Su Kinabubus sa Kamutan kanu Isa al-Masih unan nu Kapatay nin
14
Na dua gay bun den na mauma den su Kanduli nu Kalipuasa enggu su Kanduli nu Pan a Dala Pakembang'in. Na su manga mapulu nu 'bpamangurban enggu su manga gulu nu pangitaban na 'bpagitungen nilan u panun i kasigkem'ilan kanu Isa al-Masih sa di kasipatan ka enggu nilan kaimatayan. 2 Ugaid'a nia nilan pidtalu na “Dikena kanu timpu nu Kanduli a nia asal'a di mangaden sa kasamukanb su manga taw.”3 Saleta mambu na lu su Isa al-Masih sa Bitani kanu walay nu mama a bedtuan sa Simiun a midsakit sa debpig paganay. Na kanu kapegkan nin na aden babay a nakauma a aden it'in a mapulu a benal i alaga nin a kamutan a lana na narduc a dala simbul'in. Nakabetad i entu kanu taguan a bedtuan sa alabastru.d Na pinesa nin su pundu nu taguan a entu ka inibubus'in kanu ulu nu Isa al-Masih. 4 Ugaid'a su ped kanu manga taw lu na nasakit i ginawa nilan sa nia nilan nadtalu kanu uman i isa na “Nginan ka pendalatan i mapulu a nan i alaga nin a kamutan? 5 Mabpasa pan a benal i nan sa subela pan sa salagun a sukay nu taw. Na su pasa nin na inggay kanu manga miskinan.” Daka dinaway nilan su babay.
6 Ugaid'a nia pidtalu nu Isa al-Masih na “Padtaday nu den sekanin. Nginan ka pedsamuken nu pan? Dait man su penggalebeken nin a nia sa laki. 7 Na su manga miskinan na tatap'u bun silan 'gkadtagapeda na apia ngin a kutika na kanggalebekan nu silan sa mapia ugaid'a saki na dikena nu tatap madtagapeda. 8 Na pinggula nin den ba a nia su ngin i taman a magaga nin sa ukit a kinabubus'in sa kamutan a lana kanu lawas ku unan nu kalebeng sa laki. 9 Na saben-sabenal a pedtalun ku sa lekanu i apia endaw ipangusiat kanu lusud'u dunia su Mapia a Tutuma na mapanudtul bun su pinggula nu babay a nia a tademan sa lekanin.”
10 Daka si Yahuda Iskalia a isa bun kanu sapulu enggu dua a pinamili nin na linemu kanu manga mapulu nu 'bpamangurban ka enggu nin matipu lu su Isa al-Masih. 11 Na napia a benal i ginawa nu manga mapulu nu 'bpamangurban guna nilan makineg su entu. Daka pibpasadan nilan si Yahuda sa enggan nilan sa kuleta. Na pibpapangilay den nu Yahuda i mapia a kutika a katipu nin kanu Isa al-Masih.
Su Kabpagadil sa Kapegkan kanu Kanduli nu Kalipuas
12 Na kanu muna-muna a gay a kapegkan kanu pan a dala pakembang'in enggu su gay a kapegkurban sa manguda a bili-bili a Kanduli nu Kalipuas na inidsa nu 'bpamangunut kanu Isa al-Masih sa lekanin i “Endaw kami nengka kiugan a makapagadil sa makan kanu Kanduli nu Kalipuas?” 13 Daka sinugu nu Isa al-Masih su dua kataw kanu 'bpamangunut lun sa nia nin pidtalu kanilan na “Lu kanu sa siudad ka aden lu mama a madsumbak'u a aden 'bpananggiten nin a binangga a aden ig'in. Na unut kanu den sa lekanin 14 ka endaw sekanin lemudep a walay na edtalu nu kanu kigkuan kanu walay i ‘Ibpagidsa nu Gulu u endaw kun i bilik a kakanan nin kanu Kanduli nu Kalipuas kaped'u 'bpamangunut sa lekanin.’ 15 Daka ipailay nin sa lekanu su maulad a bilik lu sa pulu a aden den langun-taman nin enggu naadil den. Na lu nu ba adil su pegken tanu.” 16 Na linemu den mambu su dua kataw a entu a sinugu nin kanu siudad na natun nilan mambu su langun nu entu a mana bun su pidtalu nu Isa al-Masih. Daka inadil'ilan den lu ba su pegken nilan kanu Kanduli nu Kalipuas.
