16
“Na pidtalu ku sa lekanu su langun nu entu ba asal'a di kanu makapasibay. 2 Na iawa kanu nilan kanu walay a pedsambayangan taman sa mauma su kutika sa amaika pangimatayan kanu nilan na sia sa kapagitung'ilan na pakasuat i entu kanu Kadenan. 3 Na langun nu nia ba na enggulan nilan kagina di nilan katawan su Ama taman sa laki. 4 Na pidtalu ku den sa lekanu su langun nu nia ba asal'a u mauma den su entu ba a kutika na magkalendem'u i pidtalu ku bun sa lekanu.Su Galebek'u Suti a Ruh
“Da ku edtalua sa lekanu su langun nu nia paganay kagina kaped aku nu pamun. 5 Ugaid'a saguna na embalingan aku den lu kanu sinemugu sa laki. Na apia sakataw sa lekanu na dala demun minidsa sa laki u endaw aku pebpawang. 6 Ka nia pan mula na nakalidu man sa ginawa nu su kinadtalu ku sa lekanu kanu langun nu nia. 7 Ugaid'a saben-sabenal a pedtalun ku sa lekanu i su kapengganat ku a nia na kapianan nu bun kagina u di aku makaganat na di makasia su Makadtabang, ugaid'a u makaganat aku na sugun ku sekanin san sa lekanu. 8 Na endaw i kauma nin na ipailay nin kanu dunia su makapantag kanu kadusan, kanu kaikelasana enggu kanu kukuman lun. 9 Ipailay nin su makapantag kanu kadusan kagina da silan salig sa laki. 10 Ipailay nin su makapantag sa kaikelasan kagina muli aku kanu Amab taman sa di aku nu den mailay. 11 Ipailay nin su makapantag kanu kukuman kanu dunia kagina kinukum den su pendatu kanu dunia.c
12 “Na madakel pan i pedtalun ku sa lekanu ugaid'a saguna na di nu pan magaga mamikil su entu. 13 Ugaid'a u makauma den su Ruh nu Kadenan a pedtutulu kanu kabantang na sekanin i temutulu sa lekanu kanu langun nu bantang. Na su langun na edtalun nin na dikena ebpun demun sa lekanin ka nia nin bu edtalun na endaw bu i 'gkakineg'in. Na ipayag'in bun sa lekanu su di pan manggula. 14 Na makapayag'in su sigay ku kagina su langun nu edtalun nin na sia pan makabpun sa laki enggu ipayag'in sa lekanu su langun na edtalun ku lun. 15 Kagina su langun na kanu Ama ku na laki bun. Na entu ba i kapedtalu ku sa su langun na edtalun nin na sia pan makabpun sa laki enggu ipayag'in sa lekanu su langun nu edtalun ku lun.”
Su Lidu na Ginawa nu 'Bpamangunut lun na Kasambian na Da Idsan nin a Kapia na Ginawa
16 Na nia nin pan pidtalu na “Di den gaid mauget saguna na di aku nu den mailay ugaid'a di bun gaid mauget na mailay aku nu bun 'bpaluman.” 17 Daka nia nakapamagidsaya nu 'bpamangunut lun na “Ngin i nia ba a pedtalun nin a nia sa lekitanu a ‘Di den gaid mauget na di aku nu den mailay ugaid'a di bun gaid mauget na mailay aku nu bun 'bpaluman,’ enggu ngin menem i nia ba a pedtalun nin a nia a ‘Kagina saki na 'bpaguli aku den kanu Ama’? 18 Ngin basi i nia ba a pedtalun nin a nia a ‘Di den gaid mauget’? Ngin basi i maena nin i nia?”
19 Na katawan bun nu Isa al-Masih i pegkiugan sekanin 'bpagidsa nu 'bpamangunut lun. Guna su maitu na nia nin pidtalu kanilan na “Ibpamagidsaya nu su pantag kanu pidtalu ku a ‘Di den gaid mauget na di aku nu den mailay ugaid'a di bun gaid mauget na mailay aku nu bun 'bpaluman’? 20 Saben-sabenal a pedtalun ku sa lekanu i makapaguguliang kanu enggu sangat a kagagawan kanu ugaid'a kanu entu ba na su dunia na sangat mambu a 'gkagalaw. Benal man a sangat a malidu i ginawa nu ugaid'a su lidu na ginawa nu a entu na kasambian na kagalaw 21 a mana bun su babay a pembata a sangat a 'gkapasangan kanu kinauma nu kutika nu kapembata nin ugaid'a guna makagemaw su wata na nalipatanan nin su langun nu kinapasang lun sabap sa sangat a nagalaw sekanin ka nakagemaw den su wata nin sia sa dunia. 22 Na maitu kanu bun ba, 'gkalidu i ginawa nu saguna ugaid'a kanu kapagilaya tanu 'bpaluman na sangat a magalaw kanu. Na su kapegkagalaw nu a entu na dala makaagaw lun sa lekanu. 23 Na kanu entu ba a gay na da den makaidsa nu sa laki.
“Na saben-sabenal a pedtalun ku sa lekanu i apia ngin i pangenin nu kanu Ama sia makanggulalan kanu ingala ku na inggay nin sa lekanu. 24 Na saguna na dala pamun pinangeni nu sia nakanggulalan kanu ingala ku. Pangeni kanu man ka enggu kanu makatalima asal'a matalutup su sangat a kapegkagalaw nu.
25 “Na pedtalun ku sa lekanu su langun nu nia sa ukit a pakenalan ugaid'a mauma su kutika na di ku den iukit sa pakenalan ka edtalun ku den sa lekanu sa matakapala su makapantag kanu Ama. 26 Kanu entu ba a gay na sia makanggulalan kanu ingala ku i kapangeni nu kanu Ama. Dikena nia ku pedtalun sa lekanu i saki i mangeni sa lekanu kanu Ama 27 ka su Ama mismu na pegkalimu sa lekanu sabap sa ipegkalimu aku nu bun taman sa pinalitialan nu i ebpun aku kanu Kadenan. 28 Na su kinasia ku sa dunia na ebpun aku kanu Ama. Na saguna na ganatan ku den su dunia ka embalingan aku den kanu Ama.”
29 Na nia nadtalu nu 'bpamangunut lun na “Mapia ka midtalu ka den sa matakapala, da nengka den iukit sa pakenalan. 30 Na saguna na nasabutan nami den i katawan nengka den su langun-langun. Na apia entain na di den nasisita a midsa pan sa leka kanu apia ngin ka katawan nengka den su entu. Sabap sa nia na 'bpalitialan nami i saben-sabenal a ebpun ka kanu Kadenan.” 31 Na nia nakasumpat'u Isa al-Masih na “Benal ba a 'bpalitiala kanu den? 32 Ilay nu, 'gkauma den su kutika. Na uman i isa sa lekanu na mamakabpalak. Mamanguli kanu kanu manga walay nu taman sa tagaken aku nu a da kaped ku ugaid'a dikena aku man natalipulu ka kaped ku su Ama ku. 33 Na pidtalu ku sa lekanu su langun nu nia asal'a maaden sa lekanu su kalilintad sabap sa nalusud kanu sa laki. Na sia kanu dunia na temala kanu sa kamalasayan ugaid'a embageli nu i manggiginawa nu ka tinabanan ku den man su dunia.”