Su Babay a Nauman sa Kinagkiuga nin
8
Ugaid'a su Isa al-Masih na linemu kanu Palaw nu Ulibus. 2 Na kanu kasisi na mapita na mimbalingan sekanin lu kanu lama-lama nu Suti a 'Bpagagaman. Na langun na taw lu na pedsupeg den sa lekanin. Na nagagayan sekanin ka pinamamandu nin silan.3 Daka pinananggit lu nu manga gulu nu pangitaban enggu manga taw a lusud kanu lumpukan a Parisiyu i babay a nauman sa kapegkiuga nin ka pinadtindeg'ilan lu kanu kasangulan nu manga taw 4 ka pidtalu nilan kanu Isa al-Masih i “Gulu, su babay a nia na nauman sa kapegkiuga nin. 5 Na sia kanu kasuguan nu Musa na inisugu nin sa lekitanu i pamalantayn sa watu su maya ba a babay taman sa matay. Na seka, ngin i madtalu nengka makapantag kanu nia?” 6 Na inidsa nilan bu i nia asal'a 'gkadulatan nilan su Isa al-Masih ka enggu aden makasendit'ilan lun. Ugaid'a dinemukum su Isa al-Masih ka sinemulat kanu lupa a nia nin inusal na tindulu nin. 7 Ugaid'a 'bpangingidsan nilan bun sekanin. Daka midtindeg su Isa al-Masih ka nia nin pidtalu kanilan na “U entain sa lekanu i dala kadusan nin na entu ba i muna lun mengel sa watu.” 8 Na dinemukum menem sekanin ka sinemulat menem kanu lupa.
9 Na guna nilan makineg su entu na uman i isa na minawa, nia minuna na su mangatua taman sa nia bu nasama na su Isa al-Masih enggu su babay. 10 Daka midtindeg su Isa al-Masih ka nia nin pidtalu kanu babay na “Bai, endaw den silan? Ngintu, apia sakataw na dala demun sinemendit sa leka?” 11 Na nia inisawal'u babay na “Dala, Mapulu.” Na nia menem pidtalu nu Isa al-Masih sa lekanin na “Apia saki na di ku bun seka senditan. Ganat ka den ugaid'a iganat saguna na da ka den endusa 'bpaluman.”
Su Isa al-Masih su Palitan nu Manusia
12 Na nia menem pidtalu nu Isa al-Masih kanilan na “Saki su palitan nu sakadunia. Na u entain i munut sa laki na di den maguyag-uyag sia kanu kalibutengan ka nia pan mula na maaden kanilan su palitan a 'bpagenggay sa uyag-uyag a da taman nin.”a 13 Daka nia pidtalu sa lekanin nu manga taw a lusud kanu lumpukan a Parisiyu na “Seka bu i pakadtalu sa nan sa ginawa nengka, dili a benal i nan kapalitialan.” 14 Na nia inisawal'u Isa al-Masih na “Apia saki bu i pedtalu sa nia pantag kanu ginawa ku na bantang su ibpangimbenal ku kagina katawan ku u endaw aku nakabpun enggu endaw aku pebpawang. Ugaid'a sekanu na di nu katawan u endaw aku nakabpun enggu endaw aku pebpawang. 15 Na sekanu na nia ukit a kabpangukum'u na ukit a kamamanusiay bu ugaid'a saki na apia sakataw na dala pegkukumen ku. 16 Ugaid'a apia man mangukum aku na bantang su kukuman ku kagina dikena saki bu i 'bpangukum ka kaped ku su Ama a sinemugu sa laki. 17 Na nakadalem kanu kasuguan nu sia kanu kitab i amaika su dua kataw a 'bpangimbenal ka nagayun su pedtalun nilan na benal su entu. 18 Na saki na ibpangimbenal ku su ginawa ku enggu ibpapangimbenal aku nu Ama a sinemugu sa laki.”
19 Guna su maitu na nia nilan inidsa sa lekanin na “Endaw besen i Ama nengka?” Na nia inisumpat'u Isa al-Masih na “Di aku nu man katawan enggu di nu bun katawan su Ama ku. Ka u katawan aku nu bu man na katawan nu bun su Ama ku.” 20 Na kanu kinadtalu nu Isa al-Masih kanu langun nu entu na lu natabu kanu kabpamandu nin lu kanu ubay nu 'bpangulugan sa kuleta kanu Suti a 'Bpagagaman. Ugaid'a da nakasigkem lun kagina da pan mauma su kutika nin.