Su Kinapayag'u Isa al-Masih makapantag kanu Katipu sa lekanin
17 Na kanu kinagkagabi na nakauma su Isa al-Masih apeg'u sapulu enggu dua a 'bpamangunut lun. 18 Daka kanu kapegkan nilan na nia pidtalu nu Isa al-Masih kanilan na “Saben-sabenal a pedtalun ku sa lekanu i isa sa lekanu a kaped ku bun pegkan saguna i temipu sa laki.” 19 Na nalidu a benal i ginawa nilan taman sa nia nadtalu nu uman i isa kanu Isa al-Masih na “Natalatantu a dikena saki su entu.” 20 Daka nia pidtalu nu Isa al-Masih kanilan na “Isa bun sekanin sa lekanu a sapulu enggu dua, su kaped ku pedsumbuk sa pan kanu ladia. 21 Na dait man a matay su Kaka nu Manusia a mana bun su nakasulat pantag sa lekanin sia kanu kitab.e Ugaid'a duan-duan nin den su taw a entu a temipu kanu Kaka nu Manusia! Nia pan tinemu sa lekanin i dala den embata.”
Su Pasad'u Isa al-Masih kanu Nauli den a Kinagabi nin
22 Na kanu kapegkan nilan na kinemua su Isa al-Masih sa pan. Endaw i kinadsukul-sukul'in lun enggu kinapugi nin kanu Kadenan na pidtebi-tebi nin ka inenggay nin kanilan sa nia nin pidtalu na “Kua nu su nia ka nia ba su badan ku.” 23 Na kinemua menem sekanin sa tagayan a aden ig'a ubas'in enggu midsukul-sukul kanu Kadenan. Entu pan ka inenggay nin kanilan. Na mininem mambu silan langun kanu entu ba. 24 Na nia nin pidtalu kanilan na “Nia ba su lugu ku a minalut kanu kapasadan nu Kadenan a ipatuga sabap kanu madakel a taw. 25 Na saben-sabenal a pedtalun ku sa lekanu i di aku den minem 'bpaluman sa ig'a ubas taman sa kanu gay a inemen ku su entu a binagu den lu kanu kapendatu nu Kadenan.”
Su Kinadtalu nu Isa al-Masih makapantag kanu Kakias lun ni Pitru
26 Na guna silan makapasad edsengal sa kapugi kanu Kadenan na linemu silan kanu Palaw nu Ulibus. 27 Na nia pidtalu nu Isa al-Masih kanilan na “Langun nu na temagak sa laki a mana bun su kadtalu nu Kadenan a nakadalem kanu kitab a
‘Imatayan ku su pedtuganul kanu manga bili-bili na amaika maitu na mamakadsambal silan.’f
28 Ugaid'a ulian nu kapambibiag sa laki 'bpaluman na muna aku sa lekanu lu sa Galili.” 29 Na pidtalu ni Pitru sa lekanin i “Apia langun nilan na temagak sa leka ugaid'a mana i saki na dili.” 30 Na nia inisumpat'u Isa al-Masih sa lekanin na “Saben-sabenal a pedtalun ku sa leka i kanu nia bun ba a magabi na ikias aku nengka sa makatelu bagu kemuku sa makadua su manuk a kalasan.” 31 Ugaid'a mabagel a benal i kinadtalu ni Pitru sa “Apia nia nin pan kaaden i ipatay ku na di ku seka ikias.” Na langun nilan na maitu bun ba i pidtalu nin.
Su Kinapangeni-ngeni nu Isa al-Masih lu sa Gitsimani
32 Na kanu kinauma nilan kanu pamumulanan a bedtuan sa Gitsimanig na pinapagagayan nu Isa al-Masih su 'bpamangunut lun sa nia nin pidtalu kanilan na “Sia kanu demun ba gagalu na kabpangeni-ngeni ku.” 33 Na pinaunut'in su telu kataw kanilan a si Pitru, si Yakub enggu si Yuhan. Na lu den ba linemudsu masimuket enggu malasay a benal su manggiginawa nin. 34 Daka nia nin pidtalu kanilan na “'Gkalidu a benal i ginawa ku a mana su ipatay ku den. Sia kanu demun ba ka endiaga kanu.” 35 Na nakatangka bu sekanin sa paidu na nakasugiud sekanin mangeni-ngeni sa amaika mapakay na malipus sekanin kanu timpu a entu 36 sa nia nin pidtalu na “Ama, Ama ku, langun-langun na magaga nengka. Iawa nengka pan sa laki su kamalasayanh a nia a pakatingguma sa laki ugaid'a apia ka maitu na dikena su kiug'u ginawa ku i kaunutan ka su kahanda nengka bun i matuman.”
