Su Pakenalan pantag kanu Tidtu-tidtu a Patutuganul sa Bili-bili
10
Nia pan pidtalu nu Isa al-Masih sa ukit a pakenalan na “Saben-sabenal a pedtalun ku sa lekanu i su taw a di mukit kanu bengawan nu lugenan nu manga bili-bili ka mamantek na su entu ba a taw na tanegkawn enggu tulisan. 2 Ugaid'a su taw a mukit sia kanu bengawan na sekanin su pedtuganul kanu manga bili-bili. 3 Na su nia ba a taw na pembukatan sekanin nu pedtameng sa bengawan enggu 'bpakikinegen nu manga bili-bili su suala nin. Na pedtawagen nin su ngala nu uman i satiman kanu manga bili-bili nin ka pabpeliun nin.4 “Na amaika makapaliu nin den silan na 'bpangunanan nin silan enggu pedtatanggunutan mambu sekanin nu manga bili-bili kagina kilala nilan su suala nin. 5 Ugaid'a di nilan a benal unutan su di nilan kilala ka nia pan mula na tangkan nilan kagina di nilan kilala i suala nu salakaw a taw.”
Su Isa al-Masih su Bengawan enggu su Patutuganul
6 Na su nakakineg kanu pakenalan a pidtalu nu Isa al-Masih na dala nilan katuntayi u ngin i maena nu entu. 7 Guna su maitu na pidtalu pamun nu Isa al-Masih kanilan i “Saben-sabenal a pedtalun ku sa lekanu i saki su bengawan a 'bpagukitan nu manga bili-bili. 8 Na langun nu nangauna sa laki nakaumaa na manga tanegkawn enggu tulisan. Na su manga bili-bili mambu na dala nilan a benal silan pakikinega. 9 Saki man ba su bengawan. Na apia entain i mukit sia sa laki na malipuas. Aden baya-baya nilan sa kaliu enggu kaludep taman sa nia nilan matun na kapanadtaban. 10 Na su tanegkawn na nia nin bu kahanda na makapanegkaw, makapangimatay enggu makapaminasakan ugaid'a saki na nia ku kahanda sa kinasia ku na asal'a su taw na kaadenan na talutup a uyag-uyag a labi lawan i kapia nin.
11 “Na saki man su mapia a patutuganul sa manga bili-bili. Na su mapia a nia a patutuganul sa bili-bili na ipenggihad'in su umul'in asal'a malipuas su manga bili-bili. 12 Na su dikena kigkuan kanu bili-bili ka pedsukayan bu sa kapedtuganul'in na u mailay nin a pakauma su asu a makagkaid na tagaken nin su manga bili-bili ka mawa. Na su asu mambu a pakagkaid na gebpan nin su manga bili-bili enggu itagayak'in silan. 13 Na kagina ka pedsukayan bu sekanin na dala lilingay nin kanu manga bili-bili tembu ba mawa sekanin.
14-15 “Na saki man su mapia a patutuganul sa manga bili-bili. Na u ngin i kapegkakilala ku kanu Ama enggu kapegkakilala nu Ama sa laki na maitu bun ba su kapegkakilala ku kanu manga bili-bili ku enggu kapegkakilala nu manga bili-bili ku sa laki taman sa inggihad ku su umul ku sa kalipuas'ilan. 16 Na aden pamun ped a manga bili-bilib ku a dikena sia kanu lugenan ba a nia. Nasisita ku bun silan a kuan enggu pakikinegen nilan bun su suala ku. Na maisa su langun na bili-bili ku taman sa isa bun den i pedtuganul kanilan.
17 “Na nia ba i sabap'in a ipegkalimu aku nu Ama kagina ibpagenggay ku su umul ku asal'a ulian nu entu na kuan ku bun 'bpaluman. 18 Na dala man makakua sa umul ku nia tabia na saki demun mismu i enggihad lun ka aden man kawagib ku sa kanggihad ku lun enggu kakua ku lun 'bpaluman. Na nia ba i inisugu nu Ama ku sa laki.”
19 Na nabad menem su manga Yahudi sabap kanu manga kadtalu a nia. 20 Na madakel kanilan i nia nilan 'bpamedtalun na “Inasukan sekanin na saitan enggu 'gkabuneg. Na ngintu ka 'bpamakikinegen nu pamun sekanin?” 21 Nia menem pidtalu nu ped na “Su nia a kangadtalu na di madtalu na inasukan na saitan enggu di man magaga na inasukan na saitan i kapapailay nin sa taw a di pakailay.”
