Su Mapia a Tutuma a Inisulat'i Yuhan 9

Su Kinapailay nu Isa al-Masih kanu Mama a Di Pakailay

Na sia kanu kapendadalakaw nu Isa al-Masih na nailay nin su mama a nait'in den gememaw i di nin kapegkailay. 2 Daka inidsa nu 'bpamangunut sa lekanin i “Gulu, entain basi i baladusa kanilan a sabapan a di kapegkailay nu mama a nia? Su mama a nia atawa ka su manga lukes'in?” 3 Nia inisawal'u Isa al-Masih na “Dikena nia nin di kapegkailay i baladusa sekanin atawa ka su manga lukes'in ka nia nin di kapegkailay na asal'a makapayag su kabarakat'u Kadenan a sia makanggulalan sa lekanin. 4 Nasisita man a enggalebeken tanu su manga galebekan nu sinemugu sa laki taman sa di pan semedep su senang ka u 'gkagabi den na da den makanggalebek. 5 Ka gagalu na sia aku pamun sa dunia na palitan aku nu sakadunia.” 6 Na guna madtalu nu Isa al-Masih su nia na dinemuda sekanin kanu lupa ka pinagkalumiket'in su entu, entu pan ka inidebpil'in kanu mata nu mama 7 ka nia nin pidtalu sa lekanin na “Lu ka kanu pebpaiguan a bedtuan sa Siluam ka panagup ka lu ba.” (Nia maena nu Siluam na sinugu.) Na linemu mambu su mama ka nanagup. Daka pakailay den sekanin kanu kinauli nin.

8 Na guna mailay nu manga pagubay nin enggu su nakailay sa lekanin kanu 'bpamangeni pan sekanin na nia nilan nangadtalu na “Dikena ba sekanin su mama a 'bpamagagayan a 'bpamangeni?” 9 Nia pan 'gkangadtalu nu ped na “Sekanin ba su entu a mama.” Su ped menem na nia nilan 'gkangadtalu na “Dikena, makandalagida nin bu i nan.” Daka midtalu su mama sa “Saki su entu.” 10 Guna su maitu na inidsa nilan sa lekanin i “Panun i kinailay nengka?” 11 Na nia inisawal'u mama na “Su mama a bedtuan sa Isa na napagkalumiket sa lupa ka inidebpil'in kanu mata ku su entu taman sa pidtalu nin sa laki i ‘Lu ka sa Siluam ka panagup ka.’ Na linemu aku mambu ka nanagup aku daka midsambuta demun i kinailay ku.” 12 Na nia nilan menem nakaidsa na “Endaw su mama a entu a bedtuan sa Isa?” Na nia inisumpat'u mama na “Di ku katawan.”

Su Kinasumalia kanu Mama a Pinagkapia nu Isa al-Masih

13 Daka pinananggit'ilan su mama a entu a di pakailay paganay lu kanu manga taw a lusud kanu lumpukan a Parisiyu. 14 Saleta mambu na su kinapagkalumiket'u Isa al-Masih kanu lupa enggu su kinapagkapia nin kanu mama na kanu Gay nu Kabpangintelenen. 15 Na su manga taw a lusud kanu lumpukan a Parisiyu na pinangingidsan nilan menem su mama u panun i kinailay nin. Na nia nin inisawal kanilan na “Su mama a bedtuan sa Isa na dinebpilan nin sa malumiket a lupa su mata ku. Na pinanagupan ku, daka midsambuta demun i kinailay ku.” 16 Guna su maitu na nia pidtalu nu manga taw a ped kanu lumpukan a Parisiyu na “Su nia a mama na dikena ebpun kanu Kadenan kagina pedsungkangen nin su kasuguan pantag kanu Gay nu Kabpangintelenen.” Ugaid'a nia pidtalu nu ped na “Amaika maitu na panun i kanggalebek'u baladusa a taw kanu man a kangagaipan a tanda?” Daka nabad silan. 17 Na inidsan nilan menem su mama sa “Seka, na ngin i madtalu nengka pantag sa lekanin kagina ka nakapailay ka nin?” Na nia nin inisawal na “Nabi sekanin.”