37 Na guna sekanin embalingan lu kanu telu kataw na nia nin nauman na pedtulug silan. Daka nia nin pidtalu kani Pitru a bedtuan bun sa Simiun na “Nginan, pedtulug ka Simiun? Nginan, di ka demun makandiaga sa apia sakauras bu? 38 Endiaga kanu enggu pangeni-ngeni kanu asal'a di kanu masasat ka di man pegkiug 'gkasasat su ginawa ugaid'a malubay su badan.” 39 Na ginanatan nin menem silan 'bpaluman ka nangeni-ngeni sa maitu bun ba sa pangeni-ngeni nin a entu. 40 Na mimbalingan menem sekanin na nauman nin den menem silan a pedtulug kagina pedtulatuden a benal silan. Daka dili nilan 'gkatawan u ngin i edtalun nilan sa lekanin. 41 Na kanu ikatelu a kinambalingan nu Isa al-Masih na pidtalu nin kanilan i “Nginan, pedtulug kanu enggu 'bpangintelenen kanu pamun besen? Nia nu kataw na mawatan pamun su kutika? Ilay nu, masupeg den a benal su kutika a ipalad su Kaka nu Manusia kanu manga baladusa. 42 Embangun kanu den ka su pedtipu sa laki na masupeg den a benal na entanu den ka alawn tanu sekanin.”
Su Kinasigkem kanu Isa al-Masih
43 Na kanu entu demun ba a kapedtalu nin a entu na nakauma si Yahuda a isa kanu sapulu enggu dua a pinamili nin. Kaped'in su madakel a taw a aden it'in a manga sundang enggu manga ibpametay ka sinugu silan nu manga mapulu nu 'bpamangurban enggu su manga gulu nu pangitaban taman den kanu 'gkangaunutan nu manga Yahudi. 44 Na su pedtipu na inenggan nin sa sinial su manga ped'in sa nia nin pidtalu na “U entain su salamen ku sa sium na sekanin su mama. Sigkem'u enggu pagunungi nu sa mapia sa kait'u lun.” 45 Na endaw demun i kinauma ni Yahuda na sinupegan nin su Isa al-Masih sa nia nin pidtalu na “Salam, Gulu!” Entu pan ka sinium'in. 46 Daka kinua sekanin nu manga kaped'i Yahuda ka sinigkem'ilan. 47 Ugaid'a isa kanu 'bpamedtindeg lu kanu ubay nu Isa al-Masih i binindas'in su guluk'in ka tinimbas'in su ulipen nu mapulu sa langun nu 'bpamangurban. Na nia nasugat na su tangila nin taman sa nakabpitas su entu. 48 Daka nia pidtalu nu Isa al-Masih kanilan na “Nginan, ribildi aku ka sinemia kanu a minit pan sa manga sundang enggu manga ibpametay sa kasigkem'u sa laki? 49 Uman gay na kaped aku nu bun lu kanu Suti a 'Bpagagaman kanu kabpamandu ku inunta na di aku nu bun pedsigkemen. Ugaid'a dait man a manggula su nia ka enggu matuman su nakadalem kanu kitab.” 50 Daka langun nu manga tagapeda nu Isa al-Masih na midtatalaguy ka tinagak'ilan sekanin.
51 Na aden isa a manguda a mama a dala balegkas'in nia tabia na kayab bu a nakabaus kanu lawas'in na pidtatanggunutan nin su Isa al-Masih. Na sinigkem'u manga taw sekanin 52 ugaid'a nakadtalaguy sekanin a nakagkawas-kawas kagina natabun nin su kayab'in.
Su Kinaadap kanu Isa al-Masih lu kanu Mapulu sa Langun nu 'Bpamangurban
53 Na iniadap'ilan den su Isa al-Masih lu kanu mapulu sa langun nu 'bpamangurban. Na mindidilimudan mambu lu ba su langun nu manga mapulu nu 'bpamangurban enggu su 'gkangaunutan nu manga Yahudi taman den kanu manga gulu nu pangitaban. 54 Saleta mambu na pidtatanggunutan ni Pitru su Isa al-Masih taman den lu kanu ludep'u lama-lama nu tulugan nu mapulu sa langun nu 'bpamangurban ugaid'a lu sekanin sa mawatan. Na nagagayan sekanin kaped'u manga panunugun lu kanu ubay nu apuy ka midtilalang.
