Su Kinambad-bad'u manga Taw pantag kanu Isa al-Masih
7
Kanu ulian nu entu na lu mibpawang su Isa al-Masih kanu manga dalepa a lu bun kanu prubinsia a Galili ka pigkahanda nin i di pan lemu sa prubinsia a Yudia kagina pebpapangilayn bun nu 'gkangaunutan nu manga Yahudi i kaimatay nilan sa lekanin. 2 Saleta mambu na guna su mangagan den 'gkauma su kanduli nu manga Yahudi a bedtuan sa Kanduli na Balala 3 na nia pidtalu nu manga tebped'in sa pused na “Ganati ka i dalepa a nia ka lu ka sa Yudia ka enggu 'gkailay bun nu 'bpamangunut sa leka su manga penggalebeken nengka a nan a kangagaipan. 4 Ka su taw a nia nin kalinian na mabadtug sekanin na di nin ipamagena su galebekan nin. Na amaika nia den ba i penggalebeken nengka na ipailay nengka kanu langun nu taw!” 5 Na pidtalu nilan i entu ka apia silan a tebped demun sa pused'u Isa al-Masih na di silan 'bpamaginugut.6 Daka nia inisumpat'u Isa al-Masih kanilan na “Su kutika ku na da pan mauma ugaid'a sekanu na apia ngin a kutika na mapakay sa lekanu. 7 Ka di kanu man kabensian nu sakadunia ugaid'a saki na 'gkabensian aku nilan kagina ipedsaksi ku i su manga galebekan nilan na luyud kanu saitan. 8 Na sekanu na lu kanu den kanu kanduli a entu ka saki na di aku 'bpelu kagina da pan mauma su kutika ku.” 9 Na kanu kinadtalu nu Isa al-Masih sa nia na migkalidtabun demun pan sekanin lu sa Galili.
10 Na guna su linemu den su manga tebped'in sa pused kanu kanduli a entu na linemu bun sekanin ugaid'a da sekanin pasipat. 11 Na saleta mambu na su 'gkangaunutan nu manga Yahudi na 'bpangilayn nilan sekanin lu kanu entu a kanduli sa nia nilan ibpangingidsa na “Endaw su mama a entu?” 12 Na madakel kanu manga taw lu i 'bpamagedunga pantag kanu Isa al-Masih. Su ped na nia nilan pedtalun na “Mapia sekanin a taw.” Su ped menem na nia nilan pedtalun na “Dikena, ka papedsibayn nin bu su madakel a taw.” 13 Na apia ka maitu na dala pakambibitiala pantag sa lekanin sa mapayag kagina 'gkangagilekan silan kanu 'gkangaunutan nu manga Yahudi.
Su Kapendalawana makapantag sa u Entain su Isa al-Masih
14 Na guna su nakaluk den su kanduli, na linemu su Isa al-Masih kanu lama-lama nu Suti a 'Bpagagaman ka namandu sekanin lu. 15 Na nangagaip su manga Yahudi taman sa nia nilan 'gkangadtalu na “Panun i kinatuntay nu mama a nia kanu langun nu nia? Inunta na dikena mapulu i napangagian nin.” 16 Daka nia inisumpat'u Isa al-Masih kanilan na “Su ibpamandu ku na dikena ebpun sa laki ka ebpun kanu sinemugu sa laki. 17 Na apia entain a taw i pegkiug penggalebek kanu kahanda nu Kadenan na katawan nin mapadsenggaya u ebpun kanu Kadenan su ibpamandu ku atawa ka ebpun bu sa laki. 18 Na su taw a nia nin ibpamandu na su ebpun demun kanu ginawa nin na su namba a taw na nia nin 'gkalilinian na mapugi sekanin. Ugaid'a su taw menem a nia nin kalinian na mapugi nin su sinemugu lun na su namba a taw na matidtu enggu dala sa lekanin su kabudtud. 19 Na dikena ba su Nabi Musa i minenggay sa lekanu kanu kasuguan nu Kadenan ugaid'a apia sakataw sa lekanu na dala penggulalan lun? Kagina ngintu ka pegkiugan aku nu 'bpagimatay?”
20 Nia inisumpat'u madakel a taw na “Pedsaitanan ka! Entain i pegkahanda sa leka 'bpagimatay?” 21 Na nia pidtalu nu Isa al-Masih kanilan na “Langun nu na natekawan den a benal i ginawa nin sabap kanu satiman bu a nia a pinggula ku kanu Gay nu Kabpangintelenen. 22 Na nia ba i sabapan na kinaenggay nu Musa sa lekanu sa kasuguan sa kapaletakb sa apia nia nin kaaden i dikena ebpun kanu Musa ka ebpun pan i entu kanu nangauna a kalukesan.c Na iniupaman nin i entu sa lekanu sa apia kanu Gay nu Kabpangintelenen na paletaken nu su manga wata nu a mama, u entu ba i 'gkatabuan nin. 23 Na u pebpaletaken nu su manga wata a mama nu sa kanu Gay nu Kabpangintelenen asal'a di masungkang su inisugu nu Musa na ngintu ka 'gkaliangetan aku nu kanu talutup a kinapagkapia ku kanu mama sa kanu Gay nu Kabpangintelenen? 24 Da kanu 'bpanendit sia kanu matakapala a 'gkailay nu ka nia nu kapangukum na endaw i bantang.”
25 Guna su maitu na nia 'gkangadtalu nu ped kanu manga taw sa Awrusalim na “Dikena nia ba su mama a pegkiugan nu 'gkangaunutan 'bpagimatay? 26 Ilay nu! Pedtalu-talu bun sekanin sia kanu adapan nu madakel a taw enggu da bun pedtalun nu 'gkangaunutan sa lekanin! Ngintu basi, natalanged'ilan i sekanin mismu su Masih? 27 Ugaid'a panun basi i entu? Ka su Masih na apia sakataw na dala mataw lun u endaw makabpun kanu kauma nin ugaid'a su nia a mama na katawan tanu u endaw sekanin nakabpun.”