18 Na di a benal 'bpaginugut su 'gkangaunutan nu manga Yahudi sa su mama a nia a pakailay den saguna na di pakailay paganay. Guna su maitu na inipatawag'ilan su manga lukes'in 19 ka inidsa nilan lun i “Wata nu su mama a nia a pedtalun nu a nait'in den gememaw i di nin kapegkailay? Na panun a entu ka pakailay den sekanin saguna?” 20 Na nia inisumpat'u manga lukes'u mama na “Uway, wata nami sekanin enggu nait'in den gememaw i di nin kapegkailay. 21 Ugaid'a atag sa kapegkailay nin den saguna na di nami katawan u panun i kinailay nin atawa ka entain i nakapapailay lun. Sekanin den i idsai nu ka matua-tua den sekanin na magaga nin den semumpat i nan.” 22 Na nadtalu bu i nia nu manga lukes'in ka 'gkagilekan silan kanu 'gkangaunutan nu manga Yahudi. Kagina napagayunan den nu 'gkangaunutan nilan i apia entain i maginugut sa su Isa na su Masih na iawa den sekanin kanu . 23 Tembu ba nia inisumpat'u manga lukes'in kanilan na “Sekanin den i idsai nu ka matua-tua den sekanin.”

24 Na inipatawag'ilan menem 'bpaluman su mama a di pakailay paganay ka nia nilan lun pidtalu na “Idsapa nengka kanu Kadenan i edtalu ka sa bantang! Ka katawan nami man i su nia a mama na baladusa.” 25 Na nia inisawal'u mama na “Di ku katawan u baladusa sekanin atawa ka dikena. Nia ku bu katawan na di aku pakailay paganay, na saguna na pakailay aku den.” 26 Daka nia nilan menem inidsa sa lekanin na “Ngin i inipakaid'in sa leka? Panun i ukit a kinapailay nin sa leka?” 27 Na nia nin menem inisawal kanilan na “Pidtalu ku den sa lekanu ugaid'a da nu pakikinega. Ngintu ka 'gkalilinian nu 'bpakikineg 'bpaluman? Basi 'gkalilinian nu a mabaluy kanu a 'bpamangunut lun.”

28 Guna su maitu na pinagumpak'ilan sekanin sa nia nilan pidtalu na “Seka bu i 'bpagunut sa mama a nan! Ka sekami na nia nami 'bpagunutan na su Nabi Musa. 29 Na katawan nami i su Kadenan na inimbitiala nin su Nabi Musa ugaid'a su nia a mama na di nami katawan u endaw sekanin ebpun.” 30 Nia nin menem inisawal na “Namba i pakagaip, ka di nu katawan u endaw sekanin ebpun ugaid'a nakapailay aku nin! 31 Na katawan tanu i su baladusa na di 'bpakikinegen nu Kadenan. Ugaid'a apia entain i aden gilek'in kanu Kadenan enggu penggalebeken nin su kahanda nu Kadenan na entu ba i 'bpakikinegen nu Kadenan. 32 Iganat sa ganatan na dala pamun nakineg tanu a nakapapailay sa taw a nait'in den gememaw i di nin kapegkailay. 33 Na amaika su mama a nia ka dikena ebpun kanu Kadenan na da magaga nin enggula.” 34 Daka nia nilan lun pidtalu na “Seka na saben-sabenal a pimbata ka a baladusa! Nginan, 'bpamandun kami nengka?” Daka binugaw nilan sekanin.

Su manga Taw a nia nilan Kataw ka Pamakailay silan

35 Na guna makineg'u Isa al-Masih i binugaw nilan su mama a entu na pinangilay nin sekanin ka nia nin lun inidsa na “Pedsalig ka kanu Kaka nu Manusia?” 36 Na nia inisumpat'u mama na “Entain su entu mapulu? Ka basi kapaginugutan ku sekanin.” 37 Nia pidtalu nu Isa al-Masih na “Nailay nengka den sekanin ka su pembitiala bun ba a nia sa leka.” 38 Daka nia inisumpat'u mama na “'Bpaginugut aku, Mapulu.” Entu pan ka sinemugiud sekanin kanu kasangulan nu Isa al-Masih. 39 Na nia menem pidtalu nu Isa al-Masih na “Nia tangga na kinasia ku na makukum su sakadunia asal'a makailay su di pakailay enggu su pakailay menem na di den makailay.” 40 Na nakineg i nia nu ped kanu manga taw lu a lusud kanu lumpukan a Parisiyu. Na nia nilan pidtalu na “Ngin i katig'engka sa lekami, pisek?” 41 Nia pidtalu nu Isa al-Masih kanilan na “Dikena, ka u mana bu man ka di kanu pamakailay na da kabaladusan nu. Ugaid'a sabap sa pidtalu nu i pamakailay kanu na baladusa kanu pamun.”