Su Pangeni-ngeni nu Isa al-Masih pantag kanu Kapegkauma nu Kapayag kanu Sigay nin
17
Na guna madtalu nu Isa al-Masih su entu na tinemingada sekanin kanu langit ka nia nin pidtalu na “Hu, Ama, nauma den su kutika. Na ipayag'engka den su sigay nu Tunggal'engka ka enggu nin bun makapayag su sigay nengka, 2 kagina ka inenggan nengka sekanin sa bagel kanu langun na taw asal'a su langun a inisalig'engka sa lekanin na kaenggan nin sa uyag-uyag a da taman nin. 3 Na nia ba su uyag-uyag a da taman nin na su kakilala sa leka a su kaisa-isa nin a tidtu a Kadenan enggu sa laki a su Isa al-Masih a sinugu nengka. 4 Na inipayag ku su sigay nengka sia sa dunia ka tinalutup ku den su galebekan a inenggay nengka sa laki. 5 Hu, Ama, saguna na sia kanu kaadapan nengka na ipayag'engka den su sigay ku, a su sigay ta dua unan pan na kinapangaden kanu dunia.Su Pangeni-ngeni nu Isa al-Masih pantag kanu 'Bpamangunut lun
6 “Na inipayag ku seka sia kanu manga taw a inisalig'engka sa laki sia sa dunia. Na nalusud silan sa leka enggu inisalig'engka bu silan sa laki taman sa 'bpaginugutan nilan su kadtalu nengka. 7 Na saguna na katawan nilan den i langun na inenggay nengka sa laki na ebpun mismu sa leka. 8 Kagina su manga kadtalu nengka a inenggay nengka sa laki na inipamandu ku bun kanilan taman sa tinalima nilan su entu. Na saben-sabenal a katawan nilan i ebpun aku sa leka enggu 'bpaginugut silan sa sinugu aku nengka. 9 Na ibpangeni-ngeni ku silan sa leka. Ugaid'a dikena ku ibpangeni-ngeni sa leka su langun na manga taw sa dunia ka su manga taw bu a inisalig'engka sa laki kagina lusud silan sa leka. 10 Na su langun na lusud sa laki na lusud bun sa leka enggu su langun na lusud sa leka na lusud bun sa laki. Na nakapayag su sigay ku sia nakanggulalan kanilan. 11 Na dikena aku den sia sa dunia ka embalingan aku den san sa leka ugaid'a su 'bpamangunut na sia pamun silan sa dunia.
“Hu, Suti a Ama, sia makanggulalan kanu kabarakat'u ingala nengka a inenggay nengka sa laki na tiakapi ka silan ka enggu silan maisa a mana bun su kabpagisa ta. 12 Na gagalu na kaped aku nilan pan na saki i pedtiakap kanilan sia makanggulalan kanu kabarakat'u ingala nengka a inenggay nengka sa laki. Na 'bpagingatan ku silan sa dala isa bu a madala kanilan sa leka nia tabia na su taw a natatalanged den a madala sa leka ka enggu matuman su nakadalem kanu kitab. 13 Na saguna na pembalingan aku den san sa leka. Na pedtalun ku i nia sa gagalu na sia aku pan sa dunia ka enggu matalutup su kagalaw nilan a mana su kapegkagalaw ku. 14 Na inisampay ku kanilan su kadtalu nengka tembu ba nabensian silan nu dunia kagina dikena den silan luyud kanu dunia ka pagidsan den silan sa laki a dikena luyud kanu dunia. 15 Dikena ku nia 'bpangenin sa leka i iawa nengka silan kanu dunia ka itangka nengka silan kanu Daluaka.a 16 Na mana bun saki a dikena luyud kanu dunia na maitu bun ba silan, dikena den silan luyud kanu dunia. 17 Su kadtalu nengka na bantang. Na isenggay nengka silan sia luyud kanu bantang. 18 Na mana bun su kinasugu nengka sa laki sia sa dunia na pedsugun ku bun mambu silan sia sa dunia. 19 Na sabap sa kanilan na ipedsenggay ku den i ginawa ku sa kapaginugut ku sa leka asal'a makasenggay nengka bun silan sia luyud kanu bantang.
Su Pangeni-ngeni nu Isa al-Masih pantag kanu manga Semalig lun
20 “Na dikena bu silan i ibpangeni-ngeni ku ka ibpangeni-ngeni ku bun su manga semalig pan sa laki sia makanggulalan kanu usiatan nilan. 21 Ibpangeni-ngeni ku i maisa silan langun a mana bun su kabpagisa ta, seka sia sa laki enggu saki menem na san sa leka ka enggu menem maisa silan sia sa lekita ka amaika maitu na paginugutan nu dunia i seka i sinemugu sa laki. 22 Inenggay ku kanilan su sigay a inenggay nengka sa laki ka enggu silan maisa a mana bun su kabpagisa ta. 23 Na maisa aku kanilan enggu seka menem sia sa laki asal'a matalutup su kaisa nilan. Ka kanu maya ba a ukit na katawan nu dunia i seka i sinemugu sa laki enggu ipegkalimu nengka silan a mana bun su kapegkalimu nengka sa laki. 24 Hu, Ama, nia ku 'gkalinian na su langun nu inisalig'engka sa laki na malalayun silan sia sa laki asal'a mailay nilan su sigay ku a inenggay nengka sa laki sabap kanu kapegkalimu nengka sa laki unan pan nu kinapangaden kanu dunia.
25 “Hu, Ama ku a matidtu, 'gkatawan nengka bun i di ka katawan nu dunia ugaid'a saki na katawan ku seka enggu su 'bpamangunut a nia na katawan nilan i seka i sinemugu sa laki. 26 Na pinakatawan ku kanilan su ingala nengka enggu pakatawan ku pamun kanilan su entu asal'a mana su kapegkalimu nengka sa laki na maitu bun ba i kagkakalimua nilan taman sa mapalalayun aku kanilan.”