55 Na su manga mapulu nu 'bpamangurban enggu su langun den nu 'bpamangukumi na nangilay silan sa manga taw a makadsaksi sungkang kanu Isa al-Masih asal'a kapaimatayan nilan sekanin ugaid'a dala natun nilan. 56 Kagina madakel den man i midsaksi sa lekanin sa dikena benal ugaid'a dala pamagayun su inidsaksi nilan. 57 Na aden pan ped a manga taw a midtindeg ka midsaksi sa dikena benal sa nia nilan pidtalu na 58 “Nakineg'ami i pedtalun nin i ‘Gubalen ku su Suti a nia a 'Bpagagaman a inumbal bu nu manusia. Na kanu dalem'u telu gay na mapatindeg aku sa ped a dikena inumbal'u manusia.’j” 59 Ugaid'a apia ka maitu na dala bun pamagayun su inidsaksi nilan a entu. 60 Daka midtindeg kanu luk'ilan su mapulu sa langun nu 'bpamangurban ka inidsan nin su Isa al-Masih sa “Nginan, dala demun makasawal'engka kanu ipedsendit'ilan a nia sa leka?” 61 Ugaid'a dala bun inek-inek'in. Apia sataga na dala bun sekanin sumpat. Na inidsan menem sekanin 'bpaluman nu mapulu sa langun nu 'bpamangurban sa “Nginan, seka ba su Masih, su Tunggal'u Kaisa-isa nin bu a Pebpugin?” 62 Na nia mambu inisumpat'u Isa al-Masih na “Uway saki ba, na mailay nu su Kaka nu Manusia a magagayan kanu tampal sa kawanan nu Barakat sa Langun enggu makatingguma sekanin sia sa dunia a lu makasaleta kanu manga gabun sa kawang-kawangan.” 63 Daka kinisik nu mapulu sa langun nu 'bpamangurban su balegkas'in ka nia nin pidtalu na “Enduken ka nasisita tanu pan i ped a makadsaksi? 64 Nakineg'u den su kasakutu nin. Na ngin i lekanu sa entu?” Daka kinukum'ilan sa wagib sekanin a matay. 65 Na linudsuan sekanin demuda nu ped kanu manga taw lu enggu binausan nilan su beneng'in taman sa pinakapasangan nilan mametay sa nia nilan lun pidtalu na “Amaika seka su Masih na edtalu ka kun a nan sa lekami u entain i 'bpametay sa leka?” Entu pan ka kinua sekanin nu manga tameng taman sa pinametay nilan bun sekanin.
Su Kinakias'i Pitru kanu Isa al-Masih
66 Na gagalu na lu si Pitru sa baba, lu kanu lama-lama, na isa kanu manga panunugun a babay nu mapulu sa langun nu 'bpamangurban i nakauma. 67 Na nailay nin si Pitru a pedtilalang kanu apuy na pidtulikan nin sa nia nin lun pidtalu na “Kaped ka bun nu taw a nan sa Nasarit a si Isa.” 68 Ugaid'a inikias'in su entu sa nia nin pidtalu na “Saben-sabenal a di ku katawan enggu di ku 'gkatuntayan i pedtalun nengka a nan.” Daka linemu sekanin kanu lalan 'bpawang sa liu na aden mambu kinemuku a manuk a kalasan. 69 Na nailay menem sekanin nu panunugun a babay, daka pidtalu nin menem 'bpaluman kanu manga taw a pedtindeg lu i “Isa kanilan su mama a nan.” 70 Ugaid'a inikias menem 'bpaluman ni Pitru su entu. Na dala gaid matana-tana na su manga taw a pedtindeg lu na silan menem i midtalu kani Pitru sa “Natalatantu a isa ka bun kanilan kagina taw ka bun sa Galili.” 71 Ugaid'a inidsinta ni Pitru su ginawa nin taman sa inidsapa nin i “Di ku a benal katawan i mama a nan a pedtalun nu.” 72 Na midsambuta demun su ikadua a kinakuku na manuk a kalasan na nagkalendem mambu ni Pitru su pidtalu sa lekanin nu Isa al-Masih a “Bagu makakuku sa makadua su manuk a kalasan na makatelu aku nengka den makakias.” Na nalupet su atay ni Pitru taman sa nakapaguguliang a benal.