Su Nabpunan nu Kawagib'u Isa al-Masih
21 Na pidtalu menem'u Isa al-Masih kanilan i “Saki na gemanat aku sia, na di kanu makalu kanu pebpawangan ku. Pangilayn aku nu ugaid'a di aku nu matun taman sa mait'u matay su kabaladusan nu.” 22 Guna su maitu na nia nangadtalu nu manga Yahudi na “Nginan, 'bpatay basi sekanin ka 'gkadtalu nin i di tanu makalu kanu pebpawangan nin?” 23 Daka nia menem pidtalu nu Isa al-Masih kanilan na “Sekanu na sia kanu nakabpun sa baba,b saki menem na lu aku nakabpun sa pulu.c Sekanu na nalusud kanu kanu dunia ugaid'a saki menem na dikena. 24 Na namba i sabap'in i pidtalu ku sa lekanu i mait'u den matay su kabaladusan nu. Kagina amaika di nu paginugutan u entain aku na saben-sabenal a matay kanu a da maampun su kabaladusan nu.” 25 Daka inidsan nilan menem sekanin sa “Entain ka besen?” Na nia inisumpat'u Isa al-Masih kanilan na “Nadtalu ku den sa lekanu paganay u entain aku.” 26 Nia pan pidtalu nu Isa al-Masih na “Madakel paman i madtalu ku makapantag sa lekanu a makasugat sa lekanu sa kawagib. Ugaid'a saki na nia ku bu pedtalun kanu sakadunia na u ngin bu i 'gkakineg ku kanu sinemugu sa laki. Na su sinemugu sa laki na bantang sekanin.”
27 Na di nilan 'gkatuntayan i su pedtalun nu Isa al-Masih kanilan na su Ama a Kadenan. 28 Guna su maitu na nia pidtalu nu Isa al-Masih kanilan na “Amaika makatunggul'ud den su Kaka nu Manusia na lu nu den ba katawan u saben-sabenal a entain aku. Na dala penggalebeken ku a kiug demun nu ginawa ku, ka nia ku bu pedtalun na u ngin bu i ibpamandu nu Ama sa laki. 29 Na su sinemugu sa laki na pedtapiden aku nin, dala aku nin a benal tagaka kagina nia ku bu penggalebeken na u ngin i pakasuat sa lekanin.”
30 Na kanu kapedtalu nu Isa al-Masih sa nia na madakel i namaginugut lun.
Su Tidtu a Makapalipuas kanu Manusia
31 Na nia pidtalu nu Isa al-Masih kanu manga taw sa Yudia a namaginugut lun na “Amaika papanalusen nu su kanggulalan nu kanu panduan ku na saben-sabenal a 'bpamangunut kanu sa laki. 32 Na amaika maitu na katawan nu su bantang enggu su bantang ba a nia i makapambaya-baya sa lekanu.”
33 Na nia nilan pidtalu sa lekanin na “Sekami na tupu kami nu Nabi Ibrahim, na apia entain na dala nakapangungulipen sa lekami. Na panun a entu i kapedtalu nengka lun sa makambaya-baya kami?” 34 Nia menem inisawal'u Isa al-Masih kanilan na “Saben-sabenal a pedtalun ku sa lekanu i apia entain i penggalebek sa kabaladusan na ulipen nu kabaladusan. 35 Na su ulipen na dikena taman sa taman na madtagapeda bu nu sakambinabatan ugaid'a su wata na madtagapeda nu sakambinabatan taman sa taman. 36 Kagina ka maitu na amaika su watae i mapambaya-baya sa lekanu na entu pan ba a tidtu-tidtu a nakambaya-baya kanu.
37 “Katawan ku man i tupu kanu nu Ibrahim ugaid'a ngintu ka 'bpapangilayn nu i kaimatay nu sa laki? Kagina dikena nu ipedtagu sa ginawa su panduan ku. 38 Nia ku pedtalun sa lekanu na u ngin bu i nailay ku kanu Ama ku. Ugaid'a sekanu na nia nu menem penggalebeken na u ngin i 'gkakineg'u kanu ama nu.”
39 Na nia nilan lun inisumpat na “Su Ibrahim man i kalukesan nami.” Na nia menem pidtalu nu Isa al-Masih kanilan na “Amaika sekanu ka nia nu kalukesan na su Ibrahim na enggalebeken nu man u ngin i pinggalebek'in. 40 Ugaid'a sekanu na nia nu pebpapangilayn na kaimatay nu sa laki. 'Bpagimatayan nu su taw a pedtalun nin sa lekanu su bantang a nakineg'in kanu Kadenan. Dala a benal i nan enggalebeka nu Ibrahim. 41 Ugaid'a sekanu na nia nu bun penggalebeken na su manga galebek'u ama nu.”
