Su Kinapatay ni Lasaru
11
Aden isa a mama a pendalu a benal a nia nin ngala na si Lasaru. Lu sekanin pegkaleben sa Bitani apeg'u manga suled'in a manga babay a si Marta enggu si Mariam. 2 Su Mariam bun ba a nia su Mariam a mubus sa lana a kamutan kanu ay nu Mapulu a su Isa al-Masih taman sa punasan nin pan kanu buk'in. 3 Na sabap sa pendalu a benal su suled'in a si Lasaru na napapait silan a edsuled a babay sa katigan kanu Isa al-Masih sa nia nilan pidtalu na “Mapulu, su papedtayan nengka a pakat'engka na pendalu a benal.” 4 Na kanu kinakineg'u Isa al-Masih kanu entu a katigan na nia nin pidtalu na “Su entu a dalu nin na di nin ibpawang sa kapatay. Na nanggula bu man i nia asal'a mapayag su kabarakat'u Kadenan ka enggu mapayag su sigay nu Tunggal'u Kadenan sia makanggulalan kanu nia a nanggula.”5 Na inikalimu nu Isa al-Masih su edsusuled a entu a si Marta, si Mariam enggu si Lasaru. 6 Ugaid'a apia nakineg'in den i pendalu si Lasaru na midtangen pamun sekanin sa nakadua gay kanu dalepa a nambetadan nin. 7 Ulian nu entu na pidtaluan nin su 'bpamangunut lun sa “Embalingan tanu sa Yudia.” 8 Na nia nadtalu nu 'bpamangunut lun na “Gulu, bagu pamun i kapembengel sa leka sa watu nu manga taw sa Yudia, na ngintu ka embalingan ka pamun lu?” 9 Na nia inisumpat'u Isa al-Masih kanilan na “Dikena ba sapulu enggu dua kauras su kagagabian? Apia entain man i endadalakaw kanu timpu a malamag na di makasiud kagina pakatayaw sa lekanin su palitan nu dunia. 10 Ugaid'a apia entain menem i endadalakaw kanu timpu a magabi na pakasiud kagina dala sa lekanin su pakatayaw.”
11 Na pidtalu nin pamun kanilan i “Su pakat tanu a si Lasaru na pedtulug, na lemu aku ka pukawn ku sekanin.” 12 Daka nia pidtalu sa lekanin nu 'bpamangunut lun na “Mapulu, amaika pakatulug den sekanin na nia nin maena na 'gkapia bun sekanin.” 13 Na nia kataw nu 'bpamangunut kanu Isa al-Masih na pedtulug demun matag si Lasaru ugaid'a nia ba a entu pedtalun nu Isa al-Masih na minatay den si Lasaru. 14 Daka guna su maitu na pidtalu den sa matakapala nu Isa al-Masih i “Minatay den man si Lasaru. 15 Sabap sa lekanu na 'gkagalaw aku sa dala aku lu kanu kinabpatay nin kagina sabap sa entu na makapalitiala kanu. Ugaid'a saguna na 'bpawangan tanu sekanin.” 16 Na si Tumas a bedtuan sa Leping na nia nin pidtalu kanu manga ped'in bun a 'bpamangunut na “Munut tanu bun sa lekanin ka enggu tanu nin maped matay.”
