Su Kinapamuanaw nu Isa al-Masih kanu Ay nu 'Bpamangunut lun
13
Bagu mauma su Kanduli nu Kalipuas na 'gkatawan den nu Isa al-Masih i nauma den su kutika a dait a ganatan nin den su dunia ka muli den kanu Ama. Na inikalimu a benal'u Isa al-Masih su manga taw a lusud sa lekanin. Tembu ba taman sa kapupusan na inipailay nin su sangat a kapegkalimu nin kanilan. 2 Na sia kanu kapenggabi nilan na inipagkahanda den nu Datu na Giadsal kanu Yahuda Iskalia a wata ni Simiun i katipu nin kanu Isa al-Masih. 3 Saleta na su Isa al-Masih na 'gkatawan nin bun i initapenay den nu Kadenan sa lekanin su langun-langun sa sekanin den i pegkakataw lun enggu 'gkatawan nin bun i lu sekanin ebpun kanu Kadenan taman sa lu bun ba sekanin muli.4 Guna su maitu na midtindeg su Isa al-Masih ka linuwas'in su balegkas'in ka midtinambedan sekanin sa tualiya sia kanu kasadan nin. 5 Entu pan ka minubus sa ig sia kanu palanggan ka linudsuan nin mamuanaw su manga ay nu 'bpamangunut lun enggu pinunasan nin kanu tualiya a inidtinambedan nin. 6 Na guna su si Simiun Pitru den i pembuanawan nu Isa al-Masih na nia nin nadtalu na “Mapulu, pembuanawan nengka su ay ku?” 7 Na nia inisumpat'u Isa al-Masih sa lekanin na “Su penggulan ku a nia na di nengka pan 'gkasabutan saguna ugaid'a di bun mauget na katuntayan nengka bun.” 8 Na nia pidtalu ni Pitru sa lekanin na “Dili a benal maalus a kapamuanawan nengka su ay ku.” Na nia inisumpat'u Isa al-Masih sa lekanin na “Amaika di ku seka pamuanawan na makaliu ka den kanu manga taw a lusud sa laki.” 9 Guna su maitu na nia pidtalu ni Simiun Pitru na “Mapulu, amaika maitu na dikena bu nia ka gagasi su manga ay ku ka apeg'u manga lima ku enggu ulu ku.” 10 Na nia pidtalu sa lekanin nu Isa al-Masih na “Su nakabpaigu den a taw na di den nasisita a limpiun pan, nia tabia na su ay nin bu kagina limpiu den sekanin. Na sekanu na limpiu kanu den ugaid'a dikena langun nu na limpiu.” 11 Na 'gkatawan nu Isa al-Masih u entain i temipu sa lekanin tembu ba pidtalu nin i “Dikena langun nu na limpiu.”
12 Na guna su napamuanawan nin den su manga ay nilan enggu nakambalegkas den 'bpaluman na nagagayan ka nia nin pidtalu kanu 'bpamangunut lun na “Katawan nu u ngintu ka pinggula ku sa lekanu i nia? 13 Pedtawagen aku nu sa gulu enggu Mapulu, na benal su entu a pedtalun nu. 14 Na amaika saki ba a nia a Mapulu nu enggu gulu nu ka pinamuanawan nin su manga ay nu na dait a maitu bun ba i enggula nu, pamuanawi nu bun su ay nu uman i isa sa lekanu. 15 Inenggan ku den ba a nia sekanu sa upaman a kailingan nu. Na u ngin i pinggula ku sa lekanu na maitu bun ba i enggula nu. 16 Saben-sabenal a pedtalun ku sa lekanu i dala panunugun a kalawanan nin pan su mapulu nin enggu dala sinugu a kalawanan nin pan su sinemugu lun. 17 Na ngin den i kapia nin sa lekanu amaika enggulan nu su nangatawan nu ba a nia. 18 Na dikena langun nu i pedtaluan ku sa nia kagina katawan ku man su manga pinamili ku. Ugaid'a nasisita a matuman su nakadalem kanu kitab a ‘Su naped ku kineman i nabaluy a kuntela ku.’a 19 Na pidtalu ku den ba a nia sa lekanu bagu manggula su entu asal'a u manggula den na makapaginugut kanu u entain aku. 20 Na saben-sabenal a pedtalun ku sa lekanu i su temalima kanu manga sinugu ku na tinalima aku nin bun enggu su temalima menem sa laki na tinalima nin bun su sinemugu sa laki.”
Su Kinadtalu nu Isa al-Masih u Entain i Temipu sa lekanin
21 Na guna i nia madtalu nu Isa al-Masih na nalingasa i ginawa nin taman sa pidtalu nin sa matakapala i “Saben-sabenal a pedtalun ku sa lekanu i isa sa lekanu i temipu sa laki.” 22 Na namakadtutulikaya su 'bpamangunut lun ka di nilan a benal katawan u entain sa kanilan su entu. 23 Na isa kanu 'bpamangunut kanu Isa al-Masih a ipegkalimu ninb i pedsandang masupeg kanu laleb'in. 24 Daka pinggulinganan sekanin ni Simiun Pitru sa idsa nin kanu Isa al-Masih u entain i pedtalun nin ba a entu. 25 Daka sinandangan nin su Isa al-Masih ka inidsa nin lun i “Mapulu, entain i entu ba a pedtalun nengka a temipu sa leka?” 26 Na nia nin inisawal na “U entain i enggan ku kanu pan a inisumbuk ku na entu ba sekanin.” Guna su maitu na inisumbuk'u Isa al-Masih su pan kanu ladia ka inenggay nin kani Yahuda a wata ni Simiun Iskalia. 27 Na endaw i kinaami ni Yahuda kanu pan na pindatuan den sekanin nu Saitan.c Na pidtalu nu Isa al-Masih sa lekanin i “U ngin i penggulan nengka, na enggula ka den mamagayas.” 28 Na da isa kanu 'bpamegkan lu i nakasabut u ngin i kahanda nu Isa al-Masih atawa ka u ngintu ka pidtalu nin i entu sa lekanin. 29 Nia kataw nu ped na kagina ka si Yahuda i pedtuganul kanu kuleta na pedsugun sekanin nu Isa al-Masih mamasa kanu nasisita nilan kanu kanduli atawa ka pedsugun nin sa menggay sa tabang lu kanu manga miskinan. 30 Na guna su nakua den ni Yahuda su pan a inisumbuk na namagayas den sekanin gemanat. Saleta na kanu entu a kutika na magabi den.
Su Nakabagu a Kasuguan nu Isa al-Masih
31 Na guna den makaganat si Yahuda na pidtalu nu Isa al-Masih kanilan i “Saguna na su Kaka nu Manusia na ipayag den su sigay nin enggu sia makanggulalan sa lekanin na makapayag su sigay nu Kadenan. 32 Na kagina ka makapayag su sigay nu Kadenan sia makanggulalan sa lekanin na ipayag bun mambu nu Kadenan su sigay nu Kaka nu Manusia. Na mangagan den a benal i nia ba enggulan nu Kadenan. 33 Na manga dua na manga wata, dikena aku den mauget sia sa lekanu. Pangilayn aku nu ugaid'a mana bun su pidtalu ku kanu 'gkangaunutan nu manga Yahudi a u endaw aku 'bpawang na dala makagaga lemu. 34 Na nia su bagu a kasuguan a ibpagenggay ku sa lekanu, 'gkakalimua kanu. Na u panun i kapegkalimu ku sa lekanu na maitu bun ba i kagkakalimua nu. 35 Ka amaika 'gkakalimua kanu man na katawan nu langun nu taw i lusud kanu sa laki.”
36 Daka nia nadtalu ni Simiun Pitru sa lekanin na “Mapulu, endaw ka besen pebpawang?” Na nia inisumpat'u Isa al-Masih sa lekanin na “Su pebpawangan ku na di ka pan makaunut sa laki saguna. Ugaid'a mauma bun su gay a makatundug ka bun lu.” 37 Na nia menem nadtalu sa lekanin ni Simiun Pitru na “Mapulu, enduken ka di aku pan makaunut sa leka saguna? Inggihad ku man i umul ku sa leka.” 38 Na sinumpatan nin sa “Seka! Inggihad'engka i umul'engka sa laki? Saben-sabenal a pedtalun ku sa leka i bagu kemuku su manuk a kalasan na makatelu aku nengka makakias.”