28 Saleta mambu na gagalu nu kabpamandu nu Isa al-Masih lu kanu Suti a 'Bpagagaman na nia nin pidtalu sa matanug na “Benal a katawan aku nu enggu katawan nu u endaw aku nakabpun. Na apia ka maitu na dikena ku kiug i kinasia ku ka su sinemugu sa laki. Na sekanin na bantang ugaid'a di nu sekanin katawan. 29 Ugaid'a saki na katawan ku sekanin kagina lu aku ba ebpun sa lekanin enggu sekanin man i sinemugu sa laki.”
30 Daka guna su maitu na kiugan nilan sekanin semigkem ugaid'a apia sakataw kanilan na dala demun nakaami lun kagina da pan mauma su kutika nin. 31 Na saleta mambu na madakel kanu taw lu i sinemalig sa lekanin sa nia nilan pedtalun na “Ngintu, amaika makauma su Masih na makanggalebek sekanin sa lawan pan sia ba kanu pinggalebek'u mama a nia a manga kagaipan a tanda?”
Su Kapegkahanda sa Kapedsigkem kanu Isa al-Masih
32 Na guna makineg'u manga taw a lusud kanu lumpukan a Parisiyu su 'bpamagedungan nu manga taw pantag kanu Isa al-Masih na sinemugu silan apeg'u manga mapulu nu 'bpamangurban sa manga tameng'u Suti a 'Bpagagaman ka enggu nilan masigkem su Isa al-Masih.
33 Na guna su maitu na nia pidtalu nu Isa al-Masih na “Mangagan bu i kutika ku sia sa lekanud ka embalingan aku kanu sinemugu sa laki. 34 Na pangilayn aku nu ugaid'a di aku nu matun kagina di kanu makalu kanu entu a pebpawangan ku.”
35 Daka mimbibitialai su 'gkangaunutan nu manga Yahudi sa “Endaw basi pebpawang i mama a nia a di tanu kun sekanin matun? Enduken, pendadalaug basi sekanin lu kanu manga Yahudi a nakapayapat kanu dalepa nu manga dikena-Yahudi ka asal'a mapamandu nin lu su manga dikena-Yahudi? 36 Ngin basi i maena na pedtalun nin a nia a ‘Pangilayn aku nu ugaid'a di aku nu matun. Di kanu makalu kanu pebpawangan ku’?”
37 Na kanu mauli den a gay nu kanduli a su balapantag sa langun a gay nu kanduli na midtindeg su Isa al-Masih ka pidtalu nin sa matanug i “Apia entain i 'gkamalan na semia sa laki ka minem. 38 Ka nia man nakadalem kanu kitab na su pedsalig sa laki na temuga ebpun kanu pamusungan nin su bualan na ig a pakaenggay sa uyag-uyag.” 39 Na nia ba a entu pedtalun nu Isa al-Masih a bualan na ig na su Ruh a matalima nu taw a pedsalig sa lekanin. Ugaid'a kanu nia a kutika na da pan makaenggay su Ruh kagina da pan makapabpapulu su Isa al-Masih.e
40 Na ped kanu madakel a taw a nakakineg kanu manga kadtalu a entu nu Isa al-Masih, na nia nilan pedtalun na “Natalatantu i nia den ba su Nabi.”f 41 Su ped menem na nia nilan pedtalun na “Su nia a mama na sekanin su Masih.” Ugaid'a su ped na nia nilan pedtalun na “Ngintu, sa Galili besen makabpun su Masih? 42 Dikena ba nia nakadalem kanu kitab na su Masih na tupu nu Daud enggu makabpun sa Bitlihim a dalepa nu Daud?” 43 Guna su maitu na nabad su madakel a taw sabap kanu Isa al-Masih.g 44 Na su ped na kiugan nilan sekanin semigkem ugaid'a apia sakataw na dala nakaami lun.
45 Na guna su mimbalingan su manga tameng'u Suti a 'Bpagagaman lu kanu manga mapulu nu 'bpamangurban enggu lu kanu lumpukan a Parisiyu na nia nilan inidsa kanu manga tameng a entu a mimbalingan na “Ngintu ka da nu sekanin mapananggit sia?” 46 Na nia inisawal'u manga tameng na “Da pamun taw a maitu i kadtalu nin kanu mama a entu!” 47 Daka nia nakasumpat'u manga taw a lusud kanu lumpukan a Parisiyu na “Ngintu, apia sekanu na nakapasibay kanu nin den? 48 Ngintu, aden ba nailay nu a apia sakataw bu kanu 'gkangaunutan atawa ka manga taw a lusud kanu lumpukan a Parisiyu i pedsalig sa lekanin? 49 Ugaid'a su madakel a nia a taw a 'bpaginugut lun na dala sabut'ilan kanu kasuguan. Na inidsinta man silan nu Kadenan.”
50 Na kanu entu a kutika na lu bun si Nikudimu a isa bun kanilan a 'gkaunutan. Sekanin su linemu kanu Isa al-Masih kanu nangaipus a manga gay.h Na nia nin pidtalu na 51 “Dikena ba nakadalem kanu kasuguan tanu i di sugaten sa kawagib su taw nia tabia na makineg pan muna sekanin asal'a katawan u ngin i pinggula nin?” 52 Na nia nilan inisumpat kani Nikudimu na “Ngintu, ebpun ka bun sa Galili? Dalidip ka su kitab ka mailay nengka i da nabi a makabpun sa Galili.”
53 Daka guna su maitu na namanguli su uman i isa kanu walay nilan.