Su Tidtu-tidtu a Punsuan
15
Na nia nin pan pidtalu sa ukit a pakenalan na “Saki su tidtu-tidtu a punsuan nu pamumulanen a ubas enggu su Ama ku menem i pedtiakap lun. 2 Na langun na sapak ku a di 'bpagunga na pedsepaken nin enggu su langun menem a sapak a 'bpagunga na 'bpanampadan nin ka enggu makaunga sa mapia. 3 Na langun nu na linimpiu den sabap kanu manga panduan ku a pidtalu ku sa lekanu. 4 Palalayun kanu sia sa laki ka mapalalayun aku bun san sa lekanu. Ka mana bun man su sapak'u pamumulan na di makaunga amaika da makakapet kanu punsuan nin kagina di nin makapaunga i ginawa nin. Na maitu kanu bun ba, di kanu makaunga u da kanu makakapet sia sa laki. 5 Saki su punsuan enggu sekanu menem su manga sapak ku. Na apia entain i mapalalayun sia sa laki enggu mapalalayun aku sia sa lekanin na su entu ba a taw na makaunga sa mapia. Ka da man magaga nu enggula u dala kanu sia sa laki. 6 Ka su taw a makapitas sia sa laki na mana bun silan sapak a pinanepak a inidtug bu taman sa nangagangu entu pan ka limuden ka idtug lu kanu apuy asal'a matutung.7 “Amaika mapalalayun kanu sia sa laki enggu mapalalayun su kangadtalu ku san sa lekanu, na pangeni nu den u ngin i kalinian nu ka inggay sa lekanu. 8 Ka amaika 'bpagunga kanu man sa mapia na makapayag su sigay nu Ama ku enggu sa maya ba a ukit na katawan i saben-sabenal a sekanu na 'bpamangunut sa laki. 9 Na u ngin i kapegkalimu nu Ama ku sa laki na maitu bun ba i kapegkalimu ku sa lekanu. Palalayun kanu man sia kanu limu ku. 10 Na amaika paginugutan nu su manga kasuguan ku na malalayun kanu sia kanu limu ku, ka mana bun man su kinapaginugut ku kanu manga inisugu nu Ama ku na napalalayun aku bun mambu sia kanu limu nin. 11 Pedtalun ku sa lekanu i langun na nia ba asal'a magalaw kanu a mana bun su kapegkagalaw ku taman sa matalutup su entu a kapegkagalaw nu.
12 “Na nia ba i ipedsugu ku sa lekanu: 'gkakalimua kanu a mana bun su kapegkalimu ku sa lekanu. 13 Da den man lemawan sa limu nu isa a taw a inggihad'in su umul'in sabap kanu manga pakat'in. 14 Na amaika sekanu ka enggulan nu su manga inisugu ku na benal a pakat ku sekanu. 15 Dikena ku den sekanu ipedtimbang sa panunugun ku kagina su panunugun na di nin katawan u ngin i kahanda nu mapulu nin. Nia ku den pedtimbangan sa lekanu na pakat ku kagina langun na nasabutan ku sia kanu Ama na papegkatawan ku sa lekanu. 16 Dikena aku nu pinamili ka saki i namili sa lekanu. Pinamili ku sekanu asal'a makapapanalus kanu taman sa makaunga kanu sa unga a di pedtaman ka enggu apia ngin i pangenin nu kanu Ama sia makanggulalan kanu ingala ku na inggay nin sa lekanu. 17 Na nia ba i ipedsugu ku sa lekanu: 'gkakalimua kanu.
Su Kabensi nu Dunia kanu 'Bpamaginugut
18 “U 'gkabensian kanu nu dunia na 'gkakalendem'u i saki pan i nauna nilan nabensian. 19 Na amaika nalusud kanu man kanu dunia na ikalimu kanu nilan ugaid'a kagina ka dikena kanu den lusud kanu dunia ka pinamili ku den sekanu ganat kanu dunia na kabensian kanu nilan. 20 Na mana bun su pidtalu ku sa lekanu a bayuk a ‘Dala panunugun a kalawanan nin pan su mapulu nin.’ Na maitu tanu bun ba, u 'bpamungkaidanan aku nilan na pamungkaidanan kanu nilan bun. Na amaika menem ka 'bpaginugutan nilan su kadtalu ku na paginugutan nilan bun su kangadtalu nu. 21 Na langun na nia ba na enggulan nilan sa lekanu sabap sa nalusud kanu den sa laki. Na enggulan nilan i entu kagina di nilan katawan su sinemugu sa laki.
22 “Na amaika dala aku bu man sia enggu dala aku bu makapangusiat kanilan na di silan kabenalan sa kadusan nilan ugaid'a saguna a pinangusiatan ku den silan na da den dalinan nilan sa entu. 23 Na su 'gkabensi sa laki na 'gkabensian nin bun su Ama ku. 24 Amaika dala aku bu man enggula sa kangagaipan, a kangagaipan a dala ped a makagaga lun enggula na di silan kabenalan sa kadusan nilan ugaid'a nailay nilan su langun na entu taman sa nabensian aku nilan enggu su Ama ku. 25 Ugaid'a sabap kanu pinggula nilan a nia na natuman su nakadalem kanu kitab'ilan a ‘'Gkabensian aku nilan sa dala sabap'in.’a
26 “Na endaw i katingguma nu Makadtabang a sugun ku san sa lekanu ebpun kanu Ama na edsaksi sekanin pantag sa laki. Na su Makadtabang ba a nia na su Ruh nu Kadenan a pedtutulu kanu kabantang. 27 Na apeg'u na edsaksi bun mambu pantag sa laki kagina iganat pan kanu kinaludsu ku kanu galebekan ku na kaped ku den sekanu.