Daka nia nilan pidtalu sa lekanin na “Dikena kami wata sa pigkiuga, su Kadenan bu i Ama nami.” 42 Na nia pidtalu nu Isa al-Masih kanilan na “Amaika su Kadenan i Ama nu na ikalimu aku nu ka saki na ebpun aku lu sa Kadenan sa kinasia ku. Dikena kiug demun nu ginawa ku i kinasia ku ka su sinemugu sa laki. 43 Ngintu basi ka di nu 'gkatuntayan su pedtalun ku a nia? Kagina di 'gkatalima na ginawa nu su panduan ku. 44 Sekanu na nia nu man ama na su Datu na Giadsal.f Na u ngin i kiug'in na entu ba i pegkiugan nu penggula. Iganat sa ganatan na talibunu den sekanin. Kuntela nin su bantang kagina dala sa lekanin su kabantang. Amaika pedtalu sekanin sa kabudtud na nakaandang den i entu sa lekanin. Saben-sabenal man a budtuden sekanin kagina sekanin i punsuan nu kabudtud. 45 Na sabap sa saki na nia ku pedtalun na su bantang na namba i sabap'in sa di aku nu 'bpaginugutan. 46 Entain ba sa lekanu i makapaamad sa baladusa aku? Amaika pedtalu aku sa bantang na ngintu ka di aku nu 'bpaginugutan? 47 Apia entain man i nalusud kanu Kadenan na 'bpakikinegen nin su kadtalu nu Kadenan. Na tembu ba di kanu 'bpamakikineg ka dikena kanu lusud kanu Kadenan.”
Su Isa al-Masih na Nauna pan kanu Nabi Ibrahim
48 Na nia pidtalu nu manga taw sa Yudia na “Benal bun ba i pedtalun nami a isa ka a taw sa Samariag enggu inasukan ka na saitan.” 49 Nia menem inisawal'u Isa al-Masih na “Dikena aku inasukan na saitan. 'Bpagadatan ku bu su Ama ku ugaid'a sekanu na papegkayan aku nu. 50 Ugaid'a dikena nia ku 'gkapaginapas i mapugi aku nu apia entain. Ugaid'a aden pakapangingalap sa mapugi aku. Sekanin su 'bpangukum. 51 Na saben-sabenal a pedtalun ku sa lekanu i apia entain i maginugut kanu panduan ku na di den temala sa kapatay taman sa taman.”
52 Daka nia pidtalu nu manga taw sa Yudia na “Saguna na natalatantu nami den i benal a inasukan ka na saitan. Ka apia su Nabi Ibrahim enggu su ped pan a manga nabi na namamatay bun. Na seka na ngintu ka nia nengka 'gkadtalu na apia entain i maginugut kanu panduan nengka na di den temala sa kapatay taman sa taman? 53 Ngintu, lawan ka pan besen kanu kalukesan nami a su Ibrahim? Apia sekanin na minatay bun taman den kanu ped pan a manga nabi. Entain besen i katig'engka sa ginawa nengka?” 54 Na nia inisawal'u Isa al-Masih na “Amaika saki bu i pebpugi kanu ginawa ku na dala i entu katagan nin. Ugaid'a su Ama ku i pebpugi sa laki a su pedtalun nu a Kadenan nu. 55 Di nu sekanin katawan ugaid'a saki na katawan ku sekanin. Amaika nia ku edtalun i di ku sekanin katawan na makailing aku sa lekanu a manga malebut. Ka benal man a katawan ku sekanin enggu ipenggulalan ku su kadtalu nin. 56 Na su kalukesan nu a su Ibrahim na sangat a napia i ginawa nin guna nin katawi i mailay nin su gay nu kauma ku taman sa nailay nin i entu enggu sangat a nagalaw sekanin.”
57 Na nia pidtalu nu manga taw sa Yudia na “Dala ka pamun malimapulu lagun na panun a entu ka 'gkadtalu nengka i nailay nengka su Nabi Ibrahim?” 58 Na nia menem pidtalu nu Isa al-Masih na “Saben-sabenal a pedtalun ku sa lekanu i da paman su Nabi Ibrahim na sia aku den.” 59 Na guna su maitu na minundut silan sa watu a ibengel'ilan kanu Isa al-Masih ugaid'a nagena su Isa al-Masih enggu minawa lu kanu Suti a 'Bpagagaman.