Su Isa al-Masih su Tunggal'u Kadenan
22 Na kanu entu ba a manga gay na ipedsela-sela nu manga Yahudi sa Awrusalim su Kanduli nu Kinasuti 'Bpaluman kanu Suti a 'Bpagagaman.c Na pembalatd kanu entu a timpu. 23 Saleta mambu na su Isa al-Masih na pendadalakaw lu kanu inatepan a pala-pala nu Suti a 'Bpagagaman a bedtuan sa Pala-pala nu Ragya Sulaiman. 24 Daka binalibet sekanin nu manga Yahudi ka nia nilan lun pidtalu na “Taman sa kanu pan i kapapagitung'engka sa lekami u entain ka? U saben-sabenal a seka su Masih na edtalu ka den sa lekami sa matakapala.” 25 Na nia inisumpat'u Isa al-Masih kanilan na “Pidtalu ku den sa lekanu ugaid'a di kanu 'bpalitiala. Na su manga galebekan a penggalebeken ku sia kanu bagel'u Ama ku na pebpagamad den i entu makapantag sa laki. 26 Ugaid'a di kanu 'bpalitiala kagina dikena ku sekanu manga bili-bili 27 ka su manga bili-bili ku man na 'bpamakikinegen nilan su suala ku. Kilala ku silan enggu 'bpaginugutan aku nilan. 28 'Bpagenggan ku silan sa uyag-uyag a da taman nin enggu di den silan masiksa taman sa taman. Na apia entain na dala makaagaw kanilan sia sa laki. 29 Inenggay silan sa laki nu Ama ku a su barakat sa langun. Na apia entain na dala makagaga lun magaw sia kanu Ama ku. 30 Na saki man enggu su Ama na isa bu.”
31 Na guna su maitu na minundut menem silan sa watu a ibengel'ilan kanu Isa al-Masih a imatay nilan lun. 32 Daka nia inisumpat'u Isa al-Masih na “Madakel a mapia a galebekan a inisugu nu Ama ku sa laki i inipailay ku den sa lekanu. Na endaw lu kanu manga galebekan a entu i punan a ipembengel'u sa laki?” 33 Na nia inisawal'u manga Yahudi na “Dikena nia sabapan na kapembengel'ami sa leka i su manga mapia a galebekan nengka ka sabap sa kanu kasakutu nengka kagina seka a taw na ipedtimbang'engka i ginawa nengka sa Kadenan.” 34 Na nia menem inisawal'u Isa al-Masih kanilan na “Dikena ba nakasulat bun kanu kasuguan nu i ‘Nia pidtalu nu Kadenan na “Sekanu na manga kadenan” ’?e 35 Na katawan tanu i dala makagaga mawa sa kapantag kanu kadtalu nu Kadenan a nakadalem kanu kitab. Na amaika su silan a entu a sinaligan nu Kadenan kanu kadtalu nin ka tinawag'in sa manga kadenan 36 na ngintu ka pedtalun nu i pedsakutu aku sabap sa pidtalu ku i Tunggal aku nu Kadenan? Inunta na saki su tinapenayan nu Ama kanu galebekan nin enggu sinugu nin sia sa dunia. 37 Amaika dikena nia ku penggalebeken su galebek'u Ama ku na di aku nu 'bpaginuguti. 38 Ugaid'a saben-sabenal a penggalebeken ku su entu, na apia di aku nu den 'bpaginugutan na paginuguti nu su galebekan a ipapenggalebek'u Ama asal'a katawan nu enggu katuntayan nu i nakalusud aku kanu Ama enggu di sekanin 'gkapitas sa laki.” 39 Daka pibpapangilayn nilan menem i kasigkem'ilan kanu Isa al-Masih ugaid'a nalipuas'in bun su entu a kahanda nilan.
40 Guna su maitu na ginemanat menem su Isa al-Masih lu ka linemu kanu nauna a pinanalawatan nu Yahiya a lu tampal kanu sebangan nu lawas'a ig'u Jordan taman sa midtangen pan sekanin lu. 41 Na madakel i linemu sa lekanin enggu nia nilan 'bpamedtalun na “Da mambu pinggula nu Yahiya a tanda a kabarakatan ugaid'a langun na pidtalu nin pantag kanu nia a mama na benal.” 42 Daka madakel i sinemalig sa lekanin lu.