Su Kageba nu Suti a 'Bpagagaman
13
Na kanu kinaliu nu Isa al-Masih lu kanu Suti a 'Bpagagaman na nia pidtalu sa lekanin nu isa kanu 'bpamangunut lun makapantag kanu Suti a 'Bpagagaman na “Gulu, ilay ka, ngin den i kapia nin enggu kasela nin a manga walay i nan enggu su manga watu nin!” 2 Na nia inisumpat'u Isa al-Masih sa lekanin na “Su 'gkailay nengka ba a nan a mangasela a walay na apia satiman na dala mailay nengka lun a mamakapamaguntul a watu nin ka natalatantu a aden gemubal lun su langun nu entu.”3 Na kanu kabpagagayan nu Isa al-Masih lu kanu Palaw nu Ulibus kanu 'gkasangulan nu Suti a 'Bpagagaman na tinalipulu sekanin midsa ni Pitru, Yakub, Yuhan enggu Anduk sa 4 “Edtalu ka pan sa lekami u kanu i kanggula kanu entu ba enggu ngin i tanda sa manggula den su langun nu entu ba?” 5 Daka nia inisumpat'u Isa al-Masih kanilan na “Pangingati nu i dala makapasibay sa lekanu. 6 Madakel i embuat a nia nilan edtalun na silan su Masih taman sa madakel i makapasibay nilan. 7 Na u makakineg kanu den sa embubunua magidsan i masupeg enggu mawatan a dalepa, na da kanu magilek ka nasisita a manggula i entu ugaid'a dikena pamun i entu su kabangkit kanu dunia. 8 Kagina embubunua pan su manga bangsa enggu embubunua pan su manga sultan. Na maaden su manga linug kanu madakel a dalepa enggu maaden bun su kanggutem. Ugaid'a ludsuan bu i nia nu kamalasayan a nia nin kalagidan na mana su masakit a 'bpelumpak kanu endaw demun i kabpeludsu pembata nu babay.
9 “Na pangingat kanu ka ipalad kanu lu kanu 'bpamangukum enggu pamadasan kanu lu kanu pedsambayangan tanu a manga Yahudi. Na sabap sa laki na makukum kanu, na sia kanu kadtindeg'u lu kanu kaadapan nu manga gubilnadul enggu manga sultan na makadsaksi kanu kanilan pantag sa laki 10 ka su Mapia a Tutuma na dait man a makapayapat muna kanu langun nu bangsa. 11 Na uman kanu nilan sigkemen ka ipalad kanu sa kukuman na da kanu mangandam sa ngin i edtalun nu ugaid'a edtalu nu den u ngin i ipadtalu sa lekanu kanu entu ba a kutika kagina dikena man sekanu su pedtalu a entu ka su Suti a Ruh. 12 Na kanu entu a manga timpu na su manga edtetebped sa pused na paimatayan nin su tebped'in sa pused a 'bpaginugut sa laki enggu maitu bun ba su ama na paimatayan nin su wata nin, na su manga wata menem na semungkang kanu manga lukes'ilan a 'bpamaginugut sa laki taman sa paimatayan nilan. 13 Na sabap sa laki na kabensian kanu nu langun nu taw. Ugaid'a su taw a temigkel kanu paginugut'in sa laki taman sa kapupusan na entu ba i malipuas.
Su Timpu nu Dala Pagidsan nin a Kamalasayan
14 “Na u mailay nu den su pakangingilu a pakagiabu a edtindeg lu kanu di dait a edtindegan nin a punan a katagak kanu dalepaa (na dait a katuntayan nu pembatia su pantag kanu nia) na su langun na taw sia sa Yudia na dait a malalaguy den silan mamagayas lu kanu manga palaw. 15 Na su lu kanu liu nu walay nin na di den lemudep kanu walay asal'a kemua pan sa manga langun-taman nin. 16 Na maitu bun su lu kanu 'bpangangawidan na di den dait a muli pan asal'a kemua bu sa lambung'in. 17 Na duan-duan nin den su manga babay a magingay enggu papedsusu sa wata kanu entu ba a manga timpu! 18 Na ipangeni-ngeni nu i di manggula su entu kanu timpu na kambalat 19 kagina kanu entu ba a manga timpu na temala su manga taw sa da idsan nin a kamalasayan. Su entu a kamalasayan na dala pagidsan nin iganat pan sa kinapangaden nu Kadenan kanu dunia sampay den saguna enggu di den a benal kabpalumanan su entu. 20 Ugaid'a sabap kanu manga taw a pinamili nu Kadenan na pigkahanda nin i pupusen nin den mangagan su entu ba a manga timpu kagina amaika dili na dala masama a bibiag a taw.
21 “Na amaika aden edtalu sa lekanu sa ‘Ilay nu, nia den su Masih’ udi na ‘Ilay nu, entu den sekanin!’ na da kanu maginugut sa entu 22 kagina embubuat su manga 'bpamagigiling sa Masih enggu su manga 'bpenabi-nabi. Na enggalebek silan sa kangagaipan a kabarakatan asal'a makapasibay nilan su manga taw a pinamili nu Kadenan amaika magaga nilan. 23 Kagina ka maitu na pangingat kanu ka pidtalu ku den ba a nia sa lekanu su langun nu nia sa unan nu di pan 'gkanggula.
Su Kauma nu Kaka nu Manusia
24 “Ugaid'a kanu kaipus'u entu a kamalasayan sa kanu entu a manga timpu na endukilem su senang enggu su ulan-ulan na di den 'gkalinawag 25 enggu su manga bitun na mangaulug ganat kanu kawang-kawangan taman sa su langun nu lu sa kawang-kawanganb na mangakuyung. 26 Entu pan ka mailay su Kaka nu Manusia a lu makasaleta kanu manga gabun a makauma sia sa dunia. Na mailay nu taw su kabarakat'in enggu su sigay nin. 27 Na sugun nin su manga malaikat ka ipalimud'in su manga pinamili nin kanu pat a pisuk'u dunia.”
Padtatapen su Kandiaga
28 Nia pan pidtalu nu Isa al-Masih na “Ilay nu su kayu a igus. Endaw demun i kaleteb'u manga laun nin kanu manga sapak'in na katawan den i masupeg den su kabpanenang. 29 Na maitu bun ba u mailay nu den i manggula den su langun nu entu na katawan nu den i masupeg den a benal su kauma nin a mana san den sa bengawan i kasupeg'in. 30 Na saben-sabenal a pedtalun ku sa lekanu i natalatantu a di matag makadalung su manga taw kanu nia a timpu taman sa di pan manggula su langun nu entu ba. 31 Na madala den su langit enggu su lupa ugaid'a su manga kadtalu ku na di madala.
32 “Ugaid'a makapantag kanu gay udi na kutika nu kanggula kanu langun nu entu ba na dala isa bu a makataw lun nia tabia na su Ama bu. Apia su Tunggal'in na di nin katawan, maitu bun su manga malaikat'in lu sa sulega na di nilan bun katawan. 33 Kagina ka maitu na pangingat kanu enggu endiaga kanu kagina di nu katawan u kanu su kanggula sa entu. 34 Na mana bun su mama a linemu sa lalakawan a tinagak'in su walay nin ka inisalig'in su langun kanu manga ulipen nin. Na uman i isa na inenggan nin sa enggalebeken nin enggu inisugu nin kanu tameng'u bengawan i endiaga sekanin. 35 Na maitu kanu bun ba, endiaga kanu bun kagina di nu katawan u kanu i kauma nu Mapulu, basi sungu na gay udi na luk i gay udi na kakuku na manuk udi na katibuas i kauma nin. 36 Na apia makauma sekanin sa matekaw na di kanu nin kauman a pedtulug. 37 Na su pedtalun ku ba a nia sa lekanu na langkap den kanu langun: Endiaga kanu.”