na apia ipangenggay ku paman su langun na kaaden ku enggu inggihad ku su badan ku asal'a makamamasela kua amaika dala sa laki su kakalimu na da bun makua ku lun a guna-guna.4 Su taw a aden sa lekanin su kakalimu na matigkel, mapia i palangay nin, di masekel, di masandag enggu di emamasela. 5 Baliadaten sekanin, dikena nia nin bu pagitungen na su ginawa nin, di malemu malipunget, di temagu sa sakit'a ginawa, 6 di malilini sa mawag a galebek ka nia nin kalinian na su ngin i tidtu enggu bantang. 7 Su taw a malimu na kadsabalan nin su langun-langun, di maawa sa lekanin su kasalig, di kaawan na inam, katigkelan nin su apia ngin.
8 Na apia su kapebpayag kanu kadtalu nu Kadenan na 'gkapupus bun ugaid'a su kakalimu na da kapegkapupus'in. Maitu bun ba su kategelan sa kadtalu sa embalang-balang a basa na pedtaman bun, apia su kapapedtuntay kanu kahanda nu Kadenan na 'gkapupus bun. 9 Ka paidu man i kapegkatuntay tanu, maitu bun su kapebpayag tanu kanu kadtalu nu Kadenan. 10 Ugaid'a su paidu a entu a kapegkatuntay tanu enggu su paidu a kapebpayag tanu kanu kadtalu nu Kadenan na di den nasisita amaika mauma den su timpu a matalutup den su langun-langun.
11 Kanu timpu a wata aku pan na nia ukit a kangadtalu ku na wata pamun. Maitu bun su ukit a kapagitung ku enggu kakenal ku. Ugaid'a saguna a dikena aku den wata na tinagak ku den su langun nu ukit'u kasisiwatay. 12 Saguna na mana tanu 'bpagalung sa malebug a pagalungan ugaid'a mauma bun i timpu a makapagadapa tanu sekanin.b Paidu pamun i kapegkilala tanu sa lekanin ugaid'a mauma i timpu a makilala tanu sekanin sa tidtu a mana bun su kapegkilala nin sa lekitanu. 13 Na mapupus su langun-langun ugaid'a nia di mapupus na su telu timan a nia a mana su kasalig, su inam enggu su kakalimu ugaid'a nia balapantag kanu langun nu entu ba na su kakalimu.