Su Isa al-Masih su Pakapambibiag enggu su Uyag-uyag
17 Guna makauma su Isa al-Masih lu sa Bitani na natawan nin i nakapat gay den i kinakubul kani Lasaru. 18 Na su dalepa a Bitani na masupeg bu sa Awrusalim ka manga telu kakilumitru bu i katangka nin lun. 19 Tembu madakel kanu manga taw sa Yudia i linemu kani Marta enggu Mariam ka enggu nilan 'gkalimpang kanu kinapatay nu suled'ilan a si Lasaru. 20 Na guna makineg'i Marta i pakauma su Isa al-Masih na inalaw nin sekanin ugaid'a si Mariam na lu demun kanu walay. 21 Daka nia pidtalu ni Marta kanu Isa al-Masih na “Mapulu, u sia ka bu man na di matay su suled ku a mama. 22 Ugaid'a apia ka maitu na katawan ku i apia ngin i pangenin nengka kanu Kadenan na inggay nin sa leka.” 23 Daka nia pidtalu nu Isa al-Masih sa lekanin na “Embibiag 'bpaluman su suled'engka.” 24 Na nia inisawal'i Marta sa lekanin na “Katawan ku man i embibiag bun sekanin 'bpaluman kanu gay nu kambibiag'u manga namamatay sia kanu Gay a Mauli.” 25 Daka nia menem pidtalu nu Isa al-Masih sa lekanin na “Saki man su pakapambibiag 'bpaluman enggu saki su uyag-uyag. Su pedsalig sa laki na apia matay sekanin na embibiag bun 'bpaluman, 26 enggu apia entain i aden sa lekanin su entu a uyag-uyag taman sa pedsalig sa laki na di den matay taman sa taman. Na ngintu, 'bpaginugut ka kanu nia ba?” 27 Na nia nin mambu inisumpat na “Uway Mapulu, 'bpaginugutan ku i seka su Masih a Tunggal'u Kadenan a pakauma sia sa dunia.”
28 Na guna madtalu ni Marta su nia na mimbalingan sekanin sa walay ka inedung'in edtalu kanu tebped'in sa pused a si Mariam i “Sia su Gulu, ipapedtawag ka nin.” 29 Na endaw i kinakineg'i Mariam sa entu na midtindeg sekanin mamagayas ka pibpawangan nin su Isa al-Masih. 30 Na kanu entu a kutika na da pamun makatalus su Isa al-Masih lu kanu manga kawalayan ka lu pamun sekanin kanu inalawan lun ni Marta. 31 Na guna mailay nu manga taw sa Yudia a 'bpamelimpang kani Mariam lu kanu walay i namagayas edtindeg si Mariam ka ginemanat na tinundug'ilan sekanin ka nia nilan lun kataw na 'bpelu sekanin kanu kubul ka basi lu 'bpagabpet 'bpaguliang. 32 Na nakauma si Mariam lu kanu nambetadan nu Isa al-Masih. Na endaw i kinailay nin kanu Isa al-Masih na sinemugiud sekanin lu kanu kasangulan nin ka nia nin lun pidtalu na “Mapulu, u sia ka bu man na di matay su suled ku a mama.”
33 Guna mailay nu Isa al-Masih a 'bpaguguliang si Mariam apeg'u manga ped'in a minunut lun na nasakit i ginawa nin taman sa nalingasa i pamikilan nin. 34 Na inidsa nin kanilan i “Endaw inikubul si Lasaru?” Na nia nilan lun inisawal na “Mapulu, sia ka, ka lemu tanu ka enggu nengka 'gkailay.” 35 Na nakaigis su lu nu Isa al-Masih. 36 Daka nia pidtalu nu manga taw na “Ilay nu! Benal man a papedtayan nin si Lasaru.” 37 Ugaid'a nia menem pidtalu nu ped na “Nagaga nin mapagkapia su mama a di pakailay, na ngintu ka da nin edtabangi si Lasaru sa di nin kapatay?”
Su Kinapambibiag kani Lasaru
38 Guna su maitu na nasakit menem i ginawa nu Isa al-Masih taman sa kinauma nin kanu kubul. Na su kinubulan kani Lasaru na lu kanu takub a aden pintu nin a masela a watu. 39 Na pidtalu nu Isa al-Masih i “Iawa nu i pintu nin a nan.” Na nia inisumpat'i Marta a tebped sa pused'u minatay na “Mapulu, pegkadu den man sekanin ka nakapat gay den i kinakubul lun.” 40 Na nia pidtalu nu Isa al-Masih sa lekanin na “Dikena ba pidtalu ku sa leka i amaika 'bpaginugut ka na mailay nengka su kabarakat'u Kadenan?” 41 Guna su maitu na iniawa nilan su watu a inipintu lun. Na tinemingada su Isa al-Masih ka nangeni-ngeni sa nia nin pidtalu na “Ama, pedsukul-sukul aku sa leka ka 'bpakikinegen aku nengka. 42 Saki na katawan ku man i tatap aku nengka 'bpakikinegen. Ugaid'a sabap kanu madakel a nia a taw a namakalibet na pidtalu ku i nia asal'a makapaginugut silan sa seka i sinemugu sa laki.” 43 Na guna nin madtalu su nia, na tinawag'in sa matanug si Lasaru sa “Lasaru, liu ka san!” 44 Daka linemiu si Lasaru a nabausan pamun na unung su lawas'in enggu nabausan pamun na saput su beneng'in. Na nia pidtalu nu Isa al-Masih na “Iawa nu i nakabaus lun a nan ka enggu sekanin makalakaw sa mapia.”
Su Kapegkahanda nu 'Gkangaunutan sa Kapamungkaid'ilan kanu Isa al-Masih
45 Kagina ka maitu na madakel kanu manga taw sa Yudia a minunut kani Mariam a namakailay kanu pinggula nu Isa al-Masih i sinemalig sa lekanin. 46 Ugaid'a su ped na linemu kanu manga taw a lusud kanu lumpukan a Parisiyu ka inipanudtul'ilan su pinggalebek'u Isa al-Masih. 47 Guna su maitu na mindidilimudan su manga mapulu nu 'bpamangurban enggu su manga taw a lusud kanu lumpukan a Parisiyu apeg den nu ped a 'bpamangukuma ka mimbibitiala silan sa nia nilan pedtalun na “Ngin i enggulan tanu ka madakel den a benal i penggulan nu nia a mama a manga tanda a kagaipan? 48 Amaika padtadayn tanu sekanin na langun nu taw na maginugut sa lekanin. Na amaika manggula i entu na semia su manga taw sa Ruma ka kuan nilan sa lekitanu su Suti a 'Bpagagaman enggu su inged tanu.” 49 Ugaid'a si Kaipas a isa bun kanilan enggu sekanin i mapulu sa langun nu 'bpamangurban kanu entu a lagun na nia nin pidtalu kanilan na “Da man sabut'u sa 'gkanggula. 50 Di nu 'gkapagitung i labi a mapia sa lekanu i nia bu matay na sakataw bu a taw a mana kurban asal'a malipuas su taw kumin sa nia kagkaidan na su langun nu inged?” 51 Ugaid'a su pidtalu nin a nia na dikena ebpun demun kanu ginawa nin ugaid'a sabap sa sekanin i mapulu sa langun nu 'bpamangurban kanu entu a lagun na inipaalung'u Kadenan su kapatay nu Isa al-Masih asal'a maaun su manga Yahudi. 52 Ugaid'a dikena entu bu i sabapan nu kapatay nin ka nia nin pan ped a sabapan na asal'a maisa nin su manga nabaluy a wata nu Kadenanb kanu embala-bala den a dalepa sia sa dunia. 53 Na iganat kanu entu a gay na su 'gkangaunutan nu manga Yahudi na pigkahanda nilan den su kaimatay nilan kanu Isa al-Masih.
54 Guna su maitu na di den pendadalakaw sa mapayag su Isa al-Masih lu kanu manga taw sa Yudia. Ugaid'a lu sekanin mibpawang sa inged a bedtuan sa Ipraim a masupeg kanu tawan-tawan a dalepa ka lu demun pan ba sekanin midtangen apeg'u 'bpamangunut lun.
55 Saleta mambu na masupeg den su kapegkanduli nu manga Yahudi sa Kanduli nu Kalipuas. Na madakel kanu manga taw sa embala-bala a dalepa i linemu sa Awrusalim bagu mauma su Kanduli nu Kalipuas asal'a malimpiu nilan su ginawa nilan sia luyud kanu agama nilan. 56 Na 'bpangilayn nilan su Isa al-Masih. Tembu kanu lu a entu silan kanu Suti a 'Bpagagaman na ibpangingidsa nilan kanu uman i isa lu i “Ngin i kalangan nu lun, semia sekanin kanu nia a kanduli?” 57 Na su manga mapulu mambu nu 'bpamangurban enggu su manga taw a lusud kanu lumpukan a Parisiyu na inisugu nilan kanu manga taw i apia entain i mataw lun u endaw su Isa al-Masih na pakatawan nilan ka enggu masigkem.