Su Isa al-Masih su Tidtu a Lalan
14
Nia nin pan pidtalu na “Di nu pedtiagka i ginawa nu. Salig kanu kanu Kadenan enggu salig kanu bun sa laki. 2 Na lu kanu walaya nu Ama ku na madakel i bilik'in. Lemu aku ka enggu ku mapagadil sa lekanu su entu. Na di ku i nia edtalun sa lekanu amaika dikena benal. 3 Na u makalu aku den enggu maadil ku den su entu, na embalingan aku sia ka lapiten ku sekanu ka lemu tanu ba kanu pegkalebenan ku ka asal'a apia endaw aku na lu kanu bun ba. 4 Na katawan nu bun su lalan kanu pebpawangan ku.”5 Daka nia pidtalu ni Tumas kanu Isa al-Masih na “Mapulu, panun i kataw nami kanu lalan ka di nami katawan u endaw ka pebpawang?” 6 Na nia pidtalu nu Isa al-Masih sa lekanin na “Saki man su lalan, su bantang enggu su uyag-uyag. Dala makalu kanu Ama nia tabia na sia makanggulalan sa laki. 7 Na amaika katawan aku nu na katawan nu bun su Ama ku. Na iganat saguna na katawan nu den sekanin enggu nailay nu den.”
8 Nia pidtalu ni Pilipus na “Mapulu, ipailay nengka sa lekami su Ama ka masukul kami den.” 9 Daka nia pidtalu nu Isa al-Masih sa lekanin na “Dikena ka nauget aku nu den kaped, na di aku nengka pamun besen katawan, Pilipus? Apia entain i nakailay sa laki na nailay nin bun su Ama. Na panun a entu i kapedtalu nengka sa laki i ipailay ku sa lekanu su Ama? 10 Ngintu, di ka 'bpaginugut sa nalusud aku kanu Ama enggu di sekanin 'gkapitas sa laki? Su pedtalun ku sa lekanu na dikena ebpun sa laki. Ka su Ama bun man a pedtapid sa laki i penggalebek kanu galebek'in. 11 Paginuguti nu i nalusud aku kanu Ama enggu di sekanin 'gkapitas sa laki. Ugaid'a amaika di nu 'bpaginugutan i nia ba na paginugut kanu apia sabap bu kanu kangagaipan a pinggalebek.
12 “Na saben-sabenal a pedtalun ku sa lekanu i apia entain i pedsalig sa laki na manggula nin su penggalebeken ku taman sa kalawanan nin pan su entu. Kagina saki na lemu aku den kanu Ama. 13 Na apia ngin i pangenin nu sia makanggulalan kanu ingala ku na entu ba i enggulan ku ka enggu makapayag su sigay nu Ama sia makanggulalan kanu Tunggal'in. 14 Na u mangeni kanu sa laki sia makanggulalan kanu ingala ku na entu ba i enggulan ku.
Su Suti a Ruh a Inibpasad'u Isa al-Masih
15 “Na amaika ipegkalimu aku nu na inggulalan nu su manga kasuguan ku. 16 Mangeni aku kanu Ama sa enggan kanu nin sa Makadtabang sa lekanu taman sa tapiden kanu nin taman sa taman. 17 Na su pedtalun ku ba a nia na su Ruh nu Kadenanb a pedtutulu kanu kabantang. Di sekanin 'gkatalima nu dunia kagina di sekanin 'gkailay enggu di 'gkatawan. Ugaid'a sekanu na katawan nu sekanin kagina san den sekanin sa lekanu enggu san sekanin 'gkaleben sa lekanu taman sa taman.
18 “Na di ku man sekanu tagaken a mana ilu. Embalinganan ku bun sekanu. 19 Na di den gaid mauget na di aku den mailay nu dunia ugaid'a mana i sekanu na mailay aku nu bun. Na makapaguyag-uyag kanu sabap sa embibiag aku 'bpaluman. 20 Na kanu entu ba a gay na katawan nu den i nalusud aku kanu Ama ku enggu sekanu menem na nalusud sia sa laki taman sa pedtapiden ku sekanu.
21 “Na u entain i tinemalima kanu kasuguan ku taman sa ipenggulalan nin, na entu ba i pegkalimu sa laki. Na su pegkalimu sa laki na ikalimu bun nu Ama ku enggu ikalimu ku bun sekanin taman sa ipayag ku lun su ginawa ku.” 22 Na nia nakaidsa sa lekanin ni Yahuda (ugaid'a dikena si Yahuda Iskalia) na “Mapulu, panun a entu ka sia nengka bu ipebpayag i ginawa nengka sa lekami u entain ka, dikena kanu sakadunia?” 23 Na nia inisumpat'u Isa al-Masih sa lekanin na “Apia entain i pegkalimu sa laki na paginugutan nin su panduan ku. Na su entu ba a taw na ikalimu sekanin nu Ama ku taman sa lemu kami sa lekanin ka tapiden nami taman sa taman. 24 Na su di maginugut kanu kadtalu ku na dikena aku nin ipegkalimu. Na su kangadtalu ku ba a nia a 'gkakineg'u na dikena ebpun sa laki ka ebpun kanu Ama a sinemugu sa laki.
25 “Na pedtalun ku sa lekanu su langun na nia ba gagalu na kaped aku nu pan. 26 Ugaid'a su Makadtabang sa lekanu a su Suti a Ruh a sugun nu Ama sia makanggulalan kanu ingala ku na sekanin i temutulu sa lekanu kanu langun. Na patademan nin sa lekanu su langun nu pidtalu ku sa lekanu. 27 Na nia ku ipedtabun sa lekanu na kalilintad a ebpun demun sa laki a dikena su kalilintad a pagidsan nu sia sa dunia. Di nu pedtiagka i ginawa nu taman sa da kanu 'gkagilek. 28 Na mana bun su nakineg'u sia sa laki a ganatan ku sekanu ugaid'a embalinganan ku bun sekanu. Amaika ipegkalimu aku nu na mapia i ginawa nu sa entu ka pembalingan aku den kanu Ama. Kagina su Ama na lawan paman sa laki. 29 Na pidtalu ku den ba a nia sa lekanu su nia bagu manggula, ka enggu kanu makapaginugut u mauma den su entu ba. 30 Na di aku den gaid edtalu sa mauget ka pakauma den su datu nu dunia.c Ugaid'a da bagel'in sia sa laki. 31 Ugaid'a asal'a katawan nu sakadunia i ipegkalimu ku su Ama na ipenggulalan ku su ipedsugu nin. Na sia kanu den ka gemanat tanu.”