Su manga Kapegkagaga a ebpun kanu Ruh nu Kadenan
12
Na manga lusud ku sa tian, nia ku kalinian na katuntayan nu su manga kapegkagaga a ebpun kanu Ruh nu Kadenan. 2 Na katawan nu bun i kanu timpu a da pan sabut'u kanu Kadenan na pinasibay kanu ka nia inipasimba sa lekanu na su pegkakadenanen a dala uyag-uyag'in. 3 Na tembu ba dait a katuntayan nu i dala taw a linangkapan nu Ruh nu Kadenan a makadsinta nin su Isa al-Masih enggu dala bun taw a makadtalu sa “Su Isa al-Masih na Mapulu,” amaika dala sa lekanin su Suti a Ruh.4 Na madakel man i embalangan nu inenggay a kapegkagaga ugaid'a isa bu i nabpunan nin ka su Ruh nu Kadenan bu. 5 Madakel bun i ukit a kanggalebek ugaid'a isa bu i penggalebekan ka su Mapulu bu 6 enggu madakel bun i embalangan na ipapenggalebek'u Kadenan ugaid'a isa bu i 'bpagenggay sa lekitanu langun sa kapegkagaga sa kanggalebek sa langun nu entu ka su Kadenan bu. 7 Na uman i isa na 'bpagenggan sa kapegkagaga a makapailay i lu kanilan su Ruh nu Kadenan. Na ibpagenggay su entu asal'a mausal sa kadtabang kanu uman i isa. 8 Na aden 'bpagenggan nu Suti a Ruh sa kapayag kanu ilemu nu Kadenan, aden bun 'bpagenggan nin sa katuntay sa kanu ngin i pegkiugan nin pebpayag kanu taw. 9 Na aden bun 'bpagenggan nu Suti a Ruh sa mabagel a kasalig, aden bun 'bpagenggan nin sa kapagkapia kanu pedsakit. 10 Sekanin bun i 'bpagenggay kanu taw sa kanggula sa kangagaipan, aden bun 'bpagenggan nin sa kapayag kanu kadtalu nu Kadenan, aden bun 'bpagenggan nin sa katuntay sa su kapegkagaga a entu na ngintu ebpun kanu Suti a Ruh atawa ka dikena. Na aden bun 'bpagenggan nu Suti a Ruh sa kategelan sa kadtalu sa embalang-balang a basa enggu aden bun 'bpagenggan nin sa kapatuntay kanu embalang-balang a entu a basa. 11 Na su langun nu entu a kapegkagaga na isa bu i 'gkabpunan nin ka su Suti a Ruh nu Kadenan a pakatuki kanu uman i isa sia luyud kanu kahanda nin.
Su Madakel a Edsiap-siapan nu Sakabadan
12 Na mana bun su badan a matag sawalu bu enggu madakel i edsiap-siapan nin na sakabadan bu langun su entu, na maitu bun ba su Masih. 13 Kagina langun-langun tanu, magidsan pan i Yahudi atawa ka dikena, ulipen atawa ka dikena na isa bu i inisalawat sa lekitanu ka su Suti a Ruh asal'a mabaluy tanu a mana sakabadan enggu isa bu a Ruh i natalima tanu langun.a
14 Na su badan man na dikena satiman bu i edsiap-siapan nin ka madakel. 15-16 Na di madtalu nu ay i “Sabap sa dikena aku lima na dikena aku luyud kanu badan,” atawa ka di madtalu nu tangila i “Sabap sa dikena aku mata na dikena aku luyud kanu badan,” ka dikena nia nin maena i ay silan atawa ka tangila silan na dikena den silan luyud kanu edsiap-siapan nu badan. 17 Ka amaika su badan ka mata bu langun na panun den i kakineg'in? Amaika menem ka tangila bu langun na panun den i kabaw nin? 18 Ugaid'a nia nin kabantang na su Kadenan man i nametad kanu uman i edsiap-siapan nu badan sia luyud kanu kahanda nin. 19 Na di madtalu a badan su badan amaika satiman bu i edsiap-siapan nin. 20 Na nia nin kabantang na madakel man i edsiap-siapan nu badan ugaid'a matag madakel na sakabadan bu. 21 Na di madtalu nu mata kanu lima i “Dikena ku seka nasisita,” enggu di bun madtalu nu ulu kanu manga ay i “Dikena ku sekanu nasisita.” 22 Ka nia pan mula na su edsiap-siapan nu badan a mana malubay na entu ba i nasisita a benal. 23 Na su edsiap-siapan nu badan a dikena gaid mapia i kapegkailay lun na entu ba i pedtiakapan sa mapia. Na maitu bun ba su edsiap-siapan nu badan a nia tanu lun kapegkailay na pakaya kanu taw na entu ba i pedtangguban tanu sa mapia. 24 Ugaid'a su manga edsiap-siapan a dikena pakaya na di den nasisita a pedtangguban pan. Na inatul'u Kadenan sa maitu ba sa nia nin inenggan sa kabalapantag na su ipedtimbang sa dikena balapantag 25 ka enggu di manggula su kabpipitas ka makin nia manggula na kaenggan na uman i isa sa kabalapantag su ped'in. 26 Ka amaika pedtala sa kapasang su satiman a edsiap-siapan na langun nu edsiap-siapan na pakagedam sa entu. Na maitu bun ba amaika mapamedta su satiman a edsiap-siapan na 'gkapia i ginawa nu langun nu edsiap-siapan.
27 Na sekanu a 'bpamaginugut na sekanu su badan nu Isa al-Masih. Na uman i isa sa lekanu na edsiap-siapan nu badan nin. 28 Na sia kanu umpungan nu 'bpamaginugut na nia muna-muna a pinamili nu Kadenan a inibetad'in na su manga sinugu, temundug na su manga nabi a makapayag kanu kadtalu nin entu pan ka su 'bpamamandu. Na inaden nin bun kanu umpungan nu 'bpamaginugut su manga pakanggalebek sa kangagaipan, su pakapagkapia kanu pedsakit, su mategel i kapananabangan nin, su mataw mangulu kanu madakel enggu su pakadtalu sa embalang-balang a basa. 29 Na dikena su langun nu pinamili a entu na sinugu, dikena bun langun na nabi, dikena bun langun nu entu na 'bpamamandu, dikena bun langun nu entu na pakanggalebek sa kangagaipan, 30 dikena bun langun nu entu na pakapagkapia kanu pedsakit, dikena bun langun nu entu na pakadtalu sa embalang-balang a basa enggu dikena bun langun nu entu na mataw mapatuntay kanu embalang-balang a entu a basa. 31 Ugaid'a nia nu paginagkay kemua na su kapegkagaga a masela i katagan nin.
Na saguna na ipamandu ku sa lekanu su ukit a dala pagidsan a